Inuit pisinnaatitaaffii pillugit siunnersuut isornartorsiuisoqareerneratigut unitsinneqartoq

Kattuffiit assigiinngitsut inuit pisinnaatitaaffiinut ataatsimiititaliamut kattunneqarnissaannut siunnersuut unitsinneqarallarpoq.

Naalakkersuisut taama paasissutissiipput.

Peqqinnissamut naalakkersuisoqarfiup siunnersuut decembarimili tusarniaassutigilerpaa. Taanna upernaamut ataatsimiinnissamut aappaagulu juulip aallaqqaataani atuutilertussatut pilersaarutaagaluarpoq.

Taamaattoqassanngilarli. Siunnersuummi taginnit isornartorsiorneqarpoq. Kingullertut tusarniaanermi akissutit 20-nit amerlanerusut nassiunneqarput.

AAMMA ATUARUK Siumup siulittaasortaava: Kattuffiit kattunnissaannik piumasaqarnikuunngilagut

- Tusarniaanermi akissuterpassuit atuarpakka, taakkunani suleqatigisartakkatta arlallit kissaatigaat siunnersuutip imarisaanut sunniuteqarsinnaanerunissartik, matuma ataani inuit pisinnaatitaaffii pillugit isumalioqatigiissitap ilusilersorneqarneranut sulineranullu. Tamanna soorunami tusarnaarusuppara, peqqissutsimut naalakkersuisoq, Anna Wangenheim (D) oqarpoq.

Illersuisut inuillu pisinnaatitaaffii pillugit siunnersuisooqatigiit inuit pisinnaatitaaffii pillugit ataatsimiititaliamut katersorneqarnissaannut siunnersuut Namminersorlutik Oqartussat namminneq siunnersuutigaat.

Siunnersuisooqatigiinni tassani innarluutillit, utoqqaat meeqqallu pillugit suliniaqatigiiffiit ataatsimoortinneqarnissaat siunnersuutigineqarpoq. Tassani ataatsimoorfimmik ingerlatsivimmillu nukittuumik pilersitsineq inuit pisinnaatitaaffiinik suliaqarnermut illersuillunilu siuarsaataassasoq, tunngavilersuutigineqarpoq.

AAMMA ATUARUK Siunnersuut Tiliumit isorineqartoq: Sipaarniarneruvoq

Taamali isumaqarneq innarluutillit illersuisuata isumaqatiginngilaa. Christina Johnsenip siunnersuut sipaarniarnerunerarlugu isornartorsiupallappaa.

Inuit Ataqatigiit – aamma Siumup siulittaasortaava, Erik Jensen siunnersuummut isornartorsiuipput.

Siumup siulittaasortaava kattussinissaq tapersernagu Siumup nittartagaatigut uissuummernartumik oqaaseqarpoq.

Taamaalilluni nammineq parteeqatini Naalakkersuisuniittut akerlilerlugit.

Taassuma siunnersuut suliffeqarfinni ataasiakkaani sulisunik soraarsitsisariaqarnermik kinguneqassasoq nalilerpaa.

Siunnersuullu maanna unitsinneqarpoq.

- Tusarniaanermi akissutit tiguneqartut tunngavigalugit aalajangerpunga, siunnersuut unitsikkallarneqassasoq, ilassutissat pitsaasorpassuit tiguneqartut aallaavigalugit siunnersuutip tulluarsareersimanissaata tungaanut. Tamatuma saniatigut illuatungerisat attuumassuteqartut tamarmik siunnersuutip tulluarsarneqarneranut peqataanissamut neqeroorfigineqassapput, naalakkersuisoq, Anna Wangenheim oqarpoq.