Piniartoq: nammineq piumassutsiminnik ikiuukkumasut juullisiortippaativut

Savissivimmi piniartoq inuussutissarsiorsinnaanngikkallarnermini ikiorsiissutinik qinnuteqarsimagaluartoq suli akineqanngittuarsinnarpoq.

Allattoq Hansigne Broberg

decembarip 29-at 2023 11:25

Nunatsinni aalisartut piniartullu inuussutissarsiornerat qaammatini kingullerni inuussutissarsiorsinnaanngikkallarnerisa nalaanni pingaartumik juulleriartornerani ikiorsiissutinik pinissamut qinnuteqaataat suli akineqanngillat.

Taakkununnga ilaavoq, piniartoq, Olennguaq Kristensen. Taannami

aningaasanik qaammatini kingullerni marlunngulersuni isertitaqarsimanngilaq. Taamaammat Namminersorlutik Oqartussanut inuussutissarsiorsinnaanngikkallarnermi ikiorsiissutinik qinnuteqarpoq.

Ikiorsiissutinik qinnuteqarsinnaanermut periarfissaq Aalisarnermut Naalakkersuisoqarfiup decembarip qeqqata missaani nalunaarutigaat - maannamulli qinnuteqartut suli akineqanngillat.

- Soorunami tunineqanngitsoornerput uggornarpoq, sineriammiilli inunnit ataasiakkaanit juullisiutissatsinnit ukioq manna tunisillattaarpugut. Tamakkua ataasiakkaannguit tapiisut assut qujanarput, Olennguaq Kristensen oqarpoq.

INATSIT IMA PAASINEQASSAAQ:

Allannguutissatut siunnersuut akuerineqartoq naatsumik ima ilaqarpoq:

Innuttaasut, ilanngullugit aalisartut, piniartut nunalerinermillu inuussutissarsiutillit, silap pissusaanut tunngasut ajornartorsiortitsinerannik pissuteqartumik, inuussutissarsiutiminnik ingerlatsinerminni ajunaarnersuarmut assingusumik tassanngaannartumik eqqugaasut, aningaasatigut ikiorserneqartarnissaat siunertaralugu (…) aallarteqqinnissamut tapiiffigineqartarnerat pillugit inatsisip atuuttup allanngortinneqarneranik piviusunngortitsinissamik Naalakkersuisut peqquneqarnissaat pillugu Inatsisartut aalajangiiffigisassaattut siunnersuut.

Matumani pisut ajunaarnersuarmut assingusut ima paasineqassapput, pisut tassanngaannartumik siulittorneqarsinnaanngitsumik pisut, tamatumalu saniatigut suuallaanngitsumiunngitsoq annertussuseqassapput, tassa ajoqusiinerit najukkami inuiaqatigiit oqartussallu ulluinnarni isumalluutigisaannut qaangiisuullutik.

Assersuutigalugu savaatillip naatsiiat katersugassai siusinnerusukkut ilisimaneqanngitsumit imaluunniit uumasumit ajoqutaasumit silaannaap kissatsikkiartornerata nassatarisaanik nunatsinniilersimasumit tassanngaannartumik aserorneqarpata tapiissuteqartoqarsinnaassaaq.

Pisumili inuussutissarsiuteqartoq ataasiinnaq sunnerneqarsimappat tamanna tunngaviusumik ajunaarnersuarmut assingusumik pisoqarnera pineqarnavianngilaq.

Paasissutissarsiffik: Inatsisartut.gl

Allisiguk

Piniartut juullimut akissaqarnissaat nerisassaqarnissaallu anguniarlugit inuit ataasiakkaat namminneq piumassutsiminnik katersipput.

Aamma atuarukTobias Simigaq Qaanaameersoq isertitaqanngilaq – taanna inuussutissarsiorsinnaanngikkallarnermi ikiorsiissutinik maanna qinnuteqarpoq

Piniartut aalisartullu silap pissusiata allanngoriartorneranit aningaasarsiorsinnaannginnerisa nalaanni ikiorsiinissaq ukiortaap kingorna aatsaat atuutilertussaagaluartoq, juullinnginnerani tunniussisoqassasoq naalakkersuisoqarfik aalajangeraluarpoq. Maannamulli iliuuseqartoqanngilaq.

KNAPK-p Qaanaami immikkoortortaqarfiani Qaanaami nunaqarfiinilu inuussutissarsiutigalugu piniartut 80-it missaanniittut, ullormut aqqutaanilu isertitaqarniarlutik ilungersungaatsiartut siulittaasuuffigai. Taakkuli suli maannamut utaqqipput.

Aalisarnermut Piniarnermullu Naalakkersuisoqarfik ajunaarnersuartut ittumik pisoqartillugu - matumuuna silap pissusaata allanngornerata kinguneranik eqqugaasunut aningaasaateqarfimmut - qinnuteqaatinik 400-nik maannanut tigusaqarsimapput. Qinnuteqaatit nalilersuiffiginerat juulli sioqqullugu aallartinneqartut tamarmik immikkoqqissaaq nalilersorneqartussaapput. Pisortap tullia Pollas Lybrth ilisimatitsivoq, qinnuteqaatinik nalilersuinerup qaqugu naammassinissaa, qaqugulu agguaassisoqassanersoq suli oqaatigiuminaatsoq.

Allat aamma utaqqisut

Olennguaq Kristensen juullinnginnerani ikiorserneqassalluni isumaqarsimavoq.

- Tassa juullinnginnerani pissasoq neriorsuutigineqaraluarami taamaattoqanngilarli. Maani piniartut allat taakkununnga utaqqikatatttut nalunngilara. Juullinngitsormi naammassineqassasut kissaatigineqaraluartoq ikiorserneqaratali, piniartoq taama oqarpoq.

Nunatsinni piniartut aaliasartullu qaamatini kingullerni ilungersuuteqarput, aningaasanik isertitsinissaat ajornarmat. Taamaammat piniartut aalisartut savaatillillu arlallit Namminersorlutik Oqartussanut inuussutissarsiorsinnaanngikkallarnermi ikiorsiissutinik qinnuteqarput.

Aningaasanut inatsimmi aappaagumut pilersitseqqinnissamut ikiorsiissutinut 3,052 millionit koruunit immikkoortinneqarput. Ikiorsiissutit akuerineqartumut ataasiartumik ikiorsiissutitut tunniunneqartassapput, qinnuteqartumullu ataatsimut minnerpaamik 2.000 koruunit annerpaamillu 25.000 koruunit ikiorsiissutaasinnaallutik.

Sermitsiaq.AG allaaserinnippoq 2023-mi ulluni kingullerni qinnutigineqarsinnaasut 1 millionit koruuniusut. Nunatsinnilu sumiikkaluaruilluunniit ajunaarnersuartut ittumik pisoqarneranut ikiorsiissuteqarfigineqarnissat qinnutigineqarsinnaasut.

Olennguaq Kristensenip ikiorsiissutinik qinnuteqaatiminnik akissutisinissartik ikiorserneqarnissartillu piaartumik suliarineqassasoq kissaatigaa.

- Ikiorsiissutisssat maani piniartunit suli isumalluutigineqaraluartut utaqqiinnarneqaraluartullu nalunngilara. Neriuppunga piaartumik tunniunneqassasut,

Olennguaq Kristensen taama oqarpoq, nangillunilu:

- Tunniussisoqassappat piaakannernerusumik suliap ingerlanneqarnissaa kissaatiginaraluarpoq.

Nutaarsiassami kukkunermik nassaarsimaguit uunga allaffigineqarsinnaavugut.