Pinerluuteqarsimasunut inissiisarfinni sulisut akissarsiaat qaffanneqarpata qularnanngitsumik suliffigiumaneqarnerulissapput, parnaarussalerisut kattuffiat taama isumaqarpoq. Assi: KNR

Inissiisarfinni paarsisut aningaasarsiaqarnerulersinnaanerat nuannaarutigineqartoq

Danmarkimi parnaarussalerisut kattuffiata, danskit aningaasanut inatsisissaatigut aningaasaliisoqarneruneratigut, kalaallit inissiisarfinni paarsisut aningaasarsiaqarnerulersinnaanerat nuannaarutigaat.

Inatsisinut atuutsitsinermut susassaqarfiit nunatsinniittut danskit aappaagumut aningaasanut inatsisissaatigut immikkut 49,2 millioner koruuninik, ukiuni sisamani tulliuttuni agguarneqartussanik, aningaasaliiffigineqarput.

Tamannalu Danmarkimi parnaarussalerisut kattuffiata aamma Kalaallit Nunaanni Pinerluttunik Isumaginnittoqarfiup nuannaarutigaa.

- Nuannaarutigaarput parnaarussalerisut kattuffiata ukiup affaani kingullermi kimigiisernera kinguneqarmat. Pinerluuteqarsimasunut inissiisarfinni sulisut akissarsiaat qaffanneqarpata qularnanngitsumik suliffigiumaneqarnerulissapput. Tamannalu pisariaqartinneqarluinnarpoq, Danmarkimi parnaarussalerisut kattuffiata siulittaasua, Bo Yde Sørensen, oqarpoq.

Danmarkimi parnaarussalerisut kattuffiat naapertorlugu immikkut aningaasaliissutigineqartut 49,2 millioner koruunit politiit aamma pinerluuteqarsimasunut inissiisarfinni sulisut aningaasarsiaasa qaffaavigineqarnissaannut atorneqassapput.

- Tamatumalu saniatigut politiit, eqqartuussivinni suliani meeqqanut illersuisut aamma kinguaassiutitigut kanngutsaatsuliortarnerit nuna tamakkerlugu nalunaarsornissaannut suliniutit annertunerusumik aningaasassaqartinneqalerput, kattuffik taama allappoq.

Kisianni immikkut aningaaliissutigineqartut 49,2 millioner koruunit sumorpiaq atorneqassanersut suli qulakkeerneqanngilaq. Sumummi atorneqarnissaat inatsisinut atuutsitsinermut ministerimut isumaqatigiinniutigineqassapput.

AAMMA ATUARUK 49,2 millionit koruunit nunatsinni inatsiseqarnermut susassaqarfimmut immikkoortinneqartut

- Soorunami nuannaarutigaarput inatsisinut atuutsitsinermut susassaqarfiit nunatsinniittut immikkut aningaasaliiffigineqarmata, kisianni aningaasat qanorpiaq agguarneqarnissaat pillugu politikkikkut suli suliaqartoqarmat tamanna pillugu oqaaseqarsinnaanngilanga. Kisianni inernissaanut pissangalluta utaqqivugut, Kalaallit Nunaanni Pinerluttunik Isumaginnittoqarfiup pisortaa Naaja H. Nathanielsen oqarpoq.

Nunatsinniilli folketingimut ilaasortaatitat marluk sunik kissaateqarnerlutik qularinnginneruaat.

- Kalaallit Nunaanni politiit pineqaatissinneqarsimasunullu inissiisarfinni paarsisut aningaasarsiaat nalimmassarneqassapput, politiit amerlanerusut pisariaqartitsiviusuni, soorlu Tasiilami Nuummilu aqqusinerni pinaveersaartitsinissaannut atorneqassapput kiisalu eqqartuussivinni suliani meeqqanut illersuisoqarnissaa kissaatigaarput, Aaja Chemnitz Larsen oqarpoq.

Aki-Matilda Høegh-Dam (S) aningaasarsiat nalimmassarneqartariaqarnerannut isumaqataavoq.

- Inatsisinut atuutsitsinermut ministeri isumaqatiginninniarnerni Socialdemokraatinilu eqimattani ataatsimiinnerni qasseeriariarlunga oqaloqatigaara erseqqissaatigalugulu nunatsinni politiit inissiisarfinnilu paarsisut akornanni akissarsiatigut assigiinngisitsineq unitsinneqartariaqartoq. Isumaqatigiinninniarnerit maannakkut ingerlateqqilerpagut sapinngisaralu tamaat atorlugu naalagaaffimmi sulisunut atugassarititaassat naligiinnissaat anguniarniarpara, Aki-Matilda Høegh-Dam oqarpoq.

 

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat