Islandimi qaqqaq Grindavíkip kujasissuani innermik anitsilersoq

Islandip illoqarfiisa pingaarnersaannit Reykjavikimit kujammut qeqertaasami Reykjanesimi nunap ataasinngornermi sajuttaqattaarnerata kingorna qaqqaq innermik anitsilerpoq.

Islandimi silasiortut nunap sajuttarneranik aamma nakkutilliisut, Islandimi nutaarsiassaqartitsivimmut RÚV-mut taama ilisimatitsivoq.

Aalisartut illoqarfiat Grindavik Reykjavikip kujatinnguaniippoq, tamaanilu innuttaasut qaqqap innermik anitsilinnginnerani qimagussorneqalereerlutik.

Takornariat ornigarluartagaat Den Blå Lagune, Reykjanesimiittoq, taassuma saniatigut matuneqarallarnikuuvoq.

RÚV naapertorlugu qaqqap innermik anitsilinnginnerani nuna sajuttaqattaarpoq. Nuna sakkortunerpaamik sajummat Richterip nunap sajuttarneranik uuttuutaa naapertorlugu 4,2-tut sakkortutigisumik sajuppoq.

Reykjanesimi qaqqap Sýlingafellip innermik anitsinera, tusagassiorfiup RÚV-p nittartagaani toqqaannartumik malinnaavigineqarsinnaavoq.

Islandip silasiortuisa ningiuata Kristín Jónsdóttirip oqarnera naapertorlugu qaqqaq Sýlingafell innermik ippassaq unnukkut aqqarnup qiteqqunerata missaani anitsilerpoq, lavallu Grindavikip tungaanut sisoornissaa aarleqqutigineqarpoq.

- Qaqqat innermik taamatut anitsileraangata anitsinerup aallartinnerani sakkortunerpaakkajupput, sakkortuumillu maanna anitsisoq takusinnaavarput, akunnernilu tulliuttuni nakkutigiumaarparput, taanna RÚV-mut oqarpoq.

Reykjavikip mittarfia, qaqqap innermik anitsisup avannamut kippasissuani 15 kilometeritut ungasitsigisumiittoq, ammagallarpoq, angallannermilu suli taamaatitsiinnartoqarani.

- Angallanneq maannamut akornusersorneqanngilaq, tassa Keflavikimit aallartussat Keflavikimullu tikittussat akornusersorneqanngillat, mittarfiup nittartagaani atuarneqarsinnaavoq.

Reykjanesip qeqertaasaata inoqanngitsortaani qaqqat innermik ukiuni kingullerni anitsisarsimapput. Grindavikimit 10 kilometeritut ungasitsigisumi lava 2021-mi marsimi aamma sisoorpoq.