Angut 25-nik ukiulik Nuummi inissiarsuit ilaanni toqutsisimasutut pasisaalluni tigusaasoq

Angut toqungasoq Nuummi inissiarsuit ilaanni blok 5-imi nassaarineqartoq, politiinut tallimanngornermi ullaap tungaagut kalerriutigineqarpoq. Politiit suliami tassani pissutsinik pasinartulittut siullermik taasaminni toqutsisoqarsimaneranilli suliatut kingorna taasaminni kalerriutigineqarnerata kingornali misissuipput.

Angullu tassa 25-nik ukiulik suliamut tassunga tunngatillugu toqutsisimasutut pasisaalluni tigusaasoq, politiit tusagassiorfinnut ataasinngornermi ullaakkut nalunaarput.

Angut toqutsisimasutut pasisaasoq arfininngormat unnukkut tigusaavoq Nuummilu Eqqartuussisoqarfik Sermersuumi matoqqasumik sapaatiummat ualikkut sassartinneqarluni.

Angut taanna ulluni 25-ni tigummigallagassanngortinneqartoq suliarlu taanna pillugu allamik oqaaseqarsinnaanngikkallarlutik, politiit ilisimatitsipput.

Angut toqungasoq nassaarineqartoq 20-nik ukiuliusoq blok 5-imilu quimi nassaarineqarsimasoq, politiit sapaatit akunnerata naanerani nalunaarutigaat.

Politiit tassa allamik paasissutissiinngillat, innuttaasullu blok 5-ip nalaani pasinartumik sapaatit akunnerata siuliata ingerlanerani maluginiagaqarsimasunit suli attavigineqaqqullutik.

Toqusut timaannik misissuisartut pinerluttoqarsimaneranillu misissuisartut suliami tassani misissueqataajartorlutik Danmarkimiit tikissapput. Taakkua sapaatit akunnerata massuma ingerlanerani tikissangatinneqarput.

Toqutsisimasutut pasisaalluni tigusap tigummigallagassanngortinneqarnini Nunatta eqqartuussisuuneqarfianut aalajangeqqitassanngorteqqippaa.