Inuussutissarsiorsinnaanngikkallarnermi ikiorsiissutit suli nalornissutaasut – qaqugu tunniussisoqassava?
Silap pissusiata allanngoriartornerata kingunerisaanik inuussutissarsiorsinnaanngikkallartut ikiorsiissuteqarfigineqarnissaminnut qinnuteqarsinnaalersut naalakkersuisut nalunaarutigimmassuk nunatta avannaata kitaani aalisartut piniartullu juullinngitsiartut oqiliallalaarput.
Innuttaasut 300-nit amerlanerusut inuussutissarsiorsinnaanngikkallarnermi ikiorsiissutinik qinnuteqarput.
Ukiulli nutaap aallartinneranit ullualuit qaangiuttut qinnuteqartorpassuarnut suli aningaasanik ikiorserneqanngillat.
Tamannalu pakatsinartoq KNAPK-mi siunnersorti, Mikael Petersen oqarpoq.
- KNAPK-iminngaanniit ilungersunartutut tingullugu naalakkersuisunut politikerinut inatsisartunut kommuninut ingerlatitsinikuuvugut ikiorsiisoqarnissaa pisariaqarmat piaartumik suliareqqullugu. Kisianili massakkut tassa qinnuteqartut juullilersorli immersuereertut – massakkumut suli ataasinnguamilluunniit ikiorsiisoqarsimanngimmat tamanna assut kipiluttunarpoq, taanna oqarpoq.
Inatsisartuni Aningaasaqarnermut ataatsimiititaliap naalakkersuisut ikiorsiissutinik qinnuteqarsinnaanissamut periarfissiinissaq decembarip 14-iani akuersissutigaa. Erngertumillu ikiorsiisoqarnissaa neriuutigalugu tamanna pisoq, Aningaasaqarnermut ataatsimiititaliap siulittaasua, Asii Chemnitz Narup (IA) oqarpoq.
- Tassa oqaatigisariaqarpara aningaasaqarnermiut ataatsimiitsitaliap tungaaninngaanniit suliassarput manna pimooruterujussuaratsigut ilisimaarigatsigu silap pissusaata allanngorneratigut piniartut aalisartut savaatillillu eqqornerlunneqartut taamaattumik ikiorsiinissamik suliniuteqartoqarnera annertuumik tapersersorlugulu peqataaffigerusussimavarput, taanna oqarpoq.
Taamaammat naalakkersuisut qinnuteqaaterpassuit annerusumik angusimanngikkaat ugguutigalugulu kamaammissutigaa.
- Ajuusaarnartorujussuuvoq 2023-p naannginnerani periarfissatsialak manna qatangiinnartinneqarsimammat aamma akueriuminaappoq,
Attaveqaqatigiinnerup pitsaannginnera paatsuungatitsisoq
Asii Chemnitz Narupip suliaqarnermi tamarmi pitsaanerusumik attaveqaqatigiittoqarnissaa tamatuma saniatigut ujartorpaa.
Aalisarnermut Piniarnermullu Naalakkersuisoqarfik qinnuteqaaterpassuarnik isumaginnittoq Aningaasaqarnermut Ataatsimiititaliap aningaasat tunniunneqarnissaata akuerineqarnissaat suliassaraa. Aningaasaqarnermulli ataatsimiititaliap inuussutissarsiorsinnaanngikkallarnermut ikiorsiissuteqarnissamik aallartitsinissamut akuersissuteqareernermini kikkut imaluunniit qanoq annertutigisumik tunineqassanersut tusarfigeqqinngilaa.
- Naamik, ajoraluartumik aningaasaqarnermut ataatsimiitsitaliaminngaanniit suli tusagaqanngilagut, taamaallaat uagut aalisarnermut piniarnermullu naalakkersuisoqarfiup decembarilli 27-ani tusagassiorfitsigut nalunaaruteqarneratigut paasivarput aatsaat 2024-mi taanna periarfissaq qinnuteqaatigineqassasoq naalakkersuisut tungaanninngaanniit, Asii Chemnitz Narup oqarpoq.
Tamatuma saniatigut suliap ingerlanera tamarmi paatsuunganermik pilersitsisoq, taanna isumaqarpoq.
- Tassa maluginiassimavarput aningaasaqarnermut ataatsimiittitaliami inuiaqatigiinni aamma minnerunngitsumik qinnuteqarnissamut periarfissaqartut akornanni annertuumik nalornisoqarsimasoq. nalornisoqartillugu isumaqarpunga pisussaaffeqartoq annertuumik naallakkersuisoqarfimminngaanniit aamma naalakkersuisut paasissutissiilluassasut erseqqissuliorlutillu inuiaqatigiinnut.
KNAPK-p suliap ingerlanerani tamarmi aamma paatsuungassutigaa. Taakkumi ikiorsiissutit juullinnginnerani tunniunneqassangatikkaluarpaat.
- Tassa uagut nalunaarfigivaatigut suliat ingerlanneqartut aammalu suliat taakku naammasseriarpata ikiorsiissutit ingerlanneqarumaartut tassa soorunami neriutigilluinnaraluarparput sapaattuit qaangiutinnagit tamakku naammassineqarsinnaassasut. Ilaqutariit meerartallit soorunami qinnuteqarsimasut, taavalu aamma piniarnermut inuussutissarsiuteqartut aamma isorliunerusuni najugaqartut taakku juullertinnagu ikiorneqarnissaat naatsorsuutigineqarsimangaluarpoq, Mikael Petersen oqarpoq.
Naleraq: Naalakkersuisut ajornartorsiutaasumut aaqqiissuteqartariaqarput
Illuatungiliuttunit Naleqqap naalakkersuisut inuussutissarsiorsinnaanngikkallarnermut ikiorsiissutinut atatillugu suliaqarnerat aamma ilorrisimaarutiginngilaa. Ilorrisimaarutiginngivippaa.
Naleqqap siulittaasuata, Pele Brobergip inuussutissarsiorsinnaanngikkallarnermi ikiorsiissutinut atatillugu nalornisoqarnera ajornartorsiummut annerusumik takussutissiivoq: tassa naalakkersuisut silap pissusiata allanngoriartornerata kingunerisaanik ilungersuussinerat naammanngitsoq.
- Ajornartorsiut aaqqiivigissavarput, ajornartorsiuteqalernerit tamaasa matussusiigallaannarsinnaanngilagut. Takorluuisoqarsinnaanissaa pisariaqarpoq, taanna oqarpoq.
2024-mummi aningaasanut inatsimmit aningaasanik atuinissamut kingusinaartoqareersoq, taanna isumaqarpoq.
- Ajornartorsiut una nutaajunngilaq. Taamaammat naalakkersuisut ukioq manna aatsaat atuutilersinneqartussanik novembarimi decembarilu ikiorsiissusiornerat takorluuisinnaanngissuseqarneruvoq. Juullertinnagu iliuuseqarfigissagaat oqaatigaarput. 2024-mut aningaasanut inatsimmulli taamaaliortoqarsinnaanngilaq. Taamaammat qanorluunniit saatsikkaluarunikku ajornartorsiut iliuuseqarfiginngilaat. Ajornartorsiutit saamminnut illuartiinnarpaat, Pele Broberg oqarpoq.
KNR-ip Aalisarnermut Piniarnermullu Naalakkersuisoqarfik oqaaseqartinniarsarigaluarpaa, tassanngali tusagassiuutinut nalunaarut decembarip 27-aneersoq innersuussutigineqarpoq.
