Tobias Simigaq Qaanaameersoq isertitaqanngilaq – taanna inuussutissarsiorsinnaanngikkallarnermi ikiorsiissutinik maanna qinnuteqarpoq
Tobias Simigaq sikumit ningittakkerluni qaleralinniarsinnaanngilaq. Taanna KNAPK-p Qaanaami immikkoortortaqarfiani siulittaasuuvoq.
Tobias Simigarli qaammatini kingullerni sisamani ilungersuuteqarpoq. Imarmi sikunngilaq, taamaammat qaleralinniarsinnaanngilaq. Ajornerusumilli: Tobias Simigaq aningaasanik isertitsisimanngilaq. Taamaammat Namminersorlutik Oqartussanut inuussutissarsiorsinnaanngikkallarnermi ikiorsiissutinik maanna qinnuteqarpoq.
- Tassa ajunngilluinnarpoq, taamatut periarfissinneqarneq, taamatut silap pissusaata allanngorneranik soriarsinnaajunnaaqqalluni, taanna KNR-imut oqarpoq.
- Sila maannamut, una kangerlupput taamatut sikuniarnianngilluinnarmat manna kaperlaallutalu periaratta taamatut isertitaqarunnaarnikuugatta assut ilungersunarami.
Siku piffissaanngitsukkut aserortertoq
Aalisartut, piniartut savaatillillu inuussutissarsiutaat silap pissusiata allanngoriartorneranit eqqugaassagaluarunik ataasinngormamit inuussutissarsiorsinnaanngikkallarnermi ikiorsiissutinik qinnuteqarsinnaalersut aalisarnermut naalakkersuisoqarfiup ataasinngormat nalunaarutigaa.
Silammi kissatsikkiartornera silarluttarneralu innuttaasorpassuarnut pinngortitami sulisarlutillu inuussuteqartartunut eqquivoq.
Aaqqissuussaq ukiortaap kingorna aatsaat atuutilertussaagaluartoq decembarimi maanna atuutilersinneqarpoq. Tamanna pingaartumik Qaanaami qanittuanilu isorliusunerusuni Tunumilu aalisartut piniartullu imaata sikuunnginnera pissutigalugu aningaasarsiorluarsinnaannginnerannik pissuteqarpoq.
Tamannalu Tobias Simigap ilisimalluarpaa. Taassumami KNAPK-p Qaanaami immikkoortortaqarfiani Qaanaami nunaqarfiinilu inuussutissarsiutigalugu piniartut 80-it missaanniittut, ullormut aqqutaanilu isertitaqarniarlutik ilungersungaatsiartut siulittaasuuffigai.
- Saaffiginnillattaapput taamatut pisoqarnerani. Qanoq isiorsinnaanerlutik isertitaqarniarnermikkut taamatut ajorrnartorsiornerminni ikiorneqarsinnaanerlutik qanoq, taanna oqarpoq.
- Tassa massakkut kommunilu periarfissat taakku Naalakkersuisuninngaanniit saqqummiunneqartut suliarineqarput. Taakku qinnuteqarfissannguit qujanartumik takkussuunnikuugamik. Neriuppunga tamarmik pissarsitinneqarumaartut imaluunniit ikiorneqarluarumaartut.
Ilumoortuusuuppat sikusimappallu qaleralinniartussaagaluarpisi, aat?
- Suu, tassa sikuneraniit taamatut tunitsivinnguatsinni tunioraanerit ingerlasaraluarput. Kisianni ukiuni kingullerni ajornakusoorsiartorami assut taamatut qaleralinniarneq – una ikerput suli ingerlaaginnalernikuugami – neriuppuguut taamatut siku unerissasoq ukiup naannginneraniluunniit.
- Tassa uagut ilaqutariinnitsinni taamatut eqqugaasunut ilaavugut. Sulisartumik sanileqanngikkaanni immaqa taamatut ajornartorsiuinnersuit pisinnaapput. Uku qujanartarput sulisartunik ilaqutallit taamatut ataatsimut ikioqatigiinneq pigisaramikku, Tobias Simigaq oqarpoq.
25.000 koruunit tikillugit
Pinasuartumik ikiorsiineq pilersitseqqinnissamut ikiorsiinermik aamma taaneqartarpoq. Immersuillutit nammineq qinnuteqarsinnaavutit.
Aningaasanut inatsimmi aappaagumut pilersitseqqinnissamut ikiorsiissutinut 3,052 millionit koruunit immikkoortinneqarput. Ikiorsiissutit akuerineqartumut ataasiartumik ikiorsiissutitut tunniunneqartassapput, qinnuteqartumullu ataatsimut minnerpaamik 2.000 koruunit annerpaamillu 25.000 koruunit ikiorsiissutaasinnaallutik.
Sermitsiaq.AG allaaserinnippoq 2023-mi ulluni kingullerni qinnutigineqarsinnaasut 1 millionit koruuniusut. Nunatsinnilu sumiikkaluaruilluunniit ajunaarnersuartut ittumik pisoqarneranut ikiorsiissuteqarfigineqarnissat qinnutigineqarsinnaasut.