Anna Wangenheim: Kattuffiit ataatsimoortilernissaat sipaarniarnerunngilaq
Nunatsinni kattuffiit inuit pisinnaatitaaffii pillugit suliaqartut suliffimmi ataatsimuulernissaat siunnersuutigineqarpoq. Naalakkersuisoq sapaatip akunnerata siuliani taama siunnersuuteqarpoq.
Siunnersuut inuit innarluutillit illersuisuannit tigulluarneqarpallaanngilaq, taassumami aningaasat ullumikkut pisartakkamik ikileriarnissaat ernumassutigaa. Peqqissutsimulli naalakkersuisup, Anna Wangenheimip (D), tamanna anguniagarinagu KNR-imut oqaatigaa.
- Sipaarniarneq naalakkersuisoqarfimmiit siunertaanngilaq. Aningaasat taakku ileqqaarneqarnikut aningaasanut inatsisissami suli taakkuupput aningaasat, aamma sipaarniarnermik aallaaveqanngilaq, Naalakkersuisoq oqarpoq.
AAMMA ATUARUK Siunnersuut Tiliumit isorineqartoq: Sipaarniarneruvoq
Inuit pisinnaatitaaffiinik suliallit kommissioneqalernissaat politikerit kissaatigaat, taakkuuppullu inuit innarluutillit - utoqqaat - meeqqallu illersuisui.
Naalakkersuisullu oqarnera naapertorlugu, pisinnaatitaaffiinik attuumassuteqartunik suliaqartut ataatsimuulernerminni pitsaanerusumik sullisisinnaanissaat anguniarneqarpoq.
- Takusinnaasimavarput, kattunneqarpata uku nukiit, suliniaqatigiit assigiinngitsutigut isummamikkut avitseqatigiinnermikkut inuit pisinnaatitaaffiinik tamakkiisumik qulaajaanissaminnik nukissaqarlutillu iliuuseqarsinnaanissaanik, taanna takorluukkatta annersaraa.
Kommissioni 12 millionit koruuninik aningaasaliiffigineqassaaq, kattuffiillu namminneerlutik aningaasat qanoq agguataassanerlugit aalajangissavaat.
Kattuffiilli aningaasat maanna pisartakkatik aannaanavianngilaat, taakkummi allanngortinneqassanngillat.
Inuit innarluutillit illersuisuata, Christina Johnsenip, aningaasat tunniunneqartussat kattuffiit pingasuullutik avittariaqartussanngussanerlugit ernumanini pillugu, siusinnerusukkut KNR-imut nalunaaruteqarpoq.
Kattuffiit aningaasat namminneerlutik aqussavaat
Taamaattoqarnavianngitsorli, Anna Wangenheim erseqqissaavoq. Sulisunillu soraarsitsisoqarnavianngitsoq taassuma ilanngullugu oqaatigaa.
- Taamaammat angalanissartik kiffaanngissuseqarfigissavaat, sumut qaqugukkullu pisariaqartitsineq aallaavigalugu qanoq siunnerfeqartarumaarnersut. Tassa taanna namminneerlutik aaqqissugassarissavaat.
Kommissionip allaffeqarfiata Nuummiinnissaa naatsorsuutigineqarpoq. Tiliulli Sisimiuni allattoqarfiata nuutsinneqarnissaa siunertarineqanngitsoq, naalakkersuisoqarfik erseqqissaavoq.
