Angut 40-nik ukiulik sakkortunerpaamik pineqaatissinneqartoq
Angut Kangaatsiap eqqaani Iginniarfimmiu 40-nik ukiulik, arlaleriarluni kinguaasiutitigut kannguttaatsuliorsimasutut pinngitsaaliisimasutullu pineqaatissinneqarpoq.
Allattoq Hagen Højer Christensen
Angut taanna inuusuttuaqqat sukisaarsarfianni aqutsisutut tagiartuisartutullu imminut oqaatigisarsimavoq. Taamaaliornermigut niviarsiaqqat pingasut ilinniartitassatut pissarsiarisinnaasimavai, kingornalu atornerluttarsimallugit.
Tamatuma saniatigut nukappiaqqamik quligiluanik ukiulimmik pinngitsaaliisimasutut allatigullu kannguttaatsuliorsimasutut pineqaatissinneqarpoq.
Angut taanna inatsit malillugu sakkortunerpaamik pineqaatissinneqarpoq, tassa piffissamik killilersugaanngitsumik Danmarkimi Herstedvesterimi parnaarussassanngortinneqarluni.