ICC-p ataatsimeersuarnera: Inuusuttut ingerlatitseqqinnissaminnut piareersimasut

Alaskap sineriaata avannarpasissortaani illoqarfimmi Utqiagvimmi ICC-ip 13-ip sinaakkutissaa pilersinneqarpoq. Ataatsimeersuarneq ukiut sisamakkaarlugit ingerlanneqartarpoq.
Allattoq Marianne Stenbæk, Montreal, Canada
juulip 17-at 2018 13:04
Nutserisoq Connie Fontain

Utqiagvimmi borgmesterip, Eben Hopsonip naggueqatigiit Inuit issittumi nunanit sisamaneersut taamani Barrowimik taaneqartumut ataatsimiigiaqqummagilli ukiut 41-t qaangiupput tassalu 1977-imi.

Ataatsimiinnermi tassani ataatsimoortumik kattuffeqalernissaq aallartinneqarpoq ICC-lu 1980-imi Nuummi pisortatigoortumik pilersinneqarluni. Tamatuma kingorna siunnersuisoqatigiiffik nunat tamalaat akornanni siunnersuisoqatigiiffiulerpoq naggueqatigiillu Inuit sulissutigineqartarlutik. Siunnersuisoqatigiiffik Naalagaaffiit Peqatigiinni Issittumilu siunnersuisoqatigiinni ilaasortaanermigut naggueqatigiinnut inunnut nunallu inoqqaavinut pisinnaatitaaffinnik assigiinngitsorpassuarnik sulissuteqartarpoq.

AAMMA ATUARUK Pikialasorsuaq pillugu isumalioqatigiissitaq ICC-mut pingaaruteqarpoq

Aqqaluk Lynge ataatsimeersuarnissamut pisortatigoortumik qaaqqusat ilagaat.

Taanna ukiuni 38-ni ICC-ip siulittaasuinut ilaasortaavoq, ilaatigullu nunat assigiinngitsut akornanni siulittaasuusimallunilu præsidentiusimavoq. Aqqaluk Lyngep ukiorpassuarni ICC-mi takusartakkani kiinnat ilisarnartorpassuit nutaallu naggueqatigiit inuit ukiut 41-t matuma siorna anguniagassatut aalajangigaannik suleqatigiinnerannik ingerlatseqqittussat ataatsimeersuarnermilu matumani ”Issittoq kissaatigisatsitut”-mik qulequtaqartumi nutaanik anguniagaqalersussat nuannaarutigalugit KNR-imut oqaatigaa.

ICC-ip Alaskap avannaani Utqiagvimmi ulluni tullerni ataatsmeersuarnera KNR TV-2-kkut malinnaavigineqarsinnaavoq. 

Ataatsimeersuarneq ullumi nalunaaqutaq 14:50 aallartippat KNR-2-mi toqqaannartumik malinnaavigineqarsinnaavoq. Oqalugiaatit kalaallisut nutserneqassapput.

Aamma atuaruk