Siumup siulittaasortaava: Kattuffiit kattunnissaannik piumasaqarnikuunngilagut
Inuit pisinnaatitaaffii pillugit illersuisut ataatsimoortinneqalernissaat Naalakkersuisut siunnersuutigaat.
Inuit pisinnaatitaaffii pillugit suliallit, tassalu innarluutillit, utoqqaat meeqqallu illersuisuisa ataatsimut kommissioniliuunneqarnissaat politikerit siunnersuutigaat.
Sullissiviit taakku inuit pisinnaatitaaffiinnik sullissivimmut arlaannaannulluunniit pituttorsimanngitsumut ataatsimut katersorneqarnermikkut nukittunerusumik suleqatigiissinnaassasut Naalakkersuisut isumaqarput.
12 millionit koruunit kommissioniliornissamut immikkoortinneqarniarput.
AAMMA ATUARUK Siunnersuut Tiliumit isorineqartoq: Sipaarniarneruvoq
Siunnersuut inuit innarluutillit illersuisuannit, Christina Johnsenimit tigulluarneqarpallaanngilaq. MIO-p, Tiliup utoqqaallu illersuisuata tapiissutisiarisartagaat sipaaruteqarniarfigineqartut taanna isumaqarpoq.
Peqqissutsimut naalakkersuisup, Anna Wangenheimip, sipaarniarnerunngitsoq oqaatigaa. Aningaasammi tapiissutisiarisartakkatik pisartagariinnassagaat, taakkulu allanngortinneqarnavianngitsut taassuma erseqqissaatigaa. Taamaattoq siunnersuut aamma allamit isornartorsiorneqarpoq.
Siulittaasup parteeqatini isumaqatiginngikkaa
Siumumi siulittaasunngorlaap Erik Jensenip Naalakkersuisut siunnersuutaat iluarinngilaa. Taassumalu partiiminit naalakkersuisoq isumaqatiginngilluinnarpaa.
Isumaqatiginngisaalu tassaavoq isumaginninnermut naalakkersuisoq, Martha Abelsen.
- Isumaginninnermut Naalakkersuisup Martha Abelsenip aammalu Peqqissutsimut Naalakkersuisup Anna Wangenheimip maanna ukiup naalernerani oqaluuserisassanngortitaannut Siumumit naammagisimaarinninnginnerput apuupparput, Erik Jensen Siumut nittartagaani allappoq.
Kattuffinnik ataatsimoortitsiniarneq soraarsitsinernik kinguneqassasoq taassuma nalilerpaa.
AAMMA ATUARUK Anna Wangenheim: Kattuffiit ataatsimoortilernissaat sipaarniarnerunngilaq
- Siunnersuutaat ilumoortumik sulisutsialappassuarnik soraarsitsineruvoq. Suliaat isaterneqalerput, minnerunngitsumillu qitiusumik aqutsiniarnermik aallaavilimmik atuutsitsiniaanerullutik. Imatullu isumaqartinniarneqarlutik; suut tamarmik kattunneqarpata aatsaat Naalakkersuisunut pitsaanerusumik siunnersuisoqarsinnaalissasut.
- Inuiaqatigiit qanimut oqartussaanerat maanna illersuisoqarnermi nukittoqqutigineqartoq peerniarneqarpoq, eqiterutsitsinikkut innuttaasut oqartussanut ungasinnerulernerannik kinguneqartussamik, Erik Jensen oqarpoq.
Siunnersuut ujartorneqarnikuunngitsoq sumilu tamaanngaaniit takkuttoq, taanna isumaqarpoq.
- Pingasunik illersuisoqarneq ingerlalluartoq kattutsinneqarnissaannik isumassarsiaq suminngaanniit pinngorsimanersoq takujuminaappoq, tamatumanilu Nunatsinni inuit pisinnaatitaaffiisa ataatsimiitsitaliaata ataanut inissinniarneqarpoq. Piviusunngussappallu naatsorsuutigineqassaaq qulaaniit aqutsineq
eqiterinerlu pingaartinneqarnerulissammat.
- Tamannalu isumassarsiaq Siumumit aallaaveqanngilaq soorlu aamma Naalakkersuisooqatigiit Siumut, Nunatta Qitornai Demokraatillu isumaqatigiissutaanni taamatut siunnerfeqarniarneq allassimanani, Siumup siulittaasua, Erik Jensen oqarpoq.
Anna Wangenheimip sulisunik soraarsitsisoqarnavianngitsoq siusinnerusukkut oqaatigereerpaa.
- Taamaammat angalanissartik kiffaanngissuseqarfigissavaat, sumut qaqugukkullu pisariaqartitsineq aallaavigalugu qanoq siunnerfeqartarumaarnersut. Tassa taanna namminneerlutik aaqqissugassarissavaat, Anna Wangenheim decembarip ulluisa 23-anni KNR-imut oqarpoq.
