Nunatsinni eqqagassalerisarneq mingutsitsinngitsumik ingerlanneqartalissaaq- tamannali akikitsuinnaangilaq. ToqqorsivimmitAssi: KNR

Eqqakkanik ikuallaavittaassat 400 millionit koruunit pallillugit akeqassasut

Kommunit eqqaavilernermut tunngatillugu ”mumisitsiniarput". Sanaartornermullu aningaasartuutigineqartussat 400 millionit koruunit missaanniissapput.

Nunatsinni kommunit tallimaasut eqqaavilernermik ingerlatseqatigiiffittaamut ESANI A/S-imut, Nuummi Sisimiunilu eqqakkanik ikuallaavinnik marlunnik pilersitsillunilu ingerlatsisussamut,  2 millionit koruuninik aallarniutitut aningaasaliipput.

Nunatsinni eqqagassalerineq nukissiuuteqarnikkut pitsaanerusumik atorneqalissaaq avatangiisinullu ajoqusiinnginnerulluni, sanaartornissamullu aningaasarpassuarnik atuisoqassaaq, 400 millionit koruunit missaat aningaasartuutigineqassammata. ESANI A/S-imi pisortanngortussaq Frank Rasmussen taama oqarpoq.

- Eqqakkanik ikuallaavissat marluusut uuliakumillu katersuivissanut mikinerusunut pingasunut sanaartornermut aningaasartuutissat 400 millionit koruunit missaanniissapput, Frank Rasmussen oqarpoq.

AAMMA ATUARUK Kommunit eqqagassaleriffimmik ataatsimoorussamik pilersitsipput

Taassuma aamma erseqqissaatigaa kommunit eqqagassalerinermut tunngatillugu atortulersuutitigut annertuumik aningaasaliinissaat qanorluunniit pisussaareersoq.

- Eqqagassat eqqornerusumik isumagisinnaanissaannut annertuupilussuarmik aningaasaliisoqartariaqarnera killiffigineqareerpoq. Kommunillu ataasiakkaarlutik avatangiisinut tunngatillugu eqqortumik eqqagassalerinissaminnut eqqagassaataat naammanngillat, taamaammat kommunit eqqagassaatimik eqqortumik piiarnissaannut eqqakkat naammattut pigiumallugit katersorneqartariaqarput, pisortanngortussaq oqarpoq.

Eqqakkanillu ikuallaavissat ukiuni 30-ni atasinnaasussatut naatsorsuussaasut oqaatigaa, taamatullu aamma ukiuni taakkunani akilersorneqarsinnaassasut.

Kommuninit aningaasalersorneqassapput

400 millionit koruuninik aningaasalersuinissamut qaammatini tullerni pingasuni pilersaarusiortoqassaaq, kommunillu ingerlatseqatigiiffimmut aningaasaleeqqinnissaannik noqqaassuteqarfiginissaat pilersaarummut tassunga ilaavoq.

Eqqakkanillu ikuallaavinnik marlunnik ingerlatsineq ullumikkutulli akitsuutitigut aningaasalersorneqassaaq. Akitsuutillu taakku kommuninit pissarsiarineqassapput, kommunillu taakku innuttaasut suliffeqarfiillu akileraarusernerisigut pissarsiarissavaat.

- Akitsuutit ullumikkumut naleqqiullugit qaffasinnerunissaat naatsorsuutiginngilarput, Frank Rasmussen oqarpoq.

Ingerlatseqatigiiffiup allatulli sinneqartooruteqarluni ingerlanissaa siunertarineqanngilaq. ESANI A/S-ilu sinneqartooruteqassagaluarpat, imaassinnaavoq tamanna eqqakkanut akitsuutinik appaanermik kinguneqartoq. Ingerlatseqatigiiffiup isertitai aningaasartuutaalu oqimaaqatigiissinniarneqassapput, Frank Rasmussen taama nassuiaavoq.

Ukiuni tulliuttuni pingasuni annertuumik pilersaarusiortoqassaaq

Eqqakkanik ikuallaavittaassat marluk sanaartorneqarnerat 2022-mi 2023-milu naammassineqartussatut naatsorsuutigineqarpoq, naammassinissaasalu tungaanut allanik aamma naammassiniagassarpassuaqarpoq. Ilaatigut illoqarfinnit nunaqarfinniillu eqqakkat Sisimiunut Nuummullu nassiussornissaannut periaasissamik pitsaasumik nassaarniartoqassaaq.

- Aaqqiissutissat qanorlu akeqarnissaat pillugit assartuussisartunik maannakkorpiaq oqaloqateqarpugut. Aamma nukimmik pilersitatsinnik tigooraasussat Nukissiorfiit ataatsimeeqatigivagut, Frank Rasmussen oqarpoq.

Eqqakkanik tigooraaviit sumut inissinnissaat kommunit peqatigalugit aamma ataqatigiissarneqartussaavoq, taamaaliornikkut eqqakkanik ikuallaavinnut qitiusunut nassiussisoqannginnerani eqqakkanik tigooraaneq poortuinerlu eqqortumik isumagineqarniassammat.

Eqqakkanik ikuallaavittaassat assigiissapput tamarmillu immikkut eqqakkanik nalunaaquttap akunneranut 2 tonsinik naammassisaqarsinnaassuseqassallutik. Tamannalu Nuummi eqqakkanik ikuallaavimmut ukioq manna ukiunik 30-nngortorsiortussamut naleqqiullugu 20 procentit missaannik annertuneruvoq.

Assersuusiussagaannilu eqqakkanik ikuallaavissat marluusut Københavnimi eqqakkanik ikuallaavittaarsuup Amagerbakkip 100-riaataata missaanik mikinerussapput.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat