Aalisartunut, piniartunut savaatilinnullu silamik ajornartoorneq pillugu ikiorsissutinik qinnuteqartoqarsinnaalersoq

Ajunaarnersuartut ittumik pisoqartillugu 25.000 koruunit tikillugit ikiorsiissuteqarfigineqarnissamik ullumimit qinnuteqartoqarsinnaalerpoq.

Allattoq Christine Hyldal, Jørgen Semionsen

decembarip 18-at 2023 16:02

Aalisartut, piniartut savaatillillu silap pissusiata allanngoriartornerata kingunerisaanik, ajunaarnersuartut ittumik pisoqartillugu inuussutissarsiorsinnaanerat eqqugaassappat ikiorsiissutinik qinnuteqarsinnaalerput.

Aalisarnermut Piniarnermullu Naalakkersuisoqarfik tusagassiuutinut nalunaaruteqarpoq.

Aaqqissuussaq ukiortaap kingorna aatsaat atuutilertussaagaluartoq decembarimi maanna atuutilersinneqarpoq. Tamanna pingaartumik Qaanaami qanittuanilu isorliusunerusuni Tunumilu aalisartut piniartullu imaata sikuunnginnera pissutigalugu aningaasarsiorluarsinnaannginnerannik pissuteqarpoq. Immap sikua ingerlavigineqarsinnaanngikkaangat tamanna assersuutigalugu puisinniarnermut isumaqangaatsiartarpoq.

Aamma atuaruk Inatsisartut akuersisut: Aalisartut piniartullu silap pissusiata kingunerisaanik ajunaarnersuartut ittumik pisoqarnerani ikiorneqassasut

- Taakkua ilaat qaammatini sisamani aningaasarsiorsinnaasinnaanikuunngillat, Nikkulaat Jeremiassen oqarpoq, nangillunilu:

- Aamma eqqaamaneqassaaq novembarip aallaqqaataani akerliussutsimik takutitsigatta kinguartitseriaraluartut ukiumut tullermut, inatsisissaq eqqarsaatigalugu. Ajornartorsiut taanna massakkut piummat, massakkut iliuuseqarfigineqarnissaa kissaatiginikuuarput.

Ajunaarnersuit ajutoornerillu

Silap pissusiatami kissatsikkiartornera silapiluttarneralu innuttaasorpassuarnut pinngortitami sulisartunut inuussuteqartunullu isumaqangaatsiarpoq.

INATSIT IMA PAASINEQASSAAQ:

Allannguutissatut siunnersuut akuerineqartoq naatsumik ima ilaqarpoq:

Innuttaasut, ilanngullugit aalisartut, piniartut nunalerinermillu inuussutissarsiutillit, silap pissusaanut tunngasut ajornartorsiortitsinerannik pissuteqartumik, inuussutissarsiutiminnik ingerlatsinerminni ajunaarnersuarmut assingusumik tassanngaannartumik eqqugaasut, aningaasatigut ikiorserneqartarnissaat siunertaralugu (…) aallarteqqinnissamut tapiiffigineqartarnerat pillugit inatsisip atuuttup allanngortinneqarneranik piviusunngortitsinissamik Naalakkersuisut peqquneqarnissaat pillugu Inatsisartut aalajangiiffigisassaattut siunnersuut.

Matumani pisut ajunaarnersuarmut assingusut ima paasineqassapput, pisut tassanngaannartumik siulittorneqarsinnaanngitsumik pisut, tamatumalu saniatigut suuallaanngitsumiunngitsoq annertussuseqassapput, tassa ajoqusiinerit najukkami inuiaqatigiit oqartussallu ulluinnarni isumalluutigisaannut qaangiisuullutik.

Assersuutigalugu savaatillip naatsiiat katersugassai siusinnerusukkut ilisimaneqanngitsumit imaluunniit uumasumit ajoqutaasumit silaannaap kissatsikkiartornerata nassatarisaanik nunatsinniilersimasumit tassanngaannartumik aserorneqarpata tapiissuteqartoqarsinnaassaaq.

Pisumili inuussutissarsiuteqartoq ataasiinnaq sunnerneqarsimappat tamanna tunngaviusumik ajunaarnersuarmut assingusumik pisoqarnera pineqarnavianngilaq.

Paasissutissarsiffik: Inatsisartut.gl

Allisiguk

Taamaammat aalisartut, piniartut savaatillillu siunissami silap pissusiata allanngoriartornera pissutigalugu ajunaarnersuartut ittumik pisoqassagaluarpat imaluunniit silap qanoq inneranit aningaasarsiorsinnaanerat eqqugaassagaluarpat ikiorsiissutinik qinnuteqarfigisinnaasaminnik pilersitsisoqarnissaa ujartornikuuaat.

Inatsisartunimi amerlanerussuteqartut siunnersuut naalakkersuisunut inatsimmik atuuttumik allanngortitsisussanngortitsisussaq oktobarip 24-ani akueraat, taamaalillutik inuussutissarsiutigalugu aalisarnermik piniarnermillu inuussutissarsiuteqartut assersuutigalugu ajunaarnersuaqassagaluarpat imaluunniit ajutoortoqassagaluarpat pilersitseqqinnissamut tapiissuteqarfigineqarsinnaalissallutik.

Aamma atuarukNunatta avannarpasinnerpaartaani piniartut piniariarsinnaanngitsut

Inatsit taanna atuutereerpoq – silalli pissusiata allanngoriartorneranit pisut pissutsitut maanna aamma ilanngunneqassallutik.

Qaanaamiit, Savissivimmiit, Siorapalummiit, Kullorsuarmiit, Qeqertarsuarmiit aamma Kangersuatsiameersut aningaasanik ikiorserneqaqqullutik KNAPK aqqutigalugu qinnuteqarsimapput.

25.000 koruunit tikillugit

Pinasuartumik ikiorsiineq pilersitseqqinnissamut ikiorsiinermik aamma taaneqartarpoq. Immersuillutit nammineq qinnuteqarsinnaavutit.

Aningaasanut inatsimmi aappaagumut pilersitseqqinnissamut ikiorsiissutinut 3,052 millionit koruunit immikkoortinneqarput.

Ikiorsiissutit akuerineqartumut ataasiartumik ikiorsiissutitut tunniunneqartassapput, qinnuteqartumullu ataatsimut minnerpaamik 2.000 koruunit annerpaamillu 25.000 koruunit ikiorsiissutaasinnaallutik.

Sermitsiaq.AG-mi allaaserisaq naapertorlugu 2023-mi ulluni kingullerni qinnutigineqarsinnaasut 1 millionit koruuniupput. Nunatsinnilu sumiikkaluaruilluunniit ajunaarnersuartut ittumik pisoqarneranut ikiorsiissuteqarfigineqarnissat qinnutigisinnaavat.

- Naalakkersuisoqarfiup suleqatigineratigut saaffiginnissutit katersorneqassapput, qinnuteqaatillu suliarineqarlutik. Piniartunummi silap pissusiata allanngoriartorneranik eqqugaasunut ikiuerusuppugut, aningaasaqarnermut naalakkersuisoq, Erik Jensen (Siumut) KNR-imut oqarpoq.

Illit isummat pingaartittaqaarput. Nutaarsiassaq pillugu isorisat nersualaarinerillu uani tikilluaqquagut.