Siunnersuut Tiliumit isorineqartoq: Sipaarniarneruvoq
Inuit pisinnaatitaaffii pillugit siunnersuut tallimanngormat naalakkersuisunit saqqummiunneqarpoq.
Inuit pisinnaatitaaffii pillugit kommissionimik pilersitsisoqarnissaa naalakkersuisut siunnersuutigaat. Inuit innarluutillit, utoqqaat meeqqallu illersuisui tamarmik taassuma ataaniitsinneqarnissaat siunnersuutigineqarluni.
AAMMA ATUARUK Tusilartut nutserisussaqanngillat
Naalakkersuisut sullissiviit taaneqartut inuit pisinnaatitaaffiinik sullissivimmik arlaannaanulluunniit pituttorsimanngitsumut ataatsimut katersorneqassasut siunnersuutigaa.
Taakkununngalu tamanut aningaasat 12 millionit koruunit atugassatut illikartinneqarlutik.
Siunnersuut taanna inuit innarluutillit illersuisuanit Christina Johnsenimit Tusarluarneqarpallaanngilaq. Siunnersuut sipaarniarpallaarnerusoq, taanna isumaqarpoq. Taakkummi Tiliumit Mio-millu avinneqartussaapput.
- Imaassinnaasoq taamatut isornartorsiuininni assigiimmik pisussaaffeqateqarusunngitsutut nipeqartunga, suliffeqarfittalu maanna killiffia anguniarlugu ilungersorsimaqaagut, maannalu inatsisit malillugit suliassagut naammassisinnaalersimavagut, Christina Johnsen tusagassiuutinut nalunaarummi allappoq.
Aataatsimut aalajangiisoqartassaaq
Kommissioni pingasunik illersuisortalik, inunnit tallimanik ilaasortaqassaaq.
Taakku ataatsimoorlutik isumaqatigiissuteqarneratigut Kommissionip suliassai pingaarnersiorneqartassapput. Isumaqatigiinngissuteqartoqartilluguli kommissionimi siulittaasoq aalajangiisuusassalluni.
AAMMA ATUARUK Meeqqat illersuisuat innuttaasut peqqissusaannut suliniut pillugu: Tuppallissutigaara
Kommissæritut siulittaasoq ilaasortanut allanut sanilliullugu aalajangiisinnaassuseqarnerussasoq, inuit innarluutillit illersuisuat isumaqarpoq.
- Utoqqaat oqaaseqartartuat aamma inuit pisinnaatitaaffii pillugit siunnersuisoqatigiit maanna ima aningaasaliiffiginikittartigaat allaat sineriammut angalasinnaanatik imaluunniit paasisitsiniaasinnaanatik aamma misissuisinnaanatik. Maanna inuit pisinnaatitaaffii pillugit kommissionimi isumaqatigiittoqaqqaartariaqarpoq aningaasat qanoq atorneqassanersut, inuit pisinnaatitaaffiinik pitsanngorsaanerunngilluinnarpoq, sipaarniarnerinnaavoq, Christina Johnsen oqarpoq.
Siunnersuut aappaagu februaarip aallaqqaataani tusarniutigineqassaaq.
