Pujornerujussua weekendtimili nunatsinni timmisartuussinernut akornusiivoq.Assi: KNR

Anna ingerlariaqqinneq ajulertoq: Qanoq iliusissaarunnaqaaq

Uummannameersoq Anna Siegstad Danmarkimut feeriarluni ataasinngormalli aallartussaagaluarpoq, maanna neriuppoq ullumi aallarsinnaassalluni.

Air Greenland ajornartorsiuteqaqaaq. Pujornerujussua peqqutigalugu sinerissamiittut inuit 1000-t missaanniittut ingerlariaqqinneq ajulerput. Arlalippassuilli pujorunnaaminera iluatsillugu ingerlaqqipput – Kangerlussuarmili Air Greenlandimut ilaasussarpassuit kanngeqqasut amerliartuinnarput.

Aallarnaveeraluartunullu ilaavoq Uummannameersoq Anna Qvist Siegstad, taannami ataasinngormalli Danmarkiliarluni aallartussaagaluarpoq, aallanngitsoorporli.

Sumiiffiit kinguaattoorfiusut 
 
  • Pituffik
  • Qaanaaq
  • Upernavik
  • Uummannaq
  • Qaarsut
  • Ilulissat
  • Aasiaat
  • Qasigiannguit
  • Qeqertarsuaq
  • Sisimiut
  • Kangerlussuaq
  • Nuuk
  • Maniitsoq
  • Paamiut
  • Qaqortoq
  • Nanortalik
  • Narsarsuaq
  • Narsaq
  • Tasiilaq
  • Kulusuk
  • København

- Ataasinngormat Uummannamiit Ilulissanut aallartussanngorfitsinni sila ajoquteqanngilaq. Aallangajaliivittugullu nalunaarfigineqarpugut pingasunngornermi aatsaat Uummannamiit aallarsinnaasugut, Anna Qvist Siegstad oqarpoq.

-  Qanoq eqqarsariarpit tassani?

- Ilungersuummernaqaaq, Uummannatut ittumi avinngarusimasumi najugaqaraanni aallarniaraanni timmisartoq kisimi aqqutissaavoq, umiarsuimmi sinersortaatit Uummannamut anngunneq ajorput. Umiatsiaaqqamillu Ilulissiarniarutta piffissarujussuaq atortussaavarput aammalu taamaaliussagaluarutta orsussamut allanullu aningaasartuuteqaqqittussaavugut.

- Taama pisoqartillugu qanoq iliuusissaarunnarpoq, ukiummi affaa sinnerlugu feriarnissarput pilersaarusiornikuuarput, Danmarkimilu unnuiffissagut taamanili akilereerlutigit, taakkununngalu unitsitsissagaanni aamma akileeqqittoqartarpoq, tassalu imaappoq aallaqqaataaniit allanik unnuiffissarsiortariaqalerpugut.

Ilulissani nammineq unnuiffissarsiussapput

Ilaqutariit qulimiguulimmut ilaallutik Uummannamiit Ilulissanut ippassaq anngupput. Neriuutigaallu ullumi nal. 14.00-p missaani Kangerlussuarmut ingerlaqqissinnaassallutik ullullu ingerlanerani Danmarkimut ingerlaqqillutik. Ilulissaniinnerminnili namminneerlutik unnuiffissarsiortariaqarsimapput.

- Nammineq unnuiffissarsiortariaqartugut oqarfigineqarpugut, qulimiguulimmut ilaalluta ippassaq Uummannamiit aallarnissarput toqqassagutsigu. Periarfissarmi taanna toqqanngikkutsigu, sisamanngorpat aatsaat Danmarkimut apuutissagatta, Anna Qvist Siegstad oqarpoq.

- Qujanartumilli Ilulissani ilaqutaqarpugut unnuiffigisinnaasatsinnik.

AAMMA ATUARUK Air Greenlandip kanngittut kipiluttunartorsiorfigai

Ilaqutariit Ilulissani ilaqutaqarallartillutik unnuiffissamik iluatitsipput, Air Greenlandimi silamik peqquteqartumik sinerissami aallarneq ajulersunut unnuiffissaqartitsinngilaq, aamma illoqarfimmi takornariaqarfiusumi Ilulissani, takornariammi corona peqqutaalluni aasat marluk tulleriit nigorsimaareerlutik maanna uteqqipput.

Anna Siegstad Anna Siegstad

- Air Greenlandip timmisartumut ilaasussat unnuiffissaqarnissaat isumagai, tamannali aamma pilersaarusiornera unammillernangaatsiarpoq, pissutigalugu unnuiffiusinnaasut killeqangaatsiarput. Mittarfeqarfiillu suleqatigiiffigisatsinni suna tamarmi ilungersuanarpoq, pisortaq Jacob Nitter oqarpoq.

Ilulissanummi kanngittorpassuit pissutaallutik inissaqartitsiniarneq ajornakusooqaaq, taamaammallu Air Greenlandip ilaasussat ilai Danmarkimut ingerlaqqinnginneranni Nuuliarteqqaartariaqarsimavai.

Kangerlussuaq inunnik ujameriappoq

Kangerlussuarlumi aallariaqqinneq ajulertorpassuarnik eqqugaavoq, utaqqisorpassuarnimmi maanna ulikkaavippoq. Timmisartorsuarmimmi Københavniliaassisussamik pissarsiniarneq aamma ajornakusoorsimaqaaq.

Europami maannakkorpiaq timmisartorsuit atorneqaqaat, attartugassaaruteqqavugullu timmisartuutileqatigiiffik oqarpoq.

AAMMA ATUARUK Timmisartumut ilaasussat 1000-ingajaat aallarsinnaanngitsut

Air Greenlandimut qanoq oqarusussagaluarpit?

- Uummannamiit Qaarsuarsunnut helikopteriarannguamut taamaallaat ilaasoqarsinnaavoq, tassanngaanniillu Das 8-mut ilaalluni ingerlaqqittoqartarpoq. Helikopteriarannguarlu nutaaq aserortuukulasaqaaq, ajunnginnerussagaluarpoq qulimiguulimmik anginerusumik Uummannamiit Ilulissanut toqqaannarlugu timmisartuussisinnaasumik peqaraluarpat, pingaartumik aasaanerani, tassami imaakkajuttarmat Qaarsuarsuit pujorpat taava timmisartuussinissat tamarmik unittarput, Anna Qvist Siegstad KNR-mut oqarpoq.

Air Greenlandip timmisartumut ilaanissamut angalaffissanik juulip sinneranut tuniniaanini maanna unitsippaa.



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl