Suleqatigiinneq: Meeqqat tamarmik isumaginninnermi suliani tamani maanna najorteqartalerput
![](/sites/default/files/styles/image_934x467/public/img_6888.jpg?itok=UKrzvKys)
Meeqqat illersortaat kommunini ataatsimiinnerni peqataasassaaq, meeqqallu isummersuutaannik tapersersuissalluni.
- Ilinniartitaanerup nutaap illoqarfinni tamani meeqqanut illersuisoqalernissaq qulakkeertussaavaa, Nike Berthelsen, Peqatigiiffik Kalaallit Meerartaanni allattoqarfimmi pisortaq taama oqarpoq.
Namminersorlutik Oqartussat Isumaginninnermut Aqutsisoqarfiat ilinniartitaaneq nutaaq pillugu peqatigiiffimmut Kalaallit Meerartaannut suleqatigiinnissamik isumaqatigiissuteqarpoq, ilinniagaq, meeqqanik illersuisoqartitsilluni aaqqissuussinermut Najortimut tapertaasussamik.
- Ulloq Kalaallit Nunaanni kommuninut nuannersuuvoq, maannami meeqqat kikkulluunniit isumaginninnermi suliani meeqqanut imminernut tunngasuni illersorteqartinnissaat neqeroorutigisinnaalerpaat. Tamanna inatsisitigut piumasaqaataavoq maannamut kommuninit piviusunngortikkuminaassimasoq. Siunissamili taamaaliorsinnaalerput, Nike Berthelsen, Peqatigiiffik Kalaallit Meerartaanni allattoqarfimmi pisortaq oqarpoq.
Ilinniartitaanerup qulakkeertussaavaa, Kalaallit Nunaanni meeqqat sumiginnagaanerpaasut isumaginninnikkut suliani tusaaneqarnissaat peqataatinneqarnissaallu.
Peqatigiiffik Kalaallit Meerartaat maannamut taamaallaat Nuummi, Maniitsumi Sisimiunilu meeqqanik illersuisoqartitsisinnaasimavoq.
- Isumaginninnermut Aqutsisoqarfik sinnerlugu Kalaallit Nunaanni tamarmi isumaginninnermi meeqqanik illersuisartussanik ilinniartitsisinnaalerpugut, Nike Berthelsen oqarpoq.
- Najorti ukiut marluk sinnerlugit ingerlareerpoq, takusinnaavarpullu illersuisoqartitsisarneq meeqqanik suliassat uniinnarnikut pilertornerusumik suliarinissaannut iluaqutaalluartoq aamma assersuutigalugu angerlarsimaffiup avataanut inissinneqarnerup kinguneqarluarnissaanut iluaqutaasoq, Peqatigiiffik Kalaallit Meerartaanni allattoqarfimmi pisortaq, Nike Berthelsen, tusagassiuutinut nalunaarummi taama oqarpoq.