Sulisitsisut siulittaasortaavat: Ameranerugutta nukittunerussaagut
Sulisitsisut nutaamik siulittaasoqalerput.
Siulittaasoq Krissie Winberg Berthelsenimik ateqarpoq, taannalu sulilernissaminut piareerpoq. Maannami suliassarpassuanngoreerput.
- Siulittaasunngorusunnikuuvunga, pissutigalugu siunissaq ulapaafiusussaq tikikkiartorparput. Ineriartortoqaleruttorpoq, piffissarlu ilungersorfiusoq suli qaangeriartorparput, tassa nunarsuaq tamakkerlugu tuniluuttoqarnikuuvoq, maannalu sorsuttoqarluni, Krissie Winberg Berthelsen KNR-imut oqarpoq.
Siulittaasutut toqqarneqartup atuuffik pisortatigoortumik arfininngormat tiguaa, taamaammat taassuma tamakkiisumik isiginnissinnaalernissaq siullertut suliassaraa.
- Siullertut sapaatit akunnerini tulliuttuni ingillunga pissutsit qanoq ataqatigiinnerat maanna ilinniarluassavara, Krissie Winberg Berthelsen oqarpoq.
Amerlanerusut pitsaanerussasut
Krissie Winberg Berthelsen nammineerluni inuussutissarsiuteqarnermik ingerlaqartuuvoq, Nuummilu neriniartarfiit Cafe Pascucci aamma Cafe Esmeralda pigalugit.
Tamatuma saniatigut ukiuni kingullerni pingasuni Sulisitsisut unnuisarfinnut, neriniartarfinnut, takoriaqarnermullu ataatsimiititaliaani ukiuni pingasuni kingullerni issiaqataalluni.
Maannali Sulisitsisuni atuuffimmi allamiilerluni siulittaasunngorpoq.
- Isumaqarpunga allannguisinnaallunga. Sammivimmut ineriartornissamullu pisariaqartitatsinnut sunniuteqaqataasinnaallunga isumaqarpunga, Krissie Winberg Berthelsen oqarpoq, katersuutsitsinissarlu suliassamini pingaarnerpaat ilaanniittoq erseqqissaatigalugu.
- Amerlanerugutta nukittunerussaagut. Ilaasortat katersornissaat suliassarilluinnassavara immaqalu ilaasortassarsiulaarlunga, siulittaasoq oqarpoq.
Krissie Winberg Berthelsenip ukiuni qulikkaani siulittaasuusimasoq Henrik Leth taarserpaa.
Henrik Leth Polar Seafood Danmarkimi pisortanngoriartorluni Danmarkimut upernaap ingerlanerani nuussaaq, taannali Sulisitsisuni suli nassaassaassaaq.
Taannami 2024-mi upernaap tungaanut Sulisitsisuni Aalisarnermut Avammullu nioqquteqarnermi inuussutissarsiuteqarnermi ataatsimiititaliamiiginnassaaq.
