Sulisitsisut nunatsinni pisortatut atorfiit pillugit: Inuusuttunut isumassarsiortitsisinnaasoq

Royal Greenlandimi pisortatut atorfinni marlunni inuttaasut Kalaallit Nunaanni siunissami najugaqartalissapput. Pingasunngormat Sermitsiaq.AG taama allaaserinnippoq.

Suliffeqarfiup aqutsisui nunatsinni najugaqarnissaat pillugu piffissami sivisuumi Naalakkersuisut piumasaralugu oqaatigisaqattaareeraallu aammattaaq Royal Greenlandip ataatsimeersuarnerani tamanna qanoq anguneqarnissaanut pilersaarummik saqqummiussisoqarnissaa Muté B. Egedep piumasaqaatigereeraalu tamanna pivoq.

Maannalu alloriarneq siulleq pivoq - tamannalu Sulisitsisuni pisortap Christian Keldsenip nuannaarutigaa:

- Suliffimmik pilersitsineq sunaluunniit pissanganartupilussuusarpoq. Pingaartumillu suliffik una suliffeqarfinni periarfissanut atatillugu pitsaasumik sunniisarpoq. Tamannalu pitsaasuinnartut isigaara, taanna oqarpoq.

Ilanngulluguli oqaatigaa suliffeqarfimmut tamanna allanngortitassaanngitsumik ajortumik pitsaasumilluunniit sunniuteqarnissaa oqaatigiuminaatsoq. Kikkut sutullu atorfinitsinneqassanersut apeqqutaapput:

- Ajornaatsumik akineqarsinnaanngilaq. Tassanimi suut tamarmik suliffeqarfimmut, suliffeqarfiup atorfissaqartitaanut kiisalu atuuffiit suut pineqarnersut apeqqutaapput. Atorfimmimi suliassaqarfiit aallutat atorfillip qanittussaavai, taanna oqarpoq nangillunilu:

- Suliassaqarfimmi ingerlataqarnerup qanittuani soorunami inissisimasussaavoq. Ingerlatsinerlu Kalaallit Nunaanni ingerlanneqarpat, atorfik soorunami nunami tassaniissaaq, taanna oqarpoq.

Kalaallit inuusuttaannut isumassarsiortitsisinnaasoq

Taamatullu naggammik pisoqarniarpasippoq. Royal Greenland nalunaarpoq atorfinni marlunni inuit qanimut attaveqatigalugit kiisalu suliffeqarfimmi ingerlatsineq qanillugu atorfiit taakkua siunissami nunatsinni inuttaqartinneqassasut.

Tassani atorfiit marluk tuluttut taaguutillit pineqarput: Executive Vice President of People & Communication Executive aamma Vice President of Marketing & Sustainability, taakkualu nunatsinni najugaqarluni atorfigineqassapput.

Sualummilli suliffeqarfiup avataani tamanna malunnaateqarlunilu inuusuttunut annertuunik takorluugalinnut isumassarsiortitsisinnaassasoq Christian Keldsen isumaqarpoq:

- Inuusukkaanni ilinniagaqarnissamillu aamma suliffimmi qaffakkiartuaarnissamik eqqarsaateqarluni, taama aalajangernerup ajortortaqarnissaa takorloorsinnaanngilara. Inuusuttummi taakkua nunatsinni pissanganaqisunik atorfeqartoq ilisimassavaat, taanna oqarpoq nangillunilu:

- Inuusuttavut maanna siunissamut isigilaarsinnaalerput atorfiillu sorliit anguneqarsinnaanersut takorloorsinnaavaat, taanna oqarpoq.