Kommunit eqqagassaleriffimmik ataatsimoorussamik pilersitsipput
- Ullumikkut illoqarfippassuit nunaqarfippassuillu kusanaatsortaqartarput. Tassaallutik eqqaavissuit ukiorpassuarni annertusiartortartut, tamannali allanngortinniarneqalerpoq.
Kommuneqarfik Sermersooq tusagassiuutinut nalunaarummi taama allappoq.
Nunatsinnimi kommunit tallimat ataatsimoorlutik eqqagassaleriffik ESANI A/S (Eqqaavilerineq Sulisoqarneq Atoqqiineq Nukissiuuteqaarnermilu Ingerlatseqatigiiffik) pilersippaat.
AAMMA ATUARUK Kommuunit eqqagassat aaqqiiviginiaraat
Ingerlatseqatigiiffittaap Nuummi Sisimiunilu ikuallaavissat ingerlatissavai.
Sineriammilu nunaqarfinnit illoqarfinniillu eqqakkat ikuallaavissanut assartorneqariarlutik ikuallanneqartarnissaat pilersaarutaavoq.
Eqqakkallu Nuummi Sisimiunilu ikuallanneqartalertussaagaluartut, illoqarfiit taakkua avataanni ullumi sulisut suliassaarunnavianngitsut, pisortaagallartutut atorfinitsinneqaqqammersoq, Frank Rasmussen, oqarpoq.
- Illoqarfinni mikinerusuni nunaqarfinnilu immikkoortiterinermut poortuinermullu sulisunik atorfissaqartitsiuassaagut, Frank Rasmussen tusagassiuutinut nalunaarummi oqaaseqarpoq.
AAMMA ATUARUK Eqqakkanut ajornartorsiummut ajornaatsumik aaqqiissutissaqanngilaq
Nalunaarut naapertorlugu eqqakkanik ikuallaariaasissaq avatangiisinut pitsaanerussaaq, ikuallaavissallu marluk aamma sipaartitsisinnaassasut, Frank Rasmussen isumaqarpoq.
- Ileqqaarutissaq tassaavoq nuna tamakkerlugu eqqakkanik ikuallaasarnikkut kissamik atorluaalersinnaagatta, taamaasillunilu naleqassutsinik annertusititsissalluni, Frank Rasmussen oqarpoq.
Tamatuma saniatigut erseqqissaatigineqarpoq, kommunit ilaat kommuninit allanit aningaasartuuteqarnerusassannginniassammata, aningaasartuutissat isertitassallu kommuninit tamanit assigiimmik avinneqartassasut.
Sisimiuni ikuallaavissap 2022-mi naammassineqarnissaa, Nuummiilu ikuallaavissap 2023-mi naammassineqarnissaa, naatsorsuutigineqarpoq.