Politiit toqutsisoqarneranit ullut tallimat qaangiuttut aaku oqaatigisinnaasaat
Angut toqungasoq blok 5-imi nassaarineqareersorli politiit annikitsukkaartumik tamanut paasissutissiipput.
Politiilli tallimanngornermi ullaap tungaani angutip toqungasup quimi nassaarineqarnerani susoqarsimanera pillugu maannamut oqaatigisinnaasaat killeqangaatsiarput.
Tigusarineqartoq pasineqartorlu eqqortuusoq qulakkeersimavisiuk?
- Taanna oqaatigisinnaanngilara suliaq suli ingerlammat. Danmarkimiit toqusoqarsimatillugu misissuisartut tikinnikuupput. Taavalu taakku misissuinerit ingerlatileruttorpaat, taamaammat imannak annertunerusumik oqaatigisinnaanngilara sumorpiaq killinnersoq, kisianni suli annertuumik misissuivugut, misissueqqissaartut aqutsisuat, politikommissæri, Malik Sandgreen oqarpoq.
Kisianni Nuummi inuit toqqisisimasinnaasut ippassaq oqaatigaarsi. Taama nalunaaruteqarnermut suna pissutaava?
- Innuttaasut ernumassutissaqanngitsut aqqusinermilu angalanerminnut ersissutissaqanngitsut politiinit isumaqarpugut, taanna erseqqissaavoq.
Eqqortumik tigusarinninnersi ilimagilluinnarassiuk taama oqaaseqarpisi?
- Misissuinigut akissutersiffigitinnagit tamanna annerusumik oqaasiseqarfigisinnaanngilara.
Toqutsisutut pasineqartoq
Angut tigusarineqartoq toqutsisutut pasineqarluni ulluni 25-ni tigummigallagassanngortinneqartoq sapaatip akunnerani siusinnerusukkut saqqummiunneqarpoq.
Angut tigusarineqartoq toqutsisutut pasineqarnermi saniatigut allamik aamma pasineqarpa?
- Suliaq toqutsisoqarsimaneratut misissuiffigaarput, toqutsisutullu pasineqartutut sapaatiummat aamma sassartillugu.
Taanna ‘kisiat’ pillugu pasineqarpa, imaluuniit allamik aamma pasineqarpa?
- Suliami suli misissueqissaartoqarmat tamanna oqaaseqarfigisinnaanngilara, angutillu sassartinneqarnera matoqqasumik pimmat qanoq oqaaseqarsinnaanera killeqarpoq, kisianni toqutsisutut pasineqartoq oqaatigisinnaavara.
- Taanna oqaatigisinnaanngilara, eqqartuussineq matoqqasumik ingerlanikuummat. Taanna 25-nik ukiulik toqutsisutut pasisarput sapaatiummat sassartinneqarpoq.
Angut quimut parnaaqqasumut 20-nik ukiullip nassaarineqarfianut qanoq ililluni isersinnaava?
- Suliaq suli ingerlammat imannak annertunerusumik paasissutissat annertunerusumik oqaaseqarfigisinnaanngilakka.
Pinerlineqartumut paasissutissat aamma killeqartut
KNR-ip pinerlineqartumut, 20-nik ukiulimmut tunngatillugu apeqqutaanut politiinut akissutigineqartoq aamma annikitsuaraarsuuvoq.
Toqutaasup quimi qanoq sivisutigisumik uninngasimanera ilisimavisiuk?
- Misissuineq suli ingerlavoq. Aamma suliaq annertuumik ingerlatissavarput ulluni tulliuttuni, aamma oqaatigisinnaanngilara qanoq sivisutigisumik taakaniissimanersoq, kisianni takunnissimasoqarsinnaappat inuttaa pillugu arlaannik paasissutissaateqartoqarpat taakku takunnissimasut attaveqarfigerusuppagut assut.
Politiit paasissutissanik misissueqqissaarnermut iluaqutaasinnaasunik tigummisaqartoqarpat saaffiginnittoqarnissaa arlaleriarlutik kaammattuutigaat, taavalu suli kaammattuuteqarput.
- Innuttaasuniit saaffigineqallattaavugut aamma suli tusarfigerusuttorujussuuagut takunnissimasinnaasut taavalu arlaatigut filmiliuutikkut peqartunik, taamaammat taakku politiinut saaffiginnissinnaapput, Malik Sandgreen oqarpoq.
Innuttaasumit nalunarutigineqartoq
Innuttaasup angut toqungasoq nassaarisimagaa misissueqqissaartut aqutsisuata paasissutissiissutigaa.
- Pisoq toqutsisoqarneratut misissuiffigaarput, kisianni annerusumik oqaaseqarfigisinnaanngilara. Politiit tungaanniit angut paasisaanut atatillugu apersorparput, kisianni aamma kommunimit ikiuigasuarsinnaasut tigusinissaminnut piareersimanissaat isumagaarput.
Suliamut atatillugu paasissutissaateqaruit Kalaallit Nunaanni Politiinut 70 14 48-mut attaveqarsinnaavutit.
