Kommuunit eqqagassat aaqqiiviginiaraat
Nunatsinni ikuallaaviit aserfallassimapput ullutsinnullu naleqqukkunnaarsimallutik.
- Ukiuni arlalinngortuni ajornartorsiutaavoq. Maanna kommunet isumaqatigiipput naapilluni ataatsimut iliuuseqartariaqalersoq, Kommuneqarfik Sermersuumi Ingerlatsinermut Avatangiisinullu immikkoortortaqarfimmi pisortaq, Frank Rasmussen oqarpoq
Eqqagassat katersuuffii ikinnerulissapput
Ulluni makkunani kommunet sisamat sinniisaat Namminersorlutik Oqartussanut ataatsimoorussamik siunnersuusiorniarlutik Nuummi naapipput.
Frank Rasmussen isumaqarpoq siunissami ikuallaavinnik anginernik, pitsaanernik avatangiisinullu pitsaanerusumik peqalertariaqartoq.
- Ikuallaavissuarli ataasiinnaassanersoq arlaqarnerussanersorluunniit suli naluneqarallarpoq, uanga isumanni ikuallaavissuaq ataasiinnaq pitsaanerusoraara, Kalaallilli Nunaat tamakkerlugu ikuallaavissuit marluk takorloorneqarsinnaapput.
Eqqagassat Kalaallit Nunaanniiginnassapput
Eqqagassat Danmarkimukaattarnissaat siornatigut misissorneqarsimavoq, Kommuneqarfik Sermersuumilu Ingerlatsinermut Avatangiisinullu immikkoortortaqarfimmi pisortaq oqarpoq tamanna akisuallaarlunilu killeqassasoq.
AAMMA ATUARUK Manglende affaldshåndtering i bygderne
Frank Rasmussenilli ikuallaaneq nunatsinniitiinnarnissaa imminut akilersinnaanerunerarpaa, ikuallaanerlu aningaasartaqassanerarlugu.
- Nunatsinni eqqagassat ikuallaavinni nutaajunerusuni ikuallattarutsigit nukinik pilersitsissaagut taannalu ingerlatsinermut matussuseeqataasinnaasunik naleqarpoq, Kommuneqarfik Sernersuumilu Ingerlatsinermut Avatangiisinullu immikkoortortaqarfimmi pisortaq oqarpoq.
AAMMA ATUARUK Sermersuup illoqarfiinit nunaqarfiiniillu eqqagassat assartorneqartartut
