Qanoq akileraartigisimavit? Tamanna akissutissarsisinnaalereerpat
Akileraartarnermut Aqutsisoqarfimmit marlunngornermi allagarserrappugut. Akileraarpallaarsimallutik utertoortussanut akileraarnikippallaarsimallutilluunniit ukioq manna akiliisussanngortunut ilaanerlutit aqutsisoqarfimmit allagarsianni takusinnaavat.
Inuit 8.500-ngajalluinnaat. Tassa siorna akileraarnikippallaarsimallutik akiliisussanngortut taama amerlatigisut, Akileraartarnermut Aqutsisoqarfik ilisimatitsivoq.
Taakkua ilagippatsit qanoq akiligassaqartiginersutit apeqqutaalluni naafferaanissannut isumaqatigiissusiornissannut arlalinnik periarfissaqarputit.
Akiligassat erniaasa akilertariaqannginnissaannut periarfissaqartoq
Akiligassatit 16.125 koruuninit ikinneruppata tamaasa ataatsikkut akilerukkit, taava erniaat 6 procentiusut akilertariaqanngilatit. Taamaaliunngikkaannimi akiligassat 18.000 koruuninut qaffassapput.
Akiligassatit 18.000 koruuninit amerlaneruppata taakkualu tamaasa ataatsikkut akilersinnaanngikkukkit, taava qaammatini pingasuni, tassa oktobarimi, novembarimi decembarimilu, naafferaatinneqassaatit.
Taakkunannga amerlaneroqisunik akiligassaruit pisortanulluunniit akiitsoqareeruit, taava Akileraartarnermut Aqutsisoqarfimmut aaqqiinissamik ikiortiserinnillutit attaveqaqquneqassaatit.
Siorna akileraarnikippallaarsimasunut ukioq manna akiligassiissutit katillugit 213,4 millionit koruuniusut, Akileraartarnermut Aqutsisoqarfik ilisimatitsivoq.
Inuit ilaat nuannaarutissaqartut
Siorna akileraarpallaarsimasut nuannaarutissaqarput, taakkuami 25.000-ngajalluinnaasuusut ukioq manna utertuussapput.
Taakkua utertoorutissaat kontuinut ikineqassapput. Nemkontoqanngitsulli akileraarutaasa sippuutaat uninngatikkallarneqassasut, inaarummik naatsorsuutit pillugit allakkani i Akileraartarnermut Aqutsisoqarfimmeersuni allaqqavoq. Pisortanut akiitsoqareersut akileraarutaasa sippuutaat akiitsuinut ilanngaataassasut sinneqarpatalu taakkua tunniunneqassapput.
Siorna akileraarpallaarsimasunut 25.000-ngajaasunut ukioq manna tunniunneqartussat katillugit 234,6 millionit kooruniupput. Taakkua akileraarutaasa sippuutaat aggustip ulluisa 29-anni tunniunneqassapput.
