Nunatta isiginnaartitsisarfia imaatigut angalassasoq
- Eqqarsarlunga ilinniartut isiginnaartitsisarfigisinnaagaat.
Nunatta Isiginnaartitsisarfiani pisortaq, Vivi Sørensen angallat takornariartaat, Kisaq isiginnaartitsisartut ataatsimoorlutik maajimit najugaqarfigisassaat pillugu oqarpoq.
Isiginnaartitsisarfimmi nunatsinni angalalerpoq, sumiiffimmiillu sumiiffimmut imaatigut angalanerminni tikikkaangamik isiginnaartitsisassapput.
- Kalaaliusugut umiartortuuvugut taanna aallaavigivara.
Vivi Sørensen isiginnaartitsisarfimmi 2023-mi pisortanngorpoq, taassumalu isiginnaartitsisarfiup aqqa Nunatta Isiginnaartitsisarfia eqqarsaatersuutigisimavaa, malinneqassappallu suna pisariaqarnersoq eqqarsaatigalugu.
- Uagut tassaavugut qamuuna pisuunnguallatsitsisussat tunniussisussat eqqumiitsulianik isiginnaagassianik taavalu taamaasiorniarutta nunarput tamaaviat tikittariaqarparput, taanna oqarpoq.
- Nunarput tamaat tikittariaqarparput, nunatsinni tikinneqarneq ajortut isiginnaartitsiartorfigisariaqarpagut.
Isumassarsiaq pitsaasoq
Nunatta Isiginnaartitsisarfia aatsaat siullermeertumik angalalinngilaq, isiginnaartitsisartut nalinginnaasumik silaannakkut angalasaraluarput, tamannalu unammillernartoqartarpoq.
Isiginnaartitsisartut aallaraangamik nassataqangaatsiartarput, aamma nassatat tikinngitsoortut imaluunniit kinguaattoornerit nalaanneqarnikuupput.
Isiginnaartitsisartut taamaammat imaatigut maanna angalaniarput.
- Imaalerusullunga, kaa, qanoq iluaq umiarsuaaraqartuuguni, pisattagut tamarmik tassaniittut, taava sininnitsinni angalaarluta, tikikkutta isiginnaartitsigutta,
- Aallaqqikkutta angalanitsinni sinissinnaalluta soorlu taamatut, qujanartumik piviusunngorpasilerpoq, Vivi Sørensen oqarpoq.
Isiginnaartitsisartut isiginnaartitsinermik ilinniarfiup siorna oqunnerani inissianik nutaanik nassaarniartariaqalernerata nalaani isumassarsiaq pinngorpoq.
Pilersaarutip piareernissaa utaqqineqartoq
Isiginnaartitsisartut Upernavimmit Qaanaamut angallat takornariartaat Kisaq angalassutigissavaat, Qaanaamiillu kujammut aallassallutik.
Nunatta sineriaa isorartummat isiginnaartitsilluarsinnaanissaq kisimi piumasaqaataanngilaq.
- Isiginnaartitsisartorsiorninni imaakkama sianeruma illit umiartornerluttarpit? Apereqqaalaartarluni ilaa angalaqataaniaruni.
Naallu imaatigut angalalluni isiginnaartitsiartornissamut aningaasat qulakkeerneqareeraluartut pilersaarutip tamakkiisup piareernissaa utaqqiinnarpaat.
Vivi Sørensenip tikiffiit qanoq inneri apeqqutaallutik isiginnaartitsinerit assigiinngitsut takutinneqarumaartut oqaatigaa.
Umiartorluni sunarsuaq anguneqarsinnaagaluartoq, nunarput isorartoqimmat Ittoqqortoormiit umiartorluni imaaliallaannaq tikeriaannaanngimmat silaannakkut angalallutik siulliullugu marsimi isiginnaartitsivigiartorumaarlugu isiginnaartitsisarfimmi pisortap oqaatigaa.
Tasiilap eqqaanilu nunaqarfiit qaqugu tikinneqarumaarnersut aamma pilersaarusiuleruttornerarpaa.
