Ilisimatooq: Eqqakkanut ajornartorsiummut ajornaatsumik aaqqiissutissaqanngilaq
Eqqagassanut ilisimatooq taama oqarpoq, eqqagassalli nunami sumiiffinni arlaqanngitsuni katersornissaannut isuma taperserpaa.
- Ikuallaavimmik ataatsimik marlunnilluunniit sananissaq tunngavigigaanni, taakkununngalu katersorlugit taava eqqagassanik ikuallaasarfinnik annerusunik pitsaanerusunillu peqartoqalissaaq, civilingeniøri nunatsinnilu eqqagassanik isumaginnittarnermut ph.d-lik, Rasmus Eisted oqarpoq.
AAMMA ATUARUK Kommuunit eqqagassat aaqqiiviginiaraat
Silaannaq salinneqarnerusinnaasoq
Eqqakkanik ikuallaavinni nutaani nunaqarfinni ikuallaaveeqqanit kitaanilu sineriammi illoqarfinni eqqakkanik ikuallaasarfinni mikinerusuusuni pitsaanerusumik silaannaq salinneqarsinnaassaaq.
Nunatsinnili eqqagassalerisarnermi avatangiisinut ajoqusiinnginnissamut ikiuutaasussaagaluartoq, kommunit siunnersuutaat ajoqutissartaqanngitsuunngitsoq, Rasmus Eistedip oqaatigaa.
AAMMA ATUARUK Uummannami eqqaavissuaq ulorianartumik pujuliortoq
Aaqqiissutaasoq nutaanik unammillernartortaqassasoq
Nunatsinni ikuallaavimmik ataatsimik marlunnilluunniit peqarnermi eqqagassat ungasissumut imaatigut assartorneqartariaqassapput.
- Kalaallit Nunaannut naleqqulluartumik aaqqiissutissaqanngilaq, innuttaasut siammarsimavallaarnerat aammalu teknologiit eqqagassalerinermut atortut eqqagassaqarluarnissaanik pisariaqartitsisarmata.
Nunatsinnilu innuttaasut 56.000-it missaanniittut naammattunik eqqagassaqanngillat.
Eqqagassat ajornartorsiutaanerat kommunit tallimat ataatsimoorlutik piginneqatigiiffimmik, nunatsinni tamarmi eqqagassalerisussamik, pilersitsineratigut siullertut Rasmus Eistedip aaqqiissinnaasoraa, kommunit ataasiakkaat taamaalillutik eqqagassaatitik kisimiillutik isumagissanngilaat.
- Eqqakkanut ikuallaavimmik tamani tamaani inunnit aqunneqartumik peqassasoq, kisianni taava eqqakkanut ikuallaaviit tamarmik ajunngitsumik ingerlanersut immikkut ilisimasammit alakkarneqartarlutik qulakkeerneqartassasut takorloorneqarsinnaavoq, Rasmus Eisted oqarpoq.