Inuuneritta aningaasanik agguaavoq

Pinaveersaartitsinermik peqqinnerulernissamillu najukkani suliniutinut, innuttaasut peqqinnerulernissaannik, taamalu Kalaallit Nunaanni inuunerup naleqassusianik pitsanngortitsisussanik siunertalinnut taperserneqarnissaannut Inuuneritta Pulje aningaasanik agguaassisarpoq, maannalu aamma taama pisoqarpoq.
Allattoq Jokum Nielsen
apriilip 24-at 2008 05:05

Ilaqutariinnermut Peqqissutsimullu naalakkersuisoq, Ark’alo Abelsen, aningaasanik kingumut agguaavoq. Qinuteqaatit 51-it katillugit 497.000 koruunit missaannik agguaassivigineqarput.

Taamaalilluni Nuuk, Qasigiannguit, Maniitsoq Paamiullu pinnguartarfinnik skateboardertarfinnilluunniit nutaanik pisaarnissamut aningaasaliiffigineqarput; Paamiut Qaqortullu kommuunii pujortartarnermik pinaveersaartitsinissamut aamma aningaasaliiffigineqarlutik.

Pisulluni ajaappissanut pisinissaminnut Qaqortup, Aasiaat Ilulissallu kommunii aningaasaliiffigineqarput. Meeqqanut tusarnaartitsinissamut Nuuk akissaqalissaaq, Narsami meeqqat angerlarsimaffiat angallatisisinnaanngorpoq, Saqqami Ilulissat kommunianniittumi nipilersuutinik pisiniarsinnaanngorput, taavalu Sisimiut kommunianni utoqqaat qimussimik angalaartinneqarnissaminnut qilanaarsinnaanngorlutik.

Aaqqissuussinerpassuarnut, angalaartitsinernut assigisaannullu, Inuuneritta Pulje-miit aamma aningaasaliisoqarpoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq