Nunatta Isiginnaartitsisarfiata oqunnera: Industrivejimi isiginnaartitsinerit pisimasuinnanngorput

Nunatta Isiginnaartitsisarfia Nuummi Industrivejimi ukiut aqqanillit sinnerlugit illoqarpoq.

Maannali qimappaat.

KNR-ip Nunatta Isiginnaartitsisarfiani pisortap tullia, Karl William Jeremiassen peqatigalugu inersuaq inillu naggammik angalaarfigai

- Illorsuaq ullumikkut naggataamik alakkarparput qulakkeerniarlugu arlaannik minitaqarsimanerluta, taanna oqarpoq.

Anisut, utertut aneqqittullu

Inersuaq isiginnaartitsiviulluni qullerpassuaqartaraluartoq maanna taartuinnaavoq. Tamannali piumassuseqannginnermik naammagisimaarinninnginnermilluunniit pissuteqanngilaq.

Oqunnerali pissutaasoq, Karl William Jeremiassen oqarpoq:

- Illorsuup oqoqarnera pillugu qimattariaqalernikuuarput.

Nunatta Isiginnaartitsisarfia Industrivejimi init aatsaat siullermeertumik qimanngilaat. Ukiup ataatsip matuma siorna aamma qimappaat. Qaammatialuillu qaangiuttut – novembarimi – illorsuup oqoqarnerata kingunerisaanik iluarsaanneqangaatsiareernerata kingorna ininut sungiusimasaminnut nooqqipput.

Qaammatilli sisamangajaat qaangiuttut – ukioq manna marsimi iluarsartuussinerup oquerutsissimanngikkaa paasinarsimavoq, taamaammat isiginnaartitsisartut ininit aneqqipput.

- Sapaatit akunneri marluk qaangiupput misissuititseqqinnitsinniit paasillutigu suli oqoqartoq, aalangernikuuvugut qimanniarlugu, Karl William Jeremiassen oqarpoq.

Oqummik nassataqarusunnatik suut tamarmik eqqarniaraat

Inuilli kisimik Nunatta Isiginnaartitsisarfiata inersuaq kisimi qimanngilaat.

Karl William Jeremiassen oqarpoq:

- Tassunga atatillugu illorsuarmiittut pequtit pisattat isiginnaagassiornermut atortut atisat aalajangernikuuvugut igittariaqarlutigit oqummik nassataqartuaannarsinnaannginnatta piffimmiit piffimmut nooqattaarnitsinni, taanna oqarpoq.

Atortut oquiartinnissaat aningaasassaqartinneqaraluartoq, nutaanik pisineq imminut akilersinnaanerummat eqqaanissat isumatusaarnerusoq aalajangerpaat.

- Illorsuup misissortinneranut, oquiartinneranut illoqarfimmi assingiinngitsunik allaffeqarfinnik ilinniarfimmillu isiginnaagassianullu assingiinngitsorpassuarnik aningaasartuutigut qaffapput, taanna oqarpoq, nangillunilu:

- Taavalu ukua oquiartissinnaasagut iginneri akikinnerusutut nalilerneqarnikuupput oquiartinneraninngaanniit.

Naak Nunatta Isiginnaartitsisarfiata illorsuaq qimakkaluaraa tamanna isiginnaagassiat tungaatigut sunniuteqassanngitsoq Karl William Jeremiassen isumaqarpoq:

- Arlaatigut isiginnaartitsisarfiup tunniussinnaasai nunatsinnut isiginnaagassianullu appariarnissaat taakkua naatsorsuutigineqassanngillat. Assigiinngitsunik pilersaarusioreernikuuvugut isiginnaagassianut tunngasut illorsuartaaqqinnissamut tunngasut ataatsimuuleqqinnissamut tunngasut tamaavimmik eqqarsaataareernikuupput, massakuugallartoruna illorsuaq pingaarnertut qimallugu pigallartugut.