Air Greenland: Innermik anitsisoq juullikkunni angallannermut sunniuteqassanngilaq

Islandimi Grindavikip ungasinngisaani ataasinngornermi unnukkut innermik anitsisoqalerpoq.

Innermik anitsisoq Islandimi illoqarfiit pingaarnersaata Reykjavikkip kujasissortaaniittoq suli anitsivoq.

Reykjavikkimi nunanut tamalaanut mittarfeqarfia Keflavik innermik anitsisumit avannamut kippasissuani 15 kilometerit missaanni ungasitsigisumiittoq suli ammavoq, marlunngornermilu innermik anitsisoqarnera pissutigalugu taamaatitsiinnartoqarani.

Kalaallit timmisartuutileqatigiiffiata, Air Greenlandip Islandimi pisut qanimut malinnaaffigai.

Maannakkutullu isikkoqartillugu tamanna nunatsinni juullikkunni angallannermut sunniuteqassanngitsoq, Dash 8-mi timmisartortartut pisortaat, Henrik Steinbacher oqarpoq.

- Islandimi oqartussat sumiiffik orangeamik qalipaaserlugu nutarterpaat, tamanna innermik anitsisoqarneranik annikitsumilli arsaqarneranik isumaqarpoq. Taamaammat tamanna atlantikoq qulaallugu angallannermut imaluunniit nunatta iluani angallannermut sunniuteqanngilaq.

Arsaqaraluartoq timmisartuussisinnaasut

Reykjavikkip qeqertaasaani najugaqarfigineqanngitsuni ukiuni kingullerni arlaleriarluni innermik anitsisoqarpoq.

Islandimi qaqqap Eyjafjallajökullip 2010-mi marsip qaammataani innermik aniatitsimmat silaannarmi arsaqartorujussuuvoq, tamannalu Europap ilarujussuarni silaannakkut angallanermut ajoqusiingaatsiarpoq.

Air Greenlandimut taamani 10 millionit koruunit missarluinnaanik annaasaqarfiuvoq.

Nunatsinnut Danmarkimullu timmisartuussinerit unitsiinnarneqarnerisa saniatigut qulimiguulimmik timmisartuussinerit arlaqartut nunatsinni taamaatiinnartariaqartariaqarnikuusimapput.

Maannali tassunga killinnissaq naatsorsuutigineqanngikkallartoq, Henrik Steinbacher tusarfinnit innermik anitsinerup ukiortaap tungaanut annikilliartortoqarnissaanik paasisaqarsimasoq nassuiaavoq:

- Missiliuineq ajunngitsuuvoq, kisianni annermik anitsinerup qanoq ileratarsinnaanera naluarput, taanna oqarpoq.

Air Greenland Islandimi oqartussanit silaannarmi qanoq arsaqartiginera pillugu ingerlaavartumik paasissutissarsisartoq nassuiaatigaa. Timmisartuutileqatigiiffiit taakku tunngavigalugit timmisartumi qanoq akuerineqarsinnaaneranut malittarisassaqarput.

- Naak silaannarmi arsaqaleraluartoq timmisartuussinissatsinnut annertussusissamut suli killeqarpugut.

Ataasinngornermi innermik anitsineq Eyjafjallajökullimi innermik anitsisoqarnikuuneranut sanilliukkaanni silaannarmi arsaqalersitsisoqaqqinnissaanut aarlerinartoqartitsinngilaq.