Nunatta folketingemiittuerunnissaa Kuno Fenckerip kissaatigigaa

Nunatta folketingimi ilaasortaatitaqarunnaarnissaa kissaatigalugu, Naleraq sinnerlugu inatsisartunut ilaasortaq, Kuno Fencker, KNR-imut oqarpoq. 

Naalagaaffeqatigiinneq, tassalu nunarput, Savalimmiut Danmarkillu akornanni naligiinnginnermik ingerlasoq taanna isumaqarpoq.

- Oqartuarpugut naalagaaffeqatigiippugut, kisianni ilumuunngilaq. Kalaallit Nunaat kunngeqarfiup ataaniippoq, kunngeqarfillu ataasiusumik naalagaaffiuvoq killilimmik kunngeqarfik. Taamaattumik aaqqissuusseqqittariaqarpugut, aaqqissuusseqqinniaruttalu tassa paragraf 21 eqqartortarnikuuarput taanna suliarineqartariaqartoq.

Kuno Fencker oqarpoq nangillunilu:

- Imaanngilaq suliarileraanni tamakkiisumik ingerlaannaq namminiilivittugut.

Taamatullu nunatta folketingimut ilaasortaatitaqarnera, nunat marluk tassalu nunatta Danmarkillu akornanni politikkikkut akulerunnerusoq, taanna isumaqarpoq.

- Danmarkimi pisunut annertuumik akulerunneruvoq, taannalu tulluanngilaq aamma uagut Kalaallit Nunaanni danskit toqqaannaq akulerunnissaat orniginngilarput, taamaattumik aaqqissuusseqqinneq nutaaq pisariaqalivissorpoq.

Nunarput “free association”-imik taallugu, tassa traktatitut isumaqatigiissuteqarsinnaanera, imaluunniit unionimik sanalluni, tassa peqatigiinnik suleqateqarluni.

Tamannali nunatsinni innuttaasut tasitinneqarnerisigut anguneqarsinnaasoq, Kuno Fencker oqarpoq.

- Taamaattumik inuiaat kalaallit taasitinneqartariaqarput, qanoruna ittumik suleqatigiikkusuttugut siunissami aamma nunarsuarmi pissutsit eqqarsaatigalugit alloriarneq tulliusinnaavoq naalagaaffeqatigiittut aaqqissuussineq.

Nunarput folketingimi ilaasortaarutissappat oqartussaaffiit annertuut Danmarkimit suli oqartussaaffigineqartut, soorlu illersornissamut aamma inatsiseqarnermut tunngasut qanoq nunatsinniit sunniuteqarfigineqartalissanersut, KNR-ip Kuno Fenckerimut apeqqutigaa.

- Kammereqassaaq, tassaa Naalagaaffeqatigiit ataatsimiittarfiat, soorlu nunat tamarmik tallimanik aallartitaqarsinnaapput, Danmarkip kisermaataai, ataatsimut inatsisitigut isumaqatigiissuteqarnikkut eqqartortalerlugit.

- Tassa taakkua akisussaaffiit nunatsinni inatsisiliorlugit aamma tigusariaqakkagut, tigusinnaasagut taakku akisussaaffiit namminersornermi inatsimmi allaqqareerput aamma tigunissaanut piareersartariaqassaagut.

- Kisianni suliarineqarneri soorunalimi nunatsinninngaanniit suliarineqartassapput. Akisussaanerpaaq massakkut Danmarkimiikkallarpoq, kisianni suliarineqarnerat inatsisartutigut naalakkersuisutigullu aamma suliarineqartartussaagamik.

Naleraq nammineerluni folketingimi issiasuutitaqarpoq, nunatsinniit folketingimi ilaasortat marluusut qaqugu folketingimiikkunnaarnissaat, Naleqqameersup Kuno Fenckerip ukiulerlugu taasinnaanngilaa, taannali paragraf 21-p atuutilersinneqarnissaanut innersuussivoq.