Eqqartuussaq aqutsisuunerarluni niviarsiaqqanik atornerluisoq
Angut Kangaatsiap eqqaani Iginniarfimmioq 40-nik ukiulik, niviarsiaqqanut nukappiaqqamullu qulingiluanik ukiulimmut arlaleriarluni kinguaasiutitigut kannguttaatsuliorsimasutut pinngitsaaliisimasutullu pineqaatissinneqarpoq.
Angut taanna inatsit malillugu sakkortunerpaamik Aasiaanni Qaasuitsup eqqartuussiveqarfianni eqqartuussisunit isumaqatigiittunit pineqaatissinneqarpoq, tassa piffissamik killilersugaanngitsumik Danmarkimi Herstedvesterimi parnaarussassanngortinneqarluni.
- Arnanut inuusuttuaqqanut arfineq marlunnut nukappiaqqamullu qulingiluanik ukiulimmut kinguaassiutitigut atornerluisimasutut pineqaatissinneqarpoq. Taakku Aasiaat eqqaanni nunaqarfinni pipput, unnerluussisussaatitaasoq Tanja Søderlund oqarpoq.
Angutip 40-nik ukiullip ilaatigut inuusuttuaqqanut orninneqartartumi aqutsisuusaarluni ukiuni 2007-ip 2014-illu akornanni pinngitsaaliilluni atornerluisarsimavoq. Tamatuma nalaani inuusuttuaqqat ornittagaanniit nunattalu ilaanniit kommuniniit inuusuttuaqqat ilinniartissallugit perorsassallugillu pissarsiarisarsimavai kingornalu kinguaassiutitigullu atornerlullugit.
Sumiginnaasoqarsimavoq
Inuusuttuaqqat ornittagaanniit arlalinnit, Qeqqata Kommuniani Kommuni Kujallermilu allaffissornikkut aqutsisoqarnikkut sumiginnaasoqarsimasoq, unnerluussisussatitaasut malillugit suliami saqqummerpoq.
- Arlaleriarluni iluatsittumik inuusuttuaqqat ornittagaanni aqutsisutut tatigisatut imminut oqaatigisarsimavoq. Imminut oqaatiginera tatiginarpasinneralu peqqutaallutik inuusuttuaqqat ornittagaanniit niviarsiaqqanik pingasut 15-nit 16-nillu ukiulinnik pissarsisinnaasimavoq, taakkulu atornerluttarsimavai atornerloriartarlugillu, Tanja Søderlund oqarpoq.
Unnerluussisussaatitaasut erseqqissarpaat inuusuttuaqqat ornittagaasa kommunillu marluk angutip suliaminut uppernarsaatissaqanngiivissoq meeqqanik pissarsitsittarsimammassuk sakkortuumik sumiginnaanerusoq.
Martsimi ukioq manna angut 40-nik ukiulik tigusarineqarpoq, Aasiannilu Qaasuitsup eqqartuussivianit unnerluussutit 14-nini amerlanersaat tunngavigalugit ippassaq pisuutinneqarluni pineqaatissinneqarpoq.
- Eqqartuussivik unnerluussutitsinnut isumaqataavoq. Ilisimannittut nalunaajaatigisaat aammalu uppernarsaatit soorlu oqarasuaatikkut oqaloqatigiinnermiit immiussat nalunaajaatigineqartunut tunngavilersuutaasut pineqaatissiinermut tunngavigisimavaat, Politimestereqarfimmi unnerluussisussaatitaasoq Tanja Søderland taama oqarpoq.
40-nik ukiullip piffissamik killilersugaanngitsumik Danmarkimi pineqaatissinneqarnini eqqartuussutaasoq nangitsitsissanerluni ullut 14-nit eqqarsarfigissallugit qinnutigisimavaa.
