Aqutsisut nunatsinniissasut Mútep piumasaraa: Royal Greenlandilli pisortaanera Sverigemiiginnarniarpoq
Royal Greenlandimi aqutsisut tamarmik nunatsinniissapput, nunatsinniillu aallaaveqarlutik.
Naalakkersuisut siulittaasuat, Múte B. Egede, taama ersaritsigisumik pingasunngornermi KNR-imut oqarpoq.
Taamaakkaluartorli Royal Greenlandimi pisortartaaq, Susanne Arfelt Rajamand, Sverigemiit nuunnissaminik pilersaaruteqanngilaq.
Taanna maannangaaq Nuummiippoq ukiorli affaq qaangiuppat Sverigemut angerlaqqinnissaminik pilersaaruteqarpoq.
Naalakkersuisut piumasaqaataanut akerliunngitsoq
Royal Greenlandimi siulersuisut siulittaasuata, Maliina Abelsenip, pisortaanerup nunatta avataani najugaqarnera Naalakkersuisut piumasaqaataannut akerliunngitsoq isumaqarpoq:
- Qullersaqarfimmi atorfillit nunatsinniinnissaanik piumasaqarnerput unioqqunneqangitsoq isumaqarpunga. Aalajangiisoqassatilluguli sumi aalajangiisoqartassanersoq ilisimassallugu pingaarnerpaavoq, tassa nunatta avataani aalajangiisoqartassanngilaq, taanna KNR-imut oqarpoq.
Pisortat aqutsisullu nunatsinniitinneqalernissaat, nunatsinut iluaqutitaqassasoq, taanna isumaqarpoq:
- Nunatsinni meeqqat inersimasunngorlutik sumi atorfeqarnissaminnik maligassiuisunik isigisaqalernermikkut, inersimasunngorunik Royal Greenlandimi atorfeqalerusunnerminnik takorluugaqarsinnaalernissaat.
Royal Greenlandip siusinnerusukkut pisortaanera, Mikael Thinghuus aamma nunatsinni najugaqarani Danmarkimi najugaqarpoq.
Tassa tamannarpiaq aamma peqqutaalluni Royal Greenlandimi pisortaaninngortussamik nutaammik atorfinitsitsisoqaqqilerpat nunatsinni najugaqartuussasoq, Siumut siorna ataatsimeersuarneranni, Erik Jensenip naqissuserpaa. Taanna Naalakkersuisut sinnerlugit taamani oqaaseqarpoq.
Pisortaaneq Sverigemi najugaqartoq ilumut oqarsinnaavugut nunatsinniittoq?
- Isumaqarpunga taama oqartoqarsinnaasoq. Allaffissuarmiingaatsiartarpoq, maaniingaatsiartassallunilu, Maliina Abelsen oqarpoq.
Aqutsisut tamarmik nunatsinniittut
Royal Greenlandimi aqutsisut siunissami nunatsinniilernissaat, Múte B. Egedep qularutiginagu KNR-imut oqarpoq:
- Pisortaqatigiit kalaallit nunaaniinnissaat, kalaallit nunaanniillu aallaaveqarnissaat ingerlatseqatigiiffiup piumasaqarfigineqarnerani ilaatigut ilaavoq. Taamaammallu tassunga pilersaarusiorlutik ingerlatsinerat naalakkersuisuninngaanniit iluarisimaarlugu oqarpugut taamaammallu aamma saqqummiussissasut, qanorlu pilersaarutit timitalersorneqarumaarnersut, taanna oqarpoq.
Siulersuisunili siulittaasup, Maliina Abelsenip tamanna isumaqatiginngilaa:
- Aqutsisut tamarmik nunatsinni allaffeqalernavianngitsut qularinngilara. Uggornarluinnassaarmi kangiamioq kangiani tuniniaasartoq, nunatsinni allaffeqassappat.
Sulisut arlallit nunani allani allaffeqassasut
Siumut sinnerlugu Inatsisartunut ilaasortap, Lars Poulsenip, paragraf 37 naapertorlugu, Royal Greenlandip allaffeqarfiini nunatsinni Danmarkimilu sulisut qassit sulisorineqarnersut, nunalerinermut, imminut pilersornermut, nukissiutinut avatangiisinullu naalakkersuisumut, Kalistat Lundimut, marsimi apeqqutigaa.
Akissuteqaammi ukioq manna Danmarkimi 137-it Nuummilu 104-t sulisuusut allaqqavoq. Tassa allaffimmi sulisut Danmarkimi atorfeqartut amerlanerupput ullumikkut.
Danmarkimi sulisutut allaqqasut ilaat Sverigimi allaffeqarfeqartut, Maliina Abelsenip oqaatigaa.
Royal Greenlandip allaffissuassaa Nuummiittussatut taaneqarpat, taava tamanna qanoq ataqatigiissanersoq, Maliina Abelsen ima oqarpoq:
- Nunani allani sulisoqarnissamik pisariaqartitsigatta ataqatigiipput. Kisitsisitigulli takuneqarsinnaasutut suliffiit aamma ukiumut suliffiusut amerlanerujartuinnartut nunatsinnut nuunneqarput. Tamanna siunnerfigissavarput. Tamannalu siulersuisut siunneerfiliussaraat, taanna oqarpoq.
Royal Greenlandimi aqutsisut ilaasa nunatsinni allaffeqalernissat Royal Greenalndip ataatsimeersuarnerani Maliina Abelsenip oqariartuutigaa.
Tassa imaappa suliffeqarfiit nuunneqassappat? Imaluunniit sulisut sumi najugaqassappat?
- Qullersaqarfinni atorfillit ilaat nunatsinni allaffeqalissapput. Kisianni kikkorpiaat suminngaanniit sumut nuussanersut uanga nammineerlunga oqaatigerusunngilara. Taamaaliussaguma assuarnarluinnassaaq.
