Isertuussat takusinnaanngílaat
Danmarkimi partiit naalakkersuisunut illuatungiliuttut tamarmik ullumi Illersornissamut ministereqarfimmut pulaarput, Afghanistanimi danskit sakkutuui pillugit allaaserisat isertuussat atuarusukkaluarlugit... susaarlutilli!
- Pappilissat takunissaat qilanaaraara, taama oqarpoq Radikale-neersoq Naser Khader. Ullumi Folketingip nunanut allanut ataatsimiititaliaani ilaasortat allat peqatigalugit, pappilissanik isertuussanik misissuinissamut periarfissinneqarsimasoq.
Pappilissat takoreerlugit Naser Khader oqarpoq, danskit sakkutuui qanoq peqquneqarsimanersut atuarlugu soqutiginaqisoq, taamaattorli tigusat Amerikamiunit tigummineqarnermik nalaani qanoq pineqarsimanersut paasissallugu soqutiginarnerugaluartoq. Kisianni pappilissat isertuussat takusatta annerusumik paasisaqartinngilaatigut, Khader oqarpoq.
Tassa Illersornissamut ministeri ataatsimiititaliamik qaaqqusigaluarpoq, naalakkersuisut sorsunnermi tigusanut tunngatillugu paasissutissanik isertuussisimasutut eqqunngitsumillu Folketingimut paasissutissiisimasutut pasineqarnerat iliuuseqarfiginiarlugu, kisianni akissutissarpassuit amigaataapput aamma taama isumaqarpoq Mogens Lykketoft Socialdemokratineersoq.
- Pappilissani isertuussani apeqqutit pingaarnerit uppernarsarneqaratillu ilumuunnginnerarneqanngillat. Soorlu danskit sakkutuui tigusanik killisiugassanik Amerikamiunut ingerlatitseqqissimanersut aamma taakkua naalliutsinneqarsimanersut, Mogens Lykketoft oqarpoq.
Tassa filmimi piviusulersaarummi ateqartumi “Den Hemmelige Krig”-imi, kalaallisut taasinnaasatsinni “Sorsunneq isertuussaq”-mi danskit sakkutuui pisuutinneqarput Afghanistanimiunik tigusaminnik 31-usunik Amerikamiut sakkutuuinut tunniussissimanerarlugit, nalunngikkaluarlugu naalliutsinneqartussaasut.
Ministeriunerup pisuutitsinerit tamaasa ippassaq ilumuunnginnerarpai, peqatigitillugulu oqarluni piffissami qaninnerpaami nalunaarusiortoqassasoq.
Nalunaarusiarlu taanna illuatungiliuttut maanna utaqqivaat.
Filmi piviusulersaarut oqallisigineqaqisoq sisamanngornermi decembarip 7-iani unnukkut nalunaaqutaq qulinut KNR-TV-kkut takutinneqassaaq.
