Qaqortup eqqaani pinngortitami nuna ikuallattoq: Innuttaasut innilerinermi mianersornissaat kaammattuutigineqarpoq

Qaqortup eqqaani pinngortitami nuna ikuallattoq akunnerit tallimangajaat ikuallareerluni ippassaq unnukkut nalunaaqutaq arfineq-pingasunngulersoq qaminneqarpoq. Ajutoorfiusumi aqutsisoq Karl Larsen taama oqarpoq, innuttaasullu asimi innilerinermi mianersornissaat kaammattuutigalugu.

Qaqortup eqqaani pinngortitami nuna ikuallattoq arsaattarfiit 15-it angullugit angissusaattut annertutigisoq taassuma oqaatigaa.

Qaqortup eqqaani pinngortitami nunap ikuallannera innuttaasumit tallimanngornermi unnukkut kalerriutigineqarpoq, ikuallaneralu ippassaq unnukkut tassa aatsaat qaminneqarsinnaasimalluni:

-  Aallaqqaammut ajunngikkaluarpoq, kisianni taava anorlilermat ajornakusoorsimmat qulimiguulik ikiortuliullugu qamisaaneq ualikkut nalunaaqutaq sisamat kingorna ingerlateqqipparput. Qulimiguullip ikiuutilerneratigut qamisaaneq sukkasoorujussuarmik ingerlalerpoq, kisianni qulimiguulik akunnerit pingasut missaanni qamisaavoq, ajutoorfiusumi aqutsisoq Karl Larsen KNR-imut taama oqarpoq.

Qatserisartut Qaqortumeersut sisamat, pingasullu Narsameersut qamisaapput. Qaqortup eqqaani pinngortitami nunap qanoq isilluni ikuallalersimaneranut suut pissutaanersut oqaatigissallugu siusippallaartoq taassuma oqaatigaa.

Kujataani nuna panertorujussuusoq ajutoorfiusumi aqutsisup oqaatigaa, nunallu Qaqortup eqqaani ikuallaffiusup piffissami qaninnermi nakkutigineqarnissaa pilersaarutaavoq, innuttaasullu innilerinermi mianersornissaat kaammattuutigineqarpoq:

- Asimi innilerinissartik imaluunniit pujortakkamik qamitsinerat mianersuutigeqqissaartariaqarpaat, Karl Larsen, ajutoorfiusumi aqutsisoq KNR-imut taama oqarpoq.