Air Greenland timmisartornissamut billetseerniaqqilerpoq, Air Greenlandilli pisortaanerata Jacob Nitter Sørensenip oqarnera naapertorlugu timmisartuutileqatigiiffik taama pisoqaqqinnginnissaanik neriorsuisinnaanngilaq.Assi: Air Greenland / Lars Kleemann-Andersen

Ingerlariaqqinneq ajulertorpassuaqareersorlu: Air Greenland timmisartornissamut billetseerniaqqilertoq

Ilaasut amerlanerpaartaat timmisartuunneqartut, Air Greenland sapaatit akunnerata siulianili ingerlariaqqinneq ajulertorpassuaqareersorlu nalunaarpoq.

Air Greenland timmisartornissamut ullaaq manna nalunaaqutaq qulingiluanut billetseerniaqqilerpoq. 

Ilaasut 1000-t missaat sineriammi sumiiffinnit assigiinngitsunit sapaatit akunnerata siulianili ingerlariaqqinneq ajulerneranni billetseerniarunnaarallereerluni taamaaliorpoq.

Air Greenland pujornerujussua qulisimanerujussualu peqqutaallutik timmisartuusseriaannaasarsimanngilaq, ilaasullu ingammik Kangerlussuarmit ingerlariaqqinneq ajulertut amerlasiartorlutik.

Sapaatit akunnerata siuliata naaneranili ingerlariaqqinneq ajulertorpassuaqalerpoq, ilaasullu 1000-t missaat pujornerujussua peqqutaalluni sapaatit akunnerata siuliani ataasinngornermili ingerlariaqqinneq ajulerput. Taamaammat Air Greenlandip ilaasut ingerlariaqqinneq ajulertut ikiliartorniassammata billetseerniarnini juulip sinnerani unitsippaa.

AAMMA ATUARUK Anna ingerlariaqqinneq ajulertoq: Qanoq iliusissaarunnaqaaq

Air Greenlandip timmisartoq attartugaa tallimanngormat Kangerlussuarmiit Københavniliarpoq, ingerlariaqqinnerlu ajulersimasut timmisartuunneqareermata billetseerniaqqissinnaanngorluni, timmisartuutileqatigiiffik ilisimatitsivoq. 

- Sullitavut taamaatitsinernit eqqugaasut angalanissamik pilersaarummik nutaamik tunineqartussaapput, immaqalu aamma taanna arlaleriarluni allanngortinneqartariaqartassalluni, Imaluunniit angalanissamik pilersaarummik nutaamik sivisuumik utaqqisariaqartassallutik, taamaattumik billetseerniarneq matugallartariaqarsimavarput, Air Greenlandip pisortaanera Jacob Nitter Sørensen oqarpoq.

Akunniffissalimmut Nuuliaanneqartut

Angallattorpassuaqaleruttortoq nunatsinni sineriaap annerpaartaani pujorujussuaqattaarlunilu qulisimaqattaarpoq.

Coronavirusip tunillaassuunnera aasap siuliini marlunni ajornartoortitsereersorlu nunarput takornariaqarluaqqilerpoq. Nunatsinnilu takornariaqarfiunerpaasartumi Ilulissani akunnittarfinni inissat tamarmik inniminnerneqareerput. Ilaasut Ilulissaniit ingerlariaqqinneq ajulertut akunniffissaqarsimanngillat. Taamaammat taakkua ilarpassui akunniffissalimmut Nuuliaanneqarput.

AAMMA ATUARUK Kangerlussuarmi ulappunnersuaq: Uuttuut 1-miit 10-miippat uagut 9-miippugut

- Tamakku tamarmik saniatigut Dash-8-t timmisartuutitsinni arfineq marluusuni ataaseq taartissatut atortagarput angallassisinnaasimannngilaq teknikkikkut ajutooqqaneq peqqutaalluni. Tamakku tamarmik qanoq sukkatigisumik aaqqissuisinnaanissatsinnik nalornisippaatigut, taamannalu matusigallartariaqarnitsinnik kinguneqarpoq, taamaakkaluartoq inuiaqatigiinni pingaarutilimmik inissisimasut angalasinnaanissat mattunneqanngilaq, soorlu peqqinnissaqarfimmut tunngasut, Jacob Nitter Sørensen oqarpoq.

Neriuppugut taamaalioqqittariaqassanngitsugut

Air Greenland timmisartornissamut billetseerniaqqilerpoq, Air Greenlandilli pisortaanerata oqarnera naapertorlugu timmisartuutileqatigiiffik taama pisoqaqqinnginnissaanik neriorsuisinnaanngilaq.

- Sila iliuuseqarfigisinnaanngilarput maannamullu silap sivitsortumik pujornerata qanoq sunniuteqarsinnaanera takoreerparput, sualummik ilaasussat taama amerlatigitillugit. Neriuppugut taama iliuuseqaqqittariaqaleqqissanata, taanna oqarpoq.

Taassuma oqarnera naapertorlugu ingammik Atlantikoq qulaallugu aggustip aallartinnerani timmisartornissamut billetsit nungupput. Allanngortissinnaasunillu billetsillit angalanissartik siuartikkumasinnaajumaaraat, taanna neriuppoq naammagittaqusillunilu.

AAMMA ATUARUK Air Greenland timmisartuussillattaaqqilerpoq

Billetseerniaqqilernermi sullitani saaffgineqarnerunermik kinguneqartussaavoq, taamaattumillu akineqarnissaq pisarnermit sivisunerussalluni.

Angalatitsiviit aqqutigalugit billetsinik inniminniisimasut taakkununnga toqqaannaq saaffigeqquneqartut, Air Greenland nalunaarpoq.

- 2021-p affaa kingulleq angalasussat annertuserujussuarnerat takusinnaavarput, paasinarporlu, ukiummi aappaa avillugu angalanissamut killilersuutit atoreersimagatsigit. Ersarippoq sulli angalarusuttoqaqisoq, maannakkullu 2019-imi billetseerniarnermik killiffik qaangereerparput. Assigiinngitsunillu peqquteqarluta allanngorartitsinernik eqqugaasimavugut, sualummik ukioq upernaarlu silamik peqquteqarluta, aammalu massakkut aasap ingerlanerani, Jacob Nitter Sørensen oqarpoq.



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl