Inuusuttunik suliniartut Kommuni Kujallermut pinngitsaaliisoqarsimanera pillugu kamattut

Pinngitsaaliisimasutut eqqartuussap, Iginniarfimmiup 40-nik ukiullip, Kasper Brandtip, Timi Asimi tunuliaqutarinerarlugu pisortanit apeqquserneqanngitsumik niviarsiaqqanik pissarsisarsimanera atornerluisarsimaneralu, Timi Asimi-p pilersitsisuata aqutsisuatalu mamiagaa.

Unge får et motiverende ophold hos Timi Asimi

Allattoq Nauja Møller, Sandra Meinecke, Tikaajaat Kristensen

januaarip 12-at 2015 16:02

- Ajuusaarnaqaaq. Tupannarpoq taamarujussuaq pisoqarsimanera, isumaqarpunga pisortat ammaassisimanerat tupinnartoq, misissuisoqarsimannginneralu assut tupaallannartoq, Kim Godfredsen Timi Asimi-mi pilersitsisuusoq KNR-imut oqarpo

Taassumalu uppernarsarpaa, atornerluillunilu pinngitsaaliisarsimasup maannalu piffissaligaanngitsumik pineqaatissinneqarsimasut inissiisarfianni Herstedvesterimut inissinneqarsimasup, Timi Asimi-mut attuumassuteqarsimanngilluinnarnera:

- Ajortupilussuarmik kinguneqarsimanera assut ajuusaarutigivarput, Kim Godfredsen oqarpoq.

Aperineqaramilu angut taanna Timi Asimi-mut arlaatigut attuumassuteqarnersoq, ima akivoq:

- Attuumassuteqanngilluinnaqqissaarpoq, Kim Godfredsen KNR-imut erseqqissaavoq.

Aamma atuaruk Eqqartuussaq aqutsisuunerarluni niviarsiaqqanik atornerluisoq

Kasper Brandtip eqqartuussaanerata kingorna Qanoruumiit misissuisoqarnerani paasineqarpoq, pisortanit uppernarsaammik piumasaqartoqarsimasuuppat angutip siornatigut eqqartuunneqarsimanera paasineqarsinnaagaluartoq. Eqqartuunneqarneranilu kingullermi paasineqarpoq Timi Asimi-mi ingerlatsisuunerarluni inuusuttuaqqamik tikisitsisinnaasimasoq. Tamannalu pilersitsisunut paasiniaasoqarsimasuuppat taamarasuaq kingunipiloqarsimassanngikkaluartoq, Kim Godfredsen isumaqarpoq:

- Uagut aterput atorlugu taamatut pisoqarsimanera, annertunerusumik misissuisoqarsimannginnera, uangaluunniit aperineqarsimannginnera assut tupinnarpoq. Tupannaqaaq!

Siornatigut arlaleriaq eqqartuunneqareerpoq

Kasper Brandt Kangaatsiami meeqqanik marlunnik 1989-mi pinngitsaaliisimasutut eqqartuunneqarsimavoq. Paamiunilu 1996-mi pinngitsaaliisimavoq, 2007-milu Sisimiuni aamma pinngitsaaliisimalluni, kingullermillu 2011-mi Kangaatsiami atornerluisimalluni.

Taamaakkaluartoq Maniitsumit Nanortalimmiillu uppernarsaammik piumaffigineqarani niviarsiaqqanik pissarsisarsimavoq pinngitsaalisimasaminik.

Tamannalu sakkortuumik illuatungilerneqartariaqartoq Timi Asimi-mit, inuusuttunik unittoorsimasunik sullissisartunit, isumaqarput:

- Kommunit toqqaannartumik malersornianngikkaluarlugit, inuit tamattami kukkusaratta. Kisianni una taama kukkuneq ersaritsigisoq oqartariaqarpunga sullarlunneq sakkortuumik illuatungilerneqartariaqarpoq.

- Taamaatullu pisoqaqqinnginnissaa assut kissaatiginarluni, Kim Godfredsen Timi Asimi-mi pilersitsisoq KNR-imut oqarpoq.