Ajunaarnersuarmi kalerrisaarut tusaaneqarsinnaanngilaq: Atortut nutaanngililluinnartut
![](/sites/default/files/styles/image_934x467/public/article_images/brian_thomsen.jpg?itok=V6M7n8F1)
Gassimik toqunartumillu aniasoqariasaassappat ajutoornernilu annerni atugassiaavoq.
Naatsumik oqaatigalugu innuttaasut peqqissusaannik navianartorsiortoqassagaluarpat ajunaarnersuarmi kalerrisaarut atorneqassaasoq, politikommissæri Kalaallit Nunaanni Politiillu pigaartuni aqutsisoq, Brian Thomsen nassuiaavoq.
Taamaakkaluartoq ajunaarnersuaqassagaluarpat kalerrisaarutit innuttaasunut tamanut anngunnatillu tusaaneqarsinnaassagunanngitsut, Kalaallit Nunaanni Politiit KNR-imut maanna ilisimatitsissutigaat.
Ajutoortoqarpat susoqassava?
Ajunaarnersuaqassappat, kalerrisaarut qaqugukkut ikinneqassanersoq, Kalaallit Nunaanni Politiit aalajangissavaat.
- Kalaallit Nunaanni illoqarfinni tamani ajunaarnersuarmi kalerrisaaruteqarpoq. Siggartaateqarneq qangali atugaavoq, Brian Thomsen nassuiaavoq.
Ajutoortoqassappalli Kalaallit Nunaannili Politiit kisimik tamakkiisumik akisussaasuunngillat.
Ajunaarnersuaqartillugumi qatserisartut, peqqinnissaqarfik, politiit Mittarfeqarfgiit minnerunngitsumillu kommuunit suleqatigiittarput.
- Qatserisartunik aggersaasoqarsinnaaniassammat qangali kalerrisaarusiissoqarnikuuvoq. Taava politiit aamma Innuttaasunut taassuminnga kalerrisaarisinnaapput. Kisianni inuiaqatigiinnut tamanut atugassiatut naatsorsuussaanngikkaluarput, Kommuneqarfik Sermersuumi upalungaarsimanermut pisortaq Jes Damgaard Andersen oqarpoq.
Kalerrisaarutit qanoq nipitutigisumik nipikitsigisumilluunniit nippatsinneqassanersut, napparutaallu qassiussanersut Kommuunit akisussaaffigaat, Kalaallit Nunaanni Politiit paasissutissiipput.
Taava politiit aamma tusagassiortunut attaveqassapput, taava KNR-p isiginnaarutikkut raatiukkullu immikkut ittumik aallakaatitsilisssaaq.
Politiillu tamatuma saniatigut innuttaasunik internetti attaveqarpat inoqatinut attaveqaatitigut paasissutissiisasut Brian Thomsenip aamma ilisimatitsissutigaa.
![](/sites/default/files/styles/image_934x467/public/article_images/sirene_0.jpg?itok=5NHUDcd3)
Innuttaasut imminnut kalerrerassapput
Brian Thomsenip oqarnera naapertorlugu inuit ilaasa kalerrisaarut tusaasinnaanngippassuk innuttaasut imminnut kalerrerarnissartik aamma akisussaaffigivaat.
- Naalaarniartariaqarput. Kalerrisaarut aallartippat innuttaasut aamma silamiissimagunik illup iluanut isernissamik taavalu inunnut allanut isernissaannik kalerriinissamik pisussaaffeqarput, Brian Thomsen oqarpoq.
Kalerrisaartip tusaaneqartuaannarsinnaannginnera maanna ilisivarsi, tamannal innuttaasunut akisussaaffiliinerujussuunngila?
- Aneriarluni innuttaasut kalerreqattaarneqarnissai pineqannginnami. Tamanna siunertaanngilaq. Oqaannarpunga nikorfaqatigiikkanni allallu tusaanngitsoorpassuk, taava ilisimatitsilaassaagut oqarluta: ”kalerrisaarut aallartippoq, iseriartoriarta”, Brian Thomsen oqarpoq.
Naqissuserpaali kalerrisaarutit innuttaasunik aajunaarnersuaqassagaluarpat kalerriiniarnermi ataatsimoortunik iliuusissanik pilersaarutini ilaaginnartut.
SMS-ikkut periuseqalernissaq pilersaarutaanngilaq
Ajunaarnersuaqartillugu kalerrisaarinerit Danmarkimi ukiumoortumik misilittarneqartarput. Ukioq mannalu maajip pingajuani misilittaanermi sms-i atorlugu periuseq nutaavissuaq aamma misilittarneqarpoq.
Danmarkimi innuttaasut kalerrisaarutip saniatigut, ajutoortoqartillugu pisortanit sms-isisisalerput.
Kalaallit Nunaannili pissutsit allaanerupput. Brian Thomsenip oqarnera najoqqutaralugu amerlaqisut suli oqarasuaammik atuinissamik periarfissaqanngillat, taamaasillutillu kalerrisaarut imaluunniit raatiu kisiisa isumalluutigalugit.
- Marlunnut avissimaqqissaarami. Tassami taanna (mobilitelefonit, aaqq.) politiit akisussaaffiginngilaat. Periarfissaqartuugaluarpat soorunami iluassagaluaqaaq.
Sms-imillu periutsinik aallarnisaasoqassagaluarpat, tamanna Kalaallit Nunaanni Politiit Tusass-imut nalunaarutigisassarigaat, Brian Thomsenip ilisimatitsissugaa.
Kalaallit Nunaanni Naatsorsueqqissaartarfik najoqqutaralugu Kalaallit Nunaanni ukioq 2020-mi oqarasuaatinik angallattakkanik atuisut 65.000-it sinnerpaat.
Mittarfimmi aasaq manna isumannaallisarluni mittoqarmat, Nuummi kalerrisaarutit kukkunikkut aallartinneqarmata, KNR-milu tusagassiortut ilaasa nammineq tusaagamikku politiinut nammineerlutik sianertariaqarsimapput.
- Paasissutissat ilai erngertumik ingerlateqqinneqanngippata soorunami qisuariarfigissavagut. Pineqartorpiaq ilisimasaqarfiginnginnakku maannarpiaq ajoraluartumik oqaaseqarfiginissaa ajornakusuulaarpoq. Taamali pisoqassappat erngertumik soorunami qisuariarfigissavarput, Brian Thomsen oqarpoq.
Ajunaarnersuaqartillugu innuttaasut ilaannit kalerrisaarutip tusaaneqarsinnaannginera tamannalu naammaginarnersoq pillugu KNR-ip Kommuneqarfik Sermersuumi borgmesteri Avaaraq S. Olsen attaviginiarsimagaluarpaa. Allaaaserisalli naammassineqannginnerani apersorneqarnissamut periarfissaqarsimanngilaq.