Tobias Simigaq Qaanaameersoq isertitaqanngilaq – taanna inuussutissarsiorsinnaanngikkallarnermi ikiorsiissutinik maanna qinnuteqarpoq

Qaanaap imartaa suli sikunngilaq, taamaammat aalisartut ningittakkersorlutik qaleralinniarsinnaanngillat.

Allattoq Christine Hyldal, Jaaku Lyberth

decembarip 20-at 2023 07:53

Nutserisoq Najaaraq Egede, Connie Fontain

Tobias Simigaq sikumit ningittakkerluni qaleralinniarsinnaanngilaq. Taanna KNAPK-p Qaanaami immikkoortortaqarfiani siulittaasuuvoq.

Tobias Simigarli qaammatini kingullerni sisamani ilungersuuteqarpoq. Imarmi sikunngilaq, taamaammat qaleralinniarsinnaanngilaq. Ajornerusumilli: Tobias Simigaq aningaasanik isertitsisimanngilaq. Taamaammat Namminersorlutik Oqartussanut inuussutissarsiorsinnaanngikkallarnermi ikiorsiissutinik maanna qinnuteqarpoq.

- Tassa ajunngilluinnarpoq, taamatut periarfissinneqarneq, taamatut silap pissusaata allanngorneranik soriarsinnaajunnaaqqalluni, taanna KNR-imut oqarpoq.

- Sila maannamut, una kangerlupput taamatut sikuniarnianngilluinnarmat manna kaperlaallutalu periaratta taamatut isertitaqarunnaarnikuugatta assut ilungersunarami.

Siku piffissaanngitsukkut aserortertoq

Aalisartut, piniartut savaatillillu inuussutissarsiutaat silap pissusiata allanngoriartorneranit eqqugaassagaluarunik ataasinngormamit inuussutissarsiorsinnaanngikkallarnermi ikiorsiissutinik qinnuteqarsinnaalersut aalisarnermut naalakkersuisoqarfiup ataasinngormat nalunaarutigaa.

Silammi kissatsikkiartornera silarluttarneralu innuttaasorpassuarnut pinngortitami sulisarlutillu inuussuteqartartunut eqquivoq.

Aamma atuarukAalisartunut, piniartunut savaatilinnullu silamik ajornartoorneq pillugu ikiorsissutinik qinnuteqartoqarsinnaalersoq

Aaqqissuussaq ukiortaap kingorna aatsaat atuutilertussaagaluartoq decembarimi maanna atuutilersinneqarpoq. Tamanna pingaartumik Qaanaami qanittuanilu isorliusunerusuni Tunumilu aalisartut piniartullu imaata sikuunnginnera pissutigalugu aningaasarsiorluarsinnaannginnerannik pissuteqarpoq.

INATSIT IMA PAASINEQASSAAQ:

Allannguutissatut siunnersuut akuerineqartoq naatsumik ima ilaqarpoq:

Innuttaasut, ilanngullugit aalisartut, piniartut nunalerinermillu inuussutissarsiutillit, silap pissusaanut tunngasut ajornartorsiortitsinerannik pissuteqartumik, inuussutissarsiutiminnik ingerlatsinerminni ajunaarnersuarmut assingusumik tassanngaannartumik eqqugaasut, aningaasatigut ikiorserneqartarnissaat siunertaralugu (…) aallarteqqinnissamut tapiiffigineqartarnerat pillugit inatsisip atuuttup allanngortinneqarneranik piviusunngortitsinissamik Naalakkersuisut peqquneqarnissaat pillugu Inatsisartut aalajangiiffigisassaattut siunnersuut.

Matumani pisut ajunaarnersuarmut assingusut ima paasineqassapput, pisut tassanngaannartumik siulittorneqarsinnaanngitsumik pisut, tamatumalu saniatigut suuallaanngitsumiunngitsoq annertussuseqassapput, tassa ajoqusiinerit najukkami inuiaqatigiit oqartussallu ulluinnarni isumalluutigisaannut qaangiisuullutik.

