Inatsit tunngaviusussatut siunnersuut innuttaasunut tusarniaassutigineqalertoq

Naalagaaaffinngornissamut naalakkersuisoq Vivian Motzfeldt, inatsit tunngaviusussatut siunnersuut pillugu innuttaasunut nuna tamakkerlugu piffissami tulliuttumi ataatsimiititsisaqattaarniarpoq.

Allattoq Mads Lynge, Gaaba Olsen

aggustip 07-at 2024 11:28

Inatsit tunngaviusussatut siunnersuummut missingiutip saqqummiunneqarneranit ukiup aappaata qeqqa ingerlareersorlu, innuttaasut suliaq pillugu isummersornissamut maanna periarfissinneqalerput.

Innuttaasummi siunnersuut pillugu tusarniarneqarnissaat pillugu naalagaaffinnngornissamut naalakkersuisoq innuttaasunut nuna tamakkerlugu ataatsimeeqatiserinnittussanngorpoq.

Innuttaasunut ataatsimiititsineq siulleq Nuummi katersortarfimmi marlunngornermi unnukkut pivoq.

Innuttaasut ataatsimiititsinerit aqqutigalugit inatsit tunngaviusussatut siunnersuut pillugu isummersorsinnaassasut Vivian Motzfeldtip oqaatigaa:

- Apeqqutit amerlasuut naalakkersuinermik kisimi ilusilersugaassanngimmata uani isumaliuutissiissut una tunniunneqarsimasoq qulequttanik suli ammasunik imaqarpoq, innuttaasut naggataatigut isummerfigisassaat, Vivian Motzfeldt oqarpoq.

Kujataani innuttaaasunut pingasoriarluni ataatsimiititsisoqarnissaanut maanna aggersaavoq. Sermits.AG-p allaaserisaa naapertorlugu Qaqortumi aggustip ulluisa arfineq-pingajuanni, Narsami aggustip ulluisa qulingiluaanni, Nanortalimmilu aggustip ulluisa qulinganni ataatsimiititsisoqassaaq.

Suliap ingerlateqqinnissaanut suli pilersaarusiortoqanngitsoq

Inatsit tunngaviusussatut siunnersuut ukiut arfinillit suliarineqareeerluni tamanut Ilisimatusarfimmi 2023-mi apriilimi saqqummiunneqarpoq. Suliaq 30 millionit koruuninik akeqarsimavoq.

Inatsilli tunngaviusussatut siunnersuut persuarsiutigineqartumik saqqummiunneqarneraniit suliaq qaammatini arfinilinni uninngavoq. Inatsimmi tunngaviusussatut siunnersuut pillugu siunnersuut saqqummiunneqareersorlu, suliallu ingerlaqqinnissaanut kikkut akisussaanersut politikerit akornanni isumaqatiginngissutaammat tisumalioqatigiissitaq atorunnaarsinneqarpoq.

INATSIT TUNNGAVIUSUSSAQ PILLUGU ISUMALIOQATIGIISSITAQ

Nunatsinni namminerisamik tunngaviusumik inatsiseqarnissaq Inatsisartuni siullerpaamik 2007-imi qaqinneqarlunilu oqallisigineqarpoq.
Ukiut qulingiluat qaangiuttut apeqqut qaqinneqaqqippoq, tassanilu Inatsisartunut aalajangigassatut siunnersuutigineqarluni. Nunatsinni inatsit tunngaviusoq pillugu isumalioqatigiissitaliornissaq taperserneqarpoq.
Taamaammat Naalakkersuisut Tunngaviusumik Inatsisissaq pillugu Isumalioqatigiissitaq 2017-imi apriilip ulluisa 27-anni pilersippaat.
Tunngaviusumik inatsimmut "kalaallit inuit kulturiannut, oqaasiinut, kinaassusaannullu tunngaveqartumik sinaakkusiisumillu" siunnersuutaavoq.

Paasissutissarsiffik: tunngavik.gl

Allisiguk

Suliap ingerlaqqinnissaanut akisussaaffik Vivian Motzfeldtip siorna ukiakkut akisussaaffigilerpaa, naalagaaffinngornissamut naalakkersuisoqarfik tassani pilerseqqinneqarmat.

Innuttaasullu suliap ingerlaqqinnissaanut maanna suleqatiserineqartut Vivian Motzfeldt isumaqarpoq.

Suliaq ingerlasoq

Inatsit tunnngaviusussatut siunnersuut ulluni makkunani misissoqqissaarneqarpoq. Siunnersuutimmi naalisarneqarnissaa pilersaarutaavoq, innuttaasunullu ingerlateqqinneqassalluni, innuttaasut isummersorfigisinnaaniassammassuk.

Vivian Motzfeldt, tunngaviusumik inatsisissatut siunnersuutip saqqummiunneqarneranit ukiup aapppaata qeqqa qaangiuppoq. Innuttaasut sooq aatsaat massakkut tusarniarneqalerpat?

- Suli ukioq ataasinngunngilaq naalakkersuisoqarfiup pilersinneqarneraniit, massakkullu sulisutigut atorfinitsitsisimalereerluta. Innuttaasunik naapitsinissarput piareersarlugu ingerlapparput, taanna oqarpoq.

Aamma atuaruk Kalaallit Nunaanni tunngaviusumik inatsisissamut missingiut: Nunap siunissaanut pingaarutilik imaluuniit iluareqqusaarnerinnaq?

Innuttaasunut ataatsimiititsinerit Avannaani ukiaru nanginneqassasut, internetilu aqqutigalugu nunap sinnerani tusarniaasoqassasoq Vivian Motzfeldtip ilisimatitsissutigaa.

- Nunarput isorartoorujussuaq tamakkerlugu tikinniarnera ilaatigut unammllernartarpoq. Taamaammat periarfissat ullumikkut piusut atorluarnerisigut qanoq sumiiffiit tamaasa akuutillugit pitsaanerpamik ingerlatsisinnaaneq misilerarlugu ingerlatissavarput, Vivian Motzfeldt oqarpoq.

Aningaasat 2.175.000 koruunit naalagaafffinngornissamut naalakkersuisoqarfiup pilersinneqarnissaanut aningaasanut inatsimmi immikkoortinneqarnikuuupput.

Inatsit tunngaviusussatut siunnersuutip suliarineqarnera partiinit arlalinnit isornartorsiorneqarpoq. Demokraatit siulittaasuata Jens-Frederik Nielsenip suliaq "iluareqqusaaginnarluni takorluugaannaanerarpaa”, Naleqqallu siulittaasuata Pele Brobergip oqaatigaa innuttaasut inatsit tunngaviusussatut inatsisissaq pillugu sulinermi tusaaniarneqarsimanngitsut.

Suli pitsaanerulernissatsinnut ikiortigut! Nutaarsiassamut malugisaqaruit uunga allaffigitigut.