Inersimasut meeqqat pisinnaatitaaffiinik qularnaarissallutik ilinniaqqissapput
Isumaginninnermi pisortaqarfinnik ataatsimeeqateqarnermi meeqqat kissaataat pisariaqartitaallu tusaaneqassapput.
Taamak Naalagaaffiit Peqatigiit Meeqqanut Isumaqatigiissutaanni aamma meeqqat tapersersorneqarnissaannut inatsit 2017-imeersumi allaqqavoq.
Najortinik ikiorteqarneq periuseq pingaaruteqartoq qularnaarisuuvoq. Nuna tamakkerlugu meeqqanik illersuisoqartitsilluni aaqqissuussaq ‘Najorti’ aqqutigalugu, Kalaallit Meerartaanneersup Esther Arensip taakkua ilinniarsimasunngorsimanissaat peqataaffigai.
- Meeqqat kommunimik ataatsimeeqateqarnermi suna pineqarnersoq paasitilluarumallugit, Najortit meeqqat kissaataat pisinnaatitaaffiilu pillugit tusaaneqarnissannut qularnaarisuussallutik oqaaseqartartuupput, taanna oqarpoq.
Taanna suleqatini Britta-Marie Nielsen peqatigalugu Uummannameeqqammerput , Najortit pingasut ilinniakkaminnik naammassinnipput, taakkualu meeqqat kommunimi oqaloqateqarnerini kissaataannik pisariaqartitaannillu isumaginnittussapput.
Tamannami isumalerujussuuvoq. Uummannamimi siornatigut Najortinik sulisoqarnikuunngilaq. Avannaata kommuniami illoqarfiup avataaniit Najortinik attaveqartariaqartarnikuuvoq.
- Kommunit suliani meeqqat peqataatinneqaraangata attavigisartussaavaatigut. Meeqqallu Najorteqarnissartik pisariaqartikkaangassuk nittartakkakkut attaveqarnikkut ikiuuttarnikuuvugut. Kisianni kommunimut meeqqamullu, ataatsimiinnermi illersuisup peqataasarnera ajunnginnerusarpoq, Esther Arens oqarpoq.
Meeqqat tapersersorneqarnissaannut inatsit malillugu, ilaqutariit pillugit suliaqartoqartillugu, meeraq angerlarsimaffinni najugaqarpat, meeqqap Najorteqarnissi kissaatiginerlugu nammineq aalajangertarpaa.
Kommunip meeraq angerlarsimaffiup avataanut inissilersaarpagu imaluunniit inissinneqareersimappat, meeraq pisortanit ataatsimeeqateqarnissaanut Najortimik attaveqaateqartinneqassaaq.
Meeqqat ilai namminneerlutik attaveqartuusartut
Najortitut ilinniagaq, ilaatigut meeqqap kissaataanik naleqquttumik qularnaarinissamut, pisinnaatitaaffinnik inatsisinillu ilisimasaqalernissamik imaqarpoq.
Kommunimik ataatsimeeqateqalinnginnermi Kalaallit Meerartaata suliaq tigusarpaa, taamaaliornikkut Najortip suliami tassanerpiaq inatsisit pisinnaatitaaffiillu suut eqqumaffigissanerlugit piareersarsinnaaqqullugu.
Najortip meeqqap ukiuinut naleqqussarlutik pisortat oqaasii inatsisillu pillugit nutserinissaannittaaq ilinniartinneqartarput, soorlu meeqqat pissusilersuutaannut paasinninnermik aamma meeqqami kingunerluutaasimasinnaasunik isumaginnissinnaanermik ilinniartinneqartartut.
- Najortip suliat assigiinngitsorpassuit peqataaffigisarpai. Suliaq qanorluunniit ikkaluarpat, ataatsimiinnginnermi Najortip meeraq oqaloqatigisarpaa, taamaalilluni kommunimik sooq ataatsimeeqateqalernerlutik sumullu tunnganersoq meeraq nassuiaanneqartarpoq, Esther Arens oqarpoq.
Aamma ataatsimiinnerup kingorna, Najortip meeraq ataatsimiinneq qanoq ppissarsiaqaatigisimaneraa alloriarnerullu tullia qanoq ikkumaarumaarnersoq pillugit oqaloqatigisarpaa.
- Meeqqat najorteqarneq pillugu siornatigut ilisimasaqarneq ajorput, Esther Arens oqarpoq.
Kisianni meeqqat pisinnaatitaaffitik, taamatuttaaq inersimasumik tapersersorneqarsinnaanertik pillugit ukiuni kingullerni ilisimasaqarnerulernikuupput.
- Ilaatigut meeqqat nammineerlutik attavigisarpaatigut. Meeqqanut inissiisarfimmiit sianersinnaasarput, qanoq aqqusaagaqarsimanertik imaluunniit inissisimaffitsik oqaluttuaralugu, Esther Arens oqarpoq.
Taamaaliortoqarnerusinnaavorlu, kisianni Kalaallit Meerartaata oqarasuaataat ulluinnarni nalunaaqutaq arfineq-pingasuniit sisamat tungaanuinnaq ammasarpoq.
Taamaammat meeqqat najorteqarnissamik pisariaqartitsinerat eqqumaffiginerulerusullugu, peqatgiiffiup Tusaannga suleqatigilerpaa.
Meeqqanut najortit amerlanerulissasut
Inersimasut meeqqanut najortitut ilinniarsimasut nuna tamakkerlugu 50-it missaanniipput.
Isumaginninnermik Aqutsisoqarfiup Kalaallit Meerartaat suleqatigalugu, illoqarfiit sorliit meeqqanut najortinik pisariaqartitsinersut nalunaarsuipput. Ilaatigut Qasigiannguani Narsamilu maajimi juunimilu meeqqanut najortitut pikkorissaasoqassaaq, ukiamullu Tasiilami pikkorissaasoqarnissaa pilersaarutaalluni.
Isumaginninnermi pisortap meeqqanut najortiuneq pillugu pikkorissaaneq kommunini taaneqartuni ussassaarutigaa, taamatuttaaq Kalaallit Meerartaat inoqatinut attaveqaatitigut ussassaaraluni. Illoqarfinnilu taakkunani pingasuni pikkorissaanerit meeqqanik najortinik qulinik ilaneqarnissaat qulakkeerinissaat naatsorsuutigineqarpoq.
Najortilli amerlanerusinnaapput, meeqqanummi najortit piffissaq tamaat suliallu tamarmik piffissaqarfigiuaannanngilaat.
Taamatuttaaq nunatsinni kommunini suleqatigiinneq suli qaninnerulersinnaasoq, Esther Arens oqarpoq.
- Angalagaangatta kommunit atuarfiillu ataatsimeeqatiginiartuaannarpagut, qanimummi suleqatigiilluarnissarput kissaatiginerpaagatsigut.
Tamannalu pingaaruteqarpoq, peqatigiiffiummi Kalaallit Meerartaata meeqqanut najortit attavigineqartannginnerat ilaatigooriarluni aqqusaartarpaa, immaqa isumaginnittup pineqartumik qanigisarinninnera imaluunniit attaveqatiginnilluarsinnaannginnera pissutigalugu.
- Qanigisarinninneq imaannaanngissinnaasarpoq. Imminut eqqarsaatigineq, meeqqallu pisariaqartitaanik eqqarsaatiginninnginneq unammillernartuuvoq. Tamannalu ungasillisariaqarparput, Esther Arens oqarpoq.
