Isaap angutip 20-nik ukiullip timaa siumorpaa, ullulli arlallit qaangiuttut aatsaat ikiorneqarluni

Isak Storch Nuummi blok 5-imi initaaminut sapaatip akunnerata siuliani tallimanngornermi nutsertussaagaluarpoq.

Taassuma inissiaq imminut naleqquttoq ukiut qulit utaqqisimavaa, taannami kaassuartakkamik atugaqarpoq.

Nutsernermili peqqarniitsumik takusaqarpoq. Taannammi angummik 20-nik ukiulimmik quimi sapaatip akunnerata siuliani nassaarineqartumik siumuisuuvoq, angullu taanna toqutaasimasoq politiit isumaqarput.

- Qungujulallunga aah quissaramita qanoq angitingiva?, Isak Storch oqarpoq.

- Ammarlugu inuk snapsi eqqaaniikkami taava isumaqarluta artuleqqaannartoq, taanna oqarpoq.

Ullut sisamat tusagaqanngitsoq

20-nilli ukiulik siniinnanngilaq. Toqungallunilu. Naalli pisoq sakkortulluinnaraluartoq Isak Storch oqartussanut pinasuartumik ikiorneqarnissamik neqeroorfigineqanngilaq.

- Ikiorneqanngilanga ullut sisamat, taanna oqarpoq.

Tamannalu pinasuartumik ikiuinissamut tunngatillugu kommunip nammineq maleruagassaanik unioqqutitsineruvoq.

Politiit pisumi sakkortuumi suliaqarnermik aallartitsippata, kommunimi ikiuigasuartussap sakkortuumik pisoqarneraniit akunnerit 24-t qaangiutsinnagit nalaataqartoq attaveqarfigissagaa, Kommuneqarfik Sermersuup nittartagaani allassimavoq.

Isak Storchili pinasuartumik ikiorserneqanngilaq. Tamannalu kingunerluutigaa.

- Sininngitsoorpunga ullut sisamat sequnngerlungalu takusuuseqqittarakku. Assut annikilliornarpoq taama qanoq ilimasunnani taamatut nassaarluni kingunerluutaa sakkortuvoq, taanna oqarpoq.

Isak Storchilu Tusaanngamut nammineerluni ikiortissarsiorpoq, taannali kommunimut ingerlateqqinneqarpoq.

- Kommunimut sianeratta utaqqingaatsiariarluta takkuttoqarpoq marlunngulernerani oqaloqatissamik aamma tupigivaat namminneq politiiniit kalerrinneqarsimannginnamik taama pisoqarsimasoq, taanna oqarpoq.

Nalunaarutit assigiinngitsut

Isak Storch angummik 20-nik ukiulimmik nassaareernermi kingorna qanoq ikiorneqarsimasoq KNR-ip politiit tusagassiortunut pingasunngornermi katersortitsineranni apeqqutigaa.

Politiillu kommunip ajornartoornermi upalungaarsimasunut paasissutissiisimasut, politiit misissueqqissaarnermi aqutsisuata, Malik Sandgreenip oqaatigaa.

- Politiit tungaanniit angut nalunaarutiginnittoq killisiorparput, kisianni aamma kommunimit ikiuigasuarsinnaasut tigusinissaminnut piareersimanissaat isumagaarput, Malik Sandgreen oqarpoq.

Isak Storch tikkuartuinianngilaq, kisianni allat immisulli nalaataqannginnissaat neriuutigaa.

- Uanga neriuutigivara pisortat allallu soorlu politiit allallu taamatut nalaataqartunut sukkanerusumik saaffissaannik ikiorneqartassasut inuit allat taamak misigisaqarnissaannik kissaannanngeqigamik soorlu ullut sisamat utaqqineq nalitoorujussuuvoq sakkortoorujussuullunilu, Isak Storch oqarpoq.

Isak Storchip sakkortuumik nalaataqarsimanera pillugu ikiorneqarniarneranut kina akisussaasuunersoq Kommuneqarfik Sermersuumut akissutissarsiniarlugu KNR saaffiginnippoq. Taakkulu sulianut ataasiakkaanut tunngatillugu oqaaseqarsinnaanatik KNR-imut paasissutissiissutigaat.