Innarluutillit illersuisuat: Taamaammat soraarniuteqarpunga
Inuit innarluutillit illersuisuannut, Christina Johnsenimut sapaatit akunnera pisoqarfioqaaq.
Taanna illersuisutut 2017-imi novembarimi atorfinippoq, ukiullu affaata matuma siorna Namminersorlutik Oqartussanut isumaqatigiissutaa sivitsorneqarluni.
Maannali naammatsippoq, Christina Johnsenip qinikkanit tusaaneqartannginnini qatsuppaa.
AAMMA ATUARUK Kommune til person med handicap: Hvor er dine venner?
- Qinikkanut taamannanik nalunaarusiortarpugut. Tusarnaarneqalaartarnissarput arlaatigulluunniit qisuarialaartoqartarnissaa kissaatiginarpoq. Ilaannikkut misiginartarpoq suliaq asuli suliaralugu qisuariartoqarneq ajormat, Christina Johnsen, soraarniuteqareernerminit ullut marluk qaangiuttut KNR-imut oqarpoq.
Sumi tamaani sullinneqarneq
Inuit innarluutillit illersuisuattut nunatta avannaarsuaniit kujataanut angalanikuuvoq. Taakkunani inuit innarluutillit ajornartorsiutaat uppernarsarlugit nalunaarusiarisarpaat.
Imatullu allannilinnik ilaatigut allaqqasoqarpoq: Qaanaami sullissineq arriippallaarpoq, inuit issiavinnik kaassuartakkanik ingerlatillit aqqusiniinnarmi sullinneqartarput taakkunannga atorneqarsinnaasuni kommunimut majuartarfeqanngippat.
Tiliup aamma Kommune Kujallermi angalanerminni uppernarsagaannut ilaapput init najukkat ajortut, piukkunnanngitsunik sulisoqarneq sulisussaaleqinerlu.
AAMMA ATUARUK Tilioq nutaamik illersuisussarsiussasoq
- Qinikkat siunnersornissaat suliassatta ilagaat. Kisianni tusaaneqanngikkaanni tamanna ajornartorujussuuvoq. Neriuppunga oqaaseqartartussaq nutaaq ajunnginnerusumik atugaqarumaartoq, Christina Johnsen oqarpoq.
Qinikkatut atuukkusunngitsoq
Illersuisuujunnaarneranulli aamma allanik peqquteqarpoq.
Nunatsinni inuit pisinnaatitaaffii pillugit oqaaseqarartut qinikkanit ataatsimoortikkusunneqarput. Tassani inuit innarluutillit, utoqqaat meeqqallu oqaaseqartartui ataatsimoortikkusunneqarlutik. Tamanna Christina Johnsenip peqataaffigisinnaanngilaa.
Tassunga siunnersuut akerlerineqaqisoq, naalakkersuisuusimasumit Anna Wangenheimimit (D) tunuartinneqarpoq.
- Siunnersuutip takkuteqqinnissaa ernumassutigisinnaavara, misigivunga tunuartikkallaannarneqartoq takkuteqqikkumaartorlu, Christina Johnsen ullumi oqarpoq.
AAMMA ATUARUK Inuit pisinnaatitaaffii pillugit siunnersuut isornartorsiuisoqareerneratigut unitsinneqartoq
Taava maannakkut sulerissavit?
- Pilersaaruteqanngilanga, aamma atorfimmut allamut qinnuteqarnikuunngilanga. Eqqissisimaaqqaalaariarlunga periarfissat suunersut takujumaarpakka.
- Pisinnaasakka amerlapput, eqqartuussivimmi illersuisutut aamma suliaqartarnikuuvunga. Kisianni aamma allarpassuarnik tunniussassaqartutut misigivunga.
Immaqa ilaat eqqarsarsinnaapput: Qineqqusaalertoq? Qinikkatut sulerusuppit?
- Naamerluinnaq. Qinikkatut piukkunnanngivippunga. Taamaammat naamik qinigassanngortinnissara eqqarsaatiginngilara.
