Air Greenland timmisartuussillattaaqqilerpoq
Sapaatip-akunnera Air Greenlandimut aalaruluffiusoq
Pujornerujussua peqqutaalluni timmisartuussinerit kinguaattoormata sinerissami inuit 1000-t sinnillit kanngipput. Maannali ilorraap tungaanut aallartoqarpoq.
Air Greenland ullumi 51-riarluni timmisartuussissangatinneqarpoq, Air Greenlandimi timmisartuussinernut ataqatigiissaarisoq Jørgen Andersen KNR-mut oqarpoq. Ilaasussalli Kangerlussuarmiit Narsarsualiartussat 70-t sapaatiuppat tungaanut utaqqisariaqarput, tamannalu timmisartussaaleqinermik peqquteqarpoq.
Air Greenlandip naatsorsuutigaa timmisartuussinerit 51-t ullumi naammassissallugit, Nuummili Maniitsumilu sila apeqqutaassaaq.
Ilaasussat 1000-t sinneqalaartut Kangerlussuarmiit Kastrupip timmisartoqarfianut ullumi timmissunneqassapput.
Ilaasussat 70-t Narsarsualiartussat sapaatiuppat aatsaat ingerlaqqissapput.
- Ilaasussat Københavniliartussat 150-t missaat kanngeqqasut maanna sinnerupput, taakkulu unnugu timmisartorsuarmut attartukkatsinnut ilaallutik aallassapput. Jørgen Andersen oqarpoq nangipporlu:
- Tassa ikiliartorusaarput. Nuummi Maniitsumilu sila unammillernalaaraluarpoq, maannakkorpiarlu ilaasussat tamarmik aallarsinnaaniassammata nikititerivugut, apeqqutaassaarli ualimut Nuummi allaaqqississanersoq, allaaqqissiartoraluarpormi.
Nuummi Maniitsumilu pujoq taamaaginnassappat Air Greenlandimut pilersaarusiornissaq eqqoriaruminaappoq, nangipporlu.
Nutaamik aaqqiissutissaqanngillat
Kangerlussuarmiit ullumikkut aallartut katillugit 600-niit 800-nut amerlassuseqarput. Jørgen Andersen ilisimatitsivoq timmisartuutileqatigiiffiup sila alaatsinaaqqissaaraa, taamalu sila taamaaginnassagaluarpat allatut ilioriarsinnaanerminnik maanna soqanngikkallarput.
- Taama pisoqassappat allatut ajornaqaaq. Suut tamaasa sillimaffigisinnaanngilagut, ajornarallarpormi. Sillimaffiginngisatsinnik pisoqariataassagaluarpat pisoq piumaarpoq aaqqiissutissamillu nassaarniapallakkumaarpugut, oqarpoq.
Tassa imaappa ullut kingulliit kinguaattoornerpassuit pereeraluartut suli qanoq ilioriaqqissinnaanermik sillimanngitsusi?
- Iluamik piareersaasiorsinnaasimanngilagut. Ima imalu timmisartut amerlatigisut pigaagut aammalu ima imalu amerlatigisut sulisoraagut, maannalu taakku tamaasa atorpagut.
Kangerlussuarmi ulaperujussuarneq pillugu qanimut sulisut KNR-mut ippassaq oqaluttuaraat Mittarfiup cafeteriaani sulisut cafeteriap inunnik ulikkaariasaarneratigut qanoq ulapitsigisimasut, allaallu hotelimi sulisut namminneq angerlarsimaffimminni errorsivii atorneqartariaqarsimasut suliffeqarfiup errorsiviata aserornera peqqutaalluni.
Ullumili Kangerlussuarmi sulisut akornanni qungujulanerulaartoqartoq Jørgen Andersen oqaluttuarpoq
- Kangerlussuaq ullup ingerlanerani inupparpassuarnik ulikkaaraluarpoq, taakku sinerissamiit Københavniliartussaapput aammalu illuanut ingerlaniartuullutik. Maanna silaannaq pitsaanerulerpoq inuimmi takusinnaavaat timmisartuussinerit ingerlaqqilersut, taanna oqarpoq.
Ulloq unnuarlu sullipput
Naak timmisartumik kinguaattoornerit arlaqarsimagaluartut tamanna Air Greenlandimut takornartaanngilaq. Maanimi sila ajorseriataartarmat suliffeqarfik tamakkuninnga misilittagaqarluarpoq, Jørgen Andersen oqarpoq.
- Siornatigut pisut taama ittut misilittagaqarfigiloortarpagut, ukiukkut ilaanni anorersuartumi tamakku pisarput, matumanili assut sualutsiarpoq tassami piffissaq manna aasarissuummat takornariarpassuaqarfiummallu Ilulissani Kangerlussuarmilu unnuisussarpassuaqarsimavoq.
Attuumassuteqartunullu tamanut unammillerfiusimaqaaq.
- Aallariartortarfinni sulisugut ulapinnersaapput, taakkumi ulloq unnuarlu ulapupput aallarniarlutik kanngittunik ikiuiniarsaralutik.
