Inuussutissarsiutigalugu piniarnermut allagartartaarnissamut malittarisassat sukannernerulissagunartut
![](/sites/default/files/styles/image_934x467/public/article_images/moskusokse_630_0_0.jpg?itok=bwTQiNq8)
Aallaaniarneq nuannarigukku inuussutissarsiutigalugullu aalisartunngorniaruit piniartunngorniaruilluunniit imaluunniit akiliisitsillutit piniariartitsisartunngorniaruit, taava taakkununnga malittarisassat allanngoratarnissaannut alaatsinaattariaqarputit.
Inuussutissarsiutigalugumi piniarnermut allagartartaarumasunut malittarisassat 2025-mi januaarip aallaqqaataani sukannernerulissasut, Naalakkersuisut siunnersuutigaat.
Inuussutissarsiutigalugumi piniarnermut allagartartaarumasut aalajangersimasumik najugalittut ukiuni tallimani Kalaallit Nunaanniissimasussaatitaasalissasut piumasaraat.
Ukiuni marlunni Kalaallit Nunaanniissimasussaatitaasut maanna piumasaqaataavoq.
Inuussutissarsiutigalugu aalisarnermut piniarnermullu allagartartaarumasut nunatsinni piniarnermik piniariaatsinillu misilittagaqartuullutillu ilisimannittuunissaat qularnaarumallugu inatsimmik allannguinissaq siunnersuutigigitsik, Naalakkersuisut allapput.
Siunnersuutaalli allamik aamma ilaqarpoq, tassa innuussutissarsiutigalugu piniarnermut immikkut allagartartaarumasunut piumasaqaatit aalajangersimasumik najugalittut Kalaallit Nunaanniissimasussaatitaanermut tunngasuusut aamma sukannernerulissasut siunnersuutigaat.
Nunami allami ilinniareerlutik, ilinniarnerminnut atatillugu suliffimmik misileereerlutik sulereersimallutilluunniit nunatsinnut angerlareernerminni inuussutissarsiutigalugu aalisarnermut piniarnermulluunniit aatsaavissuaq allagartartaarumasut tassani pineqarput.
Ukiumut isertitaasa affaat aalisarnermit piniarnermilluunniit isertitaqaataasimasuussasut
Piniarnermut aalisarnermullu inatsimmik allannguinissamik siunnersuutaat allanik aamma ilaqarpoq.
Tassami inatsimmik allannguinissamik siunnersuutaat akuerineqassappat, akiliisitsillutik assersuutigalugu takornarianik soorlu tammajuitsussarsiniarluni piniariartitsisartunut piumasaqaatit aamma nutartissapput.
Akiliisitsillutik piniariartitsisarumasut ukiumut isertitaasa affaat aalisarnermit piniarnermilluunniit isertitaqaataasimanissaat maanna piumasaqaataavoq. Akiliisitsilluni piniariartitsinermit isertitat ukiumut isertitanut aamma ilanngunneqartarput.
Akiliisitsillunili piniariartitsinermit isertitat ukiumut isertitanut ilanngunneqartarunnaartussaassapput, taamaammat akiliisitsillutik piniariartitsisartut ukiumut isertitaasa minnerpaamik affaat piniarnermit aalisarnermilluunniit isertitaqaataasimasussaatitaapput.
Akiliisitsillutillu piniariartitsisartut piumasaqaatinik naammassinninngippata, taamaaliorsinnaatitaanermut allagartartik annaasarpaat.
Inatsimmik allannguinissamik siunnersuut ukioq manna juulip 17-ianiit aggustip arfineq-pingajuata tungaanut tusarniaassutigineqarpoq.
Inatsimmillu allanngunissamik siunnersuut Inatsisartut ukiaru ataatsimiinneranni amerlanerussuteqartunit akuersissutigineqassappat, tamatuma kingorna atuutilissaaq.