USA pillugu immikkut ilisimasalik: Ilulissani nalunaarut pillugu oqaloqatigiinnerup Trumpip nakkutilliinerulernissaanut tunngavississinnaavaa
- Issittumi Siunnersuisoqatigiit ataatsimiinnissaannut suna peqqutaagaluarpalluunniit, russit Kalaallit Nunaannut tikippata, tamanna Kalaallit Nunaanniit russinut tikilluaqqusinertut Trumpimiit saqqummiunneqarnissaa ilimagaara.
- Trumpip russit sunniuteqarnissaannik aarlerineranut tamanna tunngavissaqartitsilissaaq taamaalillunilu aamma amerikamiunit aqunneqarnissamik pisariaqartitsinermik oqariartuutaanut.
Taama oqarpoq Rasmus Sinding Søndergaard, Dansk institut for internationale studier-imi amerikamiut nunanut allanut tunngasunut politikkiannik ilisimatusartoq.
Ilulissani nalunaarutip Issittumilu sakkulersortoqannginnissaa uppernarsaqqinniarlugit Siumut Nalerarlu Issittumi nunat tallimat peqatigalugit - tassanilu amma Rusland, isumasioqatigiinnissamut ammaasserusuttut, KNR-ip tallimanngornermi saqqummiuppaa.
Aammattaaq Kalaallit Nunaata sakkutooqarnikkut nukittorsarnera peqatigalugu Ruslandimik oqaloqateqarniarnissaq isumassarsiaalluarsinnaasoq, Lundip universitetiani eqqissineq pillugu ilisimatusartoq Isabel Bramsen oqarpoq.
USA-mi killormut sunniuteqartoq
Joe Bidenip præsidentiunerata nalaani, USA-p Rusland oqaloqatigerusunngiivippaa.
Donald Trumpilli allaanerusumik siunnerfeqarpoq, eqqissineq anguniarlugu akeqqaminik oqaloqateqarsinnaanissani pingaartikkamiuk.
Naak Aleqa Hammondip Pele Brobergillu Ilulissani nalunaarut aqqutigalugu oqaloqatigiinnissaq sakkulersortoqannginnissaalu kissaatigigaluaraat, Rasmus Sinding Søndergaardip tamanna USA-miit kamassaarinertut paasineqarsinnaasoraa.
- Tamanna Kalaallit Nunaata Ruslandillu imminnut qanillattornerattut saqqummiutissallugu Trumpimut iluaqutaassaaq. Tamanna oqariartuutaanut sooq Kalallit Nunaannik aqutsilertariaqarneranut tunngavilersuutaalluassammat, Rasmus Sinding Søndergaard oqarpoq.
Oqartoqarsinnaava tamanna aamma Trumpimut eqqissinissamut neqeroorutaasoq, tassa uagut aamma taassumatulli oqaloqatiginnikkusutsigisugut?
- Kalaallit Nunaata tungaannit Ruslandimut assammik isaassineq Trumpip Ruslandimut assaminik isaassineranut eqqaanartinneqarsinnaasoq paasisinnaavara.
- Trumpip Kalaallit Nunaannik soqutiginninnera eqqarsaatigalugu pissutsinik atorluaaniarnissaa ilimanarpoq, taamaalilluni qeqertamut sunniuteqarnerminik nukittorsaaniarsinnaalluni.
Issittumi Siunnersuisoqatigiit siunissaat
USA-milli Ruslandimillu siunissami suleqateqarnermi Issittumi Siunnersuisoqatigiit pingaarutilimmik inissisimaffeqarsinnaasut, USA pillugu ilisimatusartoq erseqqissaavoq.
- Isumaqanngilanga Trumpip Ruslandip Issittumi Siunnersuisoqatigiinnut ilaasortanngoqqinnissaa akerlilersussagaa. Kalaallit Nunaata Ruslandillu suleqatigiinnerulernissaat akerlilersornerussagunarpaa.
Issittumi Siunnersuisoqatigiinni oqaloqatigiinneq aallarteqqinneqassappat, USA-p Ruslandi Kalaallit Nunaanni ataatsimeeqatigiumaaraa takorloorsinnaaviuk – kalluunnaveersaarfittut?
-USA Issittumi sakkutooqannginnissaanik oqaluttuarisaanermi tapersersuisuusimanngilaq. Tamanna nunanit avannarlerneersut tapersersugannaarivaat.
