Nunaqarfiit ilaanni ulorianartunut eqqaavissaqanngilaq
Illoqarfiit tamarmik eqqakkanik ulorianartunik tigusinermi igitsinermullu atortorissaaruteqalersimapput.
Namminersorlutik Oqartussat illoqarfinni tamani kommuninut 14 millionit koruuninik siorna tapiissuteqarput, taakkualu ilaat eqqakkanik ulorianartunik suliarinnittarfinnik pilersitsinermut atorneqarput, aammali toqqorsivinnik nakkutigisaasunik pilersitsinissamut, anartarfilerissutissanut ikuallaavinnullu atorneqartussaallutik.
Qaanaaq Qasigiannguillu tigooraaviliornissamut siorna tapiiffigineqartut, taamaalillutillu kommunit illoqarfinni eqqagassanik ulorianaatilinnik tigooraaviit kingulliit sanallugit ingerlakkaat, avatangiisit pillugit naalakkersuisup akissutaani tamanna erserpoq.
Taassuma saniatigut Qeqqata Kommunia Kommuneqarfik Sermersoorlu nunaqarfimminni tigoraavinnut atortorissaarutisinissaminnut Namminersorlutik Oqartussanit tapiiffigineqarput.
Kisianni Qaasuitsup Kommuniani Kommune Kujallermilu nunaqarfiit eqqagassanut ulorianartulinnut atortorissaaruteqarnissaminnut suli amigaateqartut, avatangiisit pillugit naalakkersuisoq allappoq.
Tigooraaviillu kingulliit sananeqarnissaat 1,3 millionit koruunit missaannik akeqassasut, naalakkersuisup Mala Høy Kúkop Laura Tàunâjimmut akissummini oqaatigaa.
