Ilinniartut: Meeqqeriviit aaqqiivigineqarpata meeqqiornissaq orniginarnerussaaq
Nunatsinni meerartaarnissap orniginassusaa pillugu Ilisimatusarfimmi ilinniartut KNR-imiit paasiniaaffigaagut.
Meeqqerivik aaqqiivigineqartariaqartoq arlallit oqaatigaat.
Ilisimatusarfimmi bacheloritut ilinniarnissamut periarfissat 12-it, kandidatitut ilinniarnissamut periarfissat tallimat, ingerlaqqiffiusinnaasumik ilinniarnissamut periarfissat kiisalu ph.d.-nngorniarnissamik periarfissaqarpoq.
Allattoq Steve Pedersen Hinrup
apriilip 25-at 2025 14:32
Nunatsinni 2049-mi kalaallit innuttaasui 10.000-it missaliorlugit ikilillutik 46.390-nnanngornissaat, Nunatta Naatsorsueqqissaartarfiata naatsorsuutigaa.
Nunatsinnilu meeqqiornissaq qanoq orniginarnerulersinnaanersoq ilinniartunut isumasiuinitsinni isummat assigiiffeqaqaat.
Meeqqat atugaat pitsanngorsagassaasut, pinngortitarli ilaqutariinnut inuuneritsitsisinnaasartoq, inuiaqatigiilerinermi kandidatinngorniaq, Ivalo Olsen isumaqarpoq:
- Meeqqeriveqarfiit atuarfeqarfiit immaqa appasissooq, kisianni pinngortitaq, aput taavalu ilaqutariittut ataatsimoorsinnaaneq eqqarsaatigalugu qaffasinnerulluni, tanna oqarpoq.
Peqqissaasunngornialli, Julia Biilmannip marlunnik meeraqarami perorsaasut aaqqiivigineqartariaqartut isumaqatigaa:
- Una apeqqutaanerpaangami meeqqeriveqarfiit annikinnermut, meeqqerivimmi sulisut ilinniarsimasut ikippallaarlutik. Vikareqartartut sulisussaqanngittullu annertuallaarnera peqqutaaqataasorisinnaavara. Utaqqisaramik qaammaterpassuit meeqqap inissarsinissaa, Julia Biilmann oqarpoq.
Ilinniartuulluni meerartaarnissaq toqqissisimanartoq
Inuussutissarsiornermut aningaasaqarnermullu ilisimatusartoq, Suusaat Olsen, ilinniartuunermi meerartaarnissamut toqqissisimagami meerartaalerluni oqaatigaa:
- Isumanni uanni toqqissisimanarami, soorlu uanga massakkut atuartuugaluarlunga meerartaalerpunga. Ima toqqissisimatigingama massakkut ima inissisimavugut atuaraluarlunga meerartaarsinnaallunga. Inigalu maani Nuummi annaanngikkaluarlugu meerartaarsinnaallunga, taanna oqarpoq.
Isumaginninnermullu siunnersortinngorniat, Karline Brandt Camilla Storchillu ilinniaqqaarnissaq pingaartinnerarpaat, inuuniarnerullu akitsoraluttuinnarnera meerartaartartut ikiliartornerannut pissutaasoraat:
- Immaqa meeqqeriviit akisuallaarunnaarpata, Karline brandt oqarpoq.
Nunaqarfimmi meerartaarnissaq erloqinarnerusoq
Nalunngisallu aallaavigalugit nunaqarfimmi meerartaartarneq ajornarnerusoq, ilinniartitsisunngorniaq, Hanne Mathiassenip oqaatigaa:
- Illoqarfimmiissangaanni orniginartinneruara meerartaarnissaq. Illoqarfimmi sukkalaarnersarunaramik. Uanga nunaqarfimminngaanneerama, takunikuusakka malillugit atorfeqanngikkaanni (ernereerluni sulinngiffeqarnerup kingorna) arriittuaraasarami meeqqamik isertoqarnissaa.
Taanna oqarpoq, perorsaasullu akissarsiai qaffattariaqarsoralugu oqaatigalugu:
- Inulerisut, meeqqerisut tusartuaannarparput oorisiai annikittartut tulluarnatik, Hanne Mathiassen oqarpoq.
Ilinniartitsisunngorniaqataatalu, Laurethe Johnsenip perorsaasut atugaat aaqqiivigineqartariaqartut isumaqataaffigaa:
- Isumaqatingaara ullutsinni tusarsaasorujuungamik perorsaasut akissarsiakittut. Meeqqat amerlasuut paaralugit imaannaanngittarami. Taakku tamarmik immaqa anguneqaraluartuuppata aaqqiallassangaluarpoq, Laurethe Johnsen oqarpoq.