Assersuutigalugu savaatillip naatsiiat katersugassai siusinnerusukkut ilisimaneqanngitsumit imaluunniit uumasumit ajoqutaasumit silaannaap kissatsikkiartornerata nassatarisaanik nunatsinniilersimasumit tassanngaannartumik aserorneqarpata tapiissuteqartoqarsinnaassaaq.

Pisumili inuussutissarsiuteqartoq ataasiinnaq sunnerneqarsimappat tamanna tunngaviusumik ajunaarnersuarmut assingusumik pisoqarnera pineqarnavianngilaq.

Paasissutissarsiffik: Inatsisartut.gl

Allisiguk

Tamannalu Tobias Simigap ilisimalluarpaa. Taassumami KNAPK-p Qaanaami immikkoortortaqarfiani Qaanaami nunaqarfiinilu inuussutissarsiutigalugu piniartut 80-it missaanniittut, ullormut aqqutaanilu isertitaqarniarlutik ilungersungaatsiartut siulittaasuuffigai.

Aamma atuaruk Inatsisartut akuersisut: Aalisartut piniartullu silap pissusiata kingunerisaanik ajunaarnersuartut ittumik pisoqarnerani ikiorneqassasut

- Saaffiginnillattaapput taamatut pisoqarnerani. Qanoq isiorsinnaanerlutik isertitaqarniarnermikkut taamatut ajorrnartorsiornerminni ikiorneqarsinnaanerlutik qanoq, taanna oqarpoq.

- Tassa massakkut kommunilu periarfissat taakku Naalakkersuisuninngaanniit saqqummiunneqartut suliarineqarput. Taakku qinnuteqarfissannguit qujanartumik takkussuunnikuugamik. Neriuppunga tamarmik pissarsitinneqarumaartut imaluunniit ikiorneqarluarumaartut.

Ilumoortuusuuppat sikusimappallu qaleralinniartussaagaluarpisi, aat?

- Suu, tassa sikuneraniit taamatut tunitsivinnguatsinni tunioraanerit ingerlasaraluarput. Kisianni ukiuni kingullerni ajornakusoorsiartorami assut taamatut qaleralinniarneq – una ikerput suli ingerlaaginnalernikuugami – neriuppuguut taamatut siku unerissasoq ukiup naannginneraniluunniit.

- Tassa uagut ilaqutariinnitsinni taamatut eqqugaasunut ilaavugut. Sulisartumik sanileqanngikkaanni immaqa taamatut ajornartorsiuinnersuit pisinnaapput. Uku qujanartarput sulisartunik ilaqutallit taamatut ataatsimut ikioqatigiinneq pigisaramikku, Tobias Simigaq oqarpoq.

25.000 koruunit tikillugit

Pinasuartumik ikiorsiineq pilersitseqqinnissamut ikiorsiinermik aamma taaneqartarpoq. Immersuillutit nammineq qinnuteqarsinnaavutit.

Aningaasanut inatsimmi aappaagumut pilersitseqqinnissamut ikiorsiissutinut 3,052 millionit koruunit immikkoortinneqarput. Ikiorsiissutit akuerineqartumut ataasiartumik ikiorsiissutitut tunniunneqartassapput, qinnuteqartumullu ataatsimut minnerpaamik 2.000 koruunit annerpaamillu 25.000 koruunit ikiorsiissutaasinnaallutik.

Sermitsiaq.AG allaaserinnippoq 2023-mi ulluni kingullerni qinnutigineqarsinnaasut 1 millionit koruuniusut. Nunatsinnilu sumiikkaluaruilluunniit ajunaarnersuartut ittumik pisoqarneranut ikiorsiissuteqarfigineqarnissat qinnutigineqarsinnaasut.

Nutaarsiassami kukkunermik nassaarsimaguit uunga allaffigineqarsinnaavugut.