Naalakkersuisut PFAS-inik isumakululiutaasumik siumuinermut: Innutaasut maannakkorpiaq aqqutissiuutiinnarsinnaavagut
- Ittoqqortoormiuni innuttaasut nunattalu sinnerani nalussanngilaat Ittoqqqortoormiuni innuttaasut aavisa PFAS-imik akoqarpallaarnerat assorsuaq ilungersunartutut isigigakku, avatangiisinut naalakkersuisoq (IA-meersoq), Kalistat Lund, tusagassiutinut tallimanngormat ilaatigut taama allappoq.
Taama oqarneranu misissuinerup nutaap Illortoormiini najugallit quliugaangata qulinguluat peqqissutsimut ulorianartunik PFAS-eqarpallaartut takutitaa aallaaviuvoq.
Nunarsuarmioqatigiit iliuuseqarnissaat pisariaqartoq
PFAS-it nunatsinni ajornartorsiutaajunnaarsivinniaraanni, nunarsuarmioqatigiit immikkut ittumik iliuuseqartariaqartut, Kalistat lund nassuiaavoq.
- Nunarsuarmioqatigut kaammattorpagut PFAS-imik mingutitsinerup iliuuseqarfigineqarnissaa anguniartariaqaraat, taanna oqarpoq.
Tassamit PFAS-it, akoorutissaasut avatangiisinut opeqqissutsimullu ajoqusiisartut, silaannakkut immallu sarfaanik nunatsinnut apuuttarput, nerisareqatigiiaanilu akukilliartortarlutik. Tassa assersuutigalugu nannuni, puisini arfernilu, nunatsinni angerlarsiffippassuarni nerisarineqartuni.
Avatangiisit pillugit nunat tamalaat isumaqatigiissutaannut ilanngunniartut
Naalakkersuisulli allanut ilioqqusiinnanngillat.
Taakkuami Stockholmimi isumaqatigiissummik ilaatigut suliaqarput.
Stockholmimi isumaqatigiissutit inuit peqqissusaannut avatangiisillu akoorutissanut peqqissutsimut uloriaanaataasunut illersorniarlugit pilersitaavoq, tassuunalu
nunarpassuit akoorutissat POP-it, aamma PFAS-it ilanngullugit, piujunnaarsinniarlugit minnerulersinniarlugilluunniit sulipput.
Naalakkersuisut tamatuma saniatigut avatangiisinut iluaqutaasussanik arlalinnik suliaqartut, tusagassiutinut nalunaarummi atuarneqarsinaavoq.
Eqqakkanik Nuummi Sisimiunilu ikuallaavissualiorneq tamakkununnga ilaavoq, taamaaliornikkummi dioxinimik, eqqakkanik ikuallaanikkut aniasartumik, aniatitsineq nunani tamalaani piumasaqaatinut naapertuussarneqarpoq.
Paasisitsiniaaniartut
Tamakkua saniatigut Naalakkersuisut mingutsitsinermik millisaaniarlutik iliuusissaqangaanngillat, peqqissutsimut naalakkersuisoq (IA-meersoq), Mimi Karlsen oqarpoq:
- Aaqqiissutissaq tassatuaavoq nunat tamalaat mingutitsinerat malunnaatilimmik appartissallugu, Taanna oqarpoq.
- Maannamut iliuuserisinnaasarput tassaavoq innuttaasut paasissutissanik tuniorassallugit, taamaasillutik innuttaasut namminneq aalajangiisinnaanngortillugit qanoq iliornissaannik.
Tassalu Naalakkersuisut PFAS-ip aarlerinaatai pillugit innutaasunut paasissutissanik maanna suliaqarput..
Inuit ataasiakkaat kalaallit nerisannaavinnik nerinissamik nammineq aalajangernissamut naammattumik paasissutisaateqalernissat siunertaavoq.
