Inuusuttoq socialisteq musliimiusoq New Yorkimi borgmesterinngortoq
Demokraatineersoq Zohran Mamdani New Yorkimi borgmesterinngorpoq.
Tamanna illoqarfimmi Amerikamiittumi millionilikkuutaanik inulimmi borgmesterimut qinersinerup aqaguani paasinarsivoq.
Qinigaaneq USA-p præsidentiata Donald Trumpip ajugaaffiginissaanut aqqutissiuussisuusoq Mamdani 34-nik ukiulik ajugaanerminut atatillugu oqalugiarnermini oqartoq, Reuters allappoq.
Trumpip muslimit inuusuttut socialistiusumik politikkiat sakkortuumik isornartorsiortarpaa.
- Donald Trumpip qanoq ajugaaffigineqarsinnaaneranik takutitsinissamut sumiiffimmik allamik pitsaanerusoqanngilaq. Tassaavoq illoqarfik pilersissimasaa sumiginnarsimasaalu, ajugaanerminut atatillugu isumaqatiginnitsiminut oqalugiarnermini oqarpoq.
- Politikkikkut taarsiorfimmi matumani New York qaamassaaq, nangilluni oqarpoq.
Trump qisuariartoq
Mamdani isumasiuinernit kisitsisit naapertorlugit qineqqusaaqataanut naleqqiullugu qinersinermi siuttuussangatsinneqareersimavoq.
Mamdani eqqaassanngikkaanni, demokraatit New Yorkimi guvernørerisimasaat Adrew Cuomo republikanererlu Curtis Sliwa qinigassanngortissimapput.
Demokraatit socialistiusut qinersinermi ajugaanerat, Donald Trumpimut inuit attaveqaataanni Truth Socialimi qaqutigoortumik naatsumillu qisuariartitsivoq.
- Tassami aallartiinnaqaaq (And so it begins!), Trump allappoq.
Mamdani illoqarfimmi ukiut 100-t sinnerlugit borgmesteriusarsimasut akornanni inuusunnerpaajusoq, AP allappoq. New York City-milu borgmesteriusimasuni muslimiusuni siullerpaavoq.
Nutaarsiassaqartitsivik naapertorlugu, New York City-mi 1969-imili borgmesterissamik qineqqusaartitsisarnerni, aatsaat taamak qinersisoqartigaaq. Qinersisut 2 millionit sinnerlugit peqataapput, illoqarfiup qinersimi ataatsimiititaliaa taama paasissutissiivoq.
Pisortat illoqarfimmi angallassissutaasa akeqanngitsumik ilaaffigineqarsinnaanissaat, meeqqat sapaatit akunnerinik arfinilinnik utoqqaassusilinnit tallimat tungaanut ukiullit akeqanngitsumik paaqqun´tarineqartarnissaat niuertarfiillu pisortanit ingerlanneqartut Mamdanip qineqqusaarutaasa ilagivai.
Trumpip Mamdani arlaleriarluni isornartorsiortarnikuuaa oqarlunilu Mamdani qinersinermi ajugaassappat New Yorkimut naalagaaffimmit tapersersuineq unitsissinnaallugu.
/ritzau/
