Innermik anitsineq peqqarniisaarnermit ajornartorsiortitsineruvoq

- Ajornartorsiorneq 2001-imi septembarip ulluisa aqqarnanniit annertunerujussuuvoq, IATA-mi pisortaaneq, Giovanni Bisignani nutaarsiassaqartitsivimmut Ritzauimut oqarpoq.

Europa qulaallugu angallannermik Europami naalakkersuisut inerteqquteqartitsinerat, Giovanni Bisignanip sakkortuumik aamma isornartorsiorpaa.

- Uani ajornartorsiutinut ima pulareertigaavut, naalakkersuisut silaannakkut angallannermut aqutsinerat naammagittaalliutigisinnaalereerlutigu, Giovanni Bisignani oqarpoq.

Europamiut timmisartuutileqatigiiffii arlallit sapaatip akunnerata naanerani ajunngivissumik misileraallutik timmisartuussereerput, aamma arsakut innermik anitsinermik qullaatsitai akulloqquallugit, apeqquserneqarsinnaalerporlu timmisartornissamik inerteqquteqarneq maanna ilumut pisariaqarnersoq.

Ajornartoorfik anigorniarlugu Europami angallannermut ministerit ullumi ataatsimiissapput, timmisartuutileqatigiiffiit ikiorsiissutinik tapiissuteqarfigineqassanersut ilaatigut oqaluuserineqassallutik.

Islandimi silasiorfimmit nalunaarutigineqarpoq qaqqaq innermik anitsisartoq, Eyjafjallajökull, sajoqqittaqattaartoq. Arsakulli innermik anitsinermit qullaattut kilometerinik marlussunnik taamaallat qutsitsigisumut killittartut, Islandimi silasiortut ilisimatitsissutigaat.

- Arsakut atsissorujussuarmiipput, kilomerillu marlussuinnaat qullaattarlutik, ujarassiooq Islandimi silasiorfimmeersoq, Hjorleifur Sveinbjörnsson, oqarpoq.

Qaqqaq sapaatip akunnera kingulleq anitseqqaarmat arsakut kilometerinik aqqanilinnik qullakaapput.