Tarnikkut nakuuserneq: Inatsit nutaaq allatut nutaatut uppernarsaateqarfiussaaq

Nikassaaneq ajortuliortumilluunniit misigititsineq ukiup nikinnerani tarnikkut nakuuserneq pillugu inatsit nutaaq aqqutigalugu inatsisinut akerliusunngortinneqassapput. Tamannalu politiit suliaqarnerannut nutaanik piumasaqaateqalersitsissaaq.

Allattoq Thor Bill

decembarip 31-at 2023 08:43

Nutserisoq Connie Fontain

Nunatsinni tarnikkut nakuusertoqarnera – timikkut nakuusertoqartarneratulli innuttaasunit januaarip aallaqqaataanit unnerluutigineqarsinnaalissaaq.

Inatsimmi nutaaq tarnikkut nakuusernermik pinerluutinngortitsisussaq ukiup nikinnerani atuutilissaaq. Tamannalu politiit suliaqartarnerannut sunniuteqassaaq. Kalaallit Nunaanni Politiit KNR-imut allakkatigut akissumminni allappaat.

- Politiit tarnikkut nakuuserneq pinerluttulerinermik inatsimmik unioqqutitsinertut allatulli tunngaviusumik suliarisassavaat. Tarnikkulli nakuusertoqarneranik suliami uppernarsaateqartoqarnissaanut misissueqqissaarnermut atatillugu unnerluutiginnittoqarnerani aamma misissueqqissaartoqarnerani immikkut ittunik eqqumaffigisassaqarpoq, politiit allapput.

Tarnikkut nakuuserneq assigiinngitsutigut takuneqarsinnaavoq. Nikanarsagaasutut, kanngunarsagaasutut, eqqunngitsuliorfigineqartutut, siorasaarneqartutut mattunneqartutullu misigisoqarsinnaavoq. Taamaattumik tilluusarnikkut nakorsamilluunniit misissortinnikkut taakku uppernarsarneqarsinnaanngillat. Allanik uppernarsaatinik assersuutigalugu sms-ikkut allaqatigiinnernik imaluunniit nipinik immiussinernik uppernarsaateqarfiusariaqarpoq. Imaluuniit pisumik imaluunniit pissusilersuutigineqartartunik uppernarsaasinnaasumik ilisimannittutut nassuiaasoqartariaqarluni.

TARNIKKUT NAKUUSERNEQ SUUA?

Politiit tarnikkut nakuusertoqarnerani pinerluuteqartumik eqqartuussisutigoortitsinissaannut politiillu misissueqqissaarnerminni qulaajaanissaannut piumasaqaatit arlallit pisariaqarput, itinerusumik:

Pinerliisup pinerlineqartoq sakkortuumik nakkarsarsimassavaa, ajortumik pineqartutut misigitissimassavaa, kanngunarsaasutullu pissusilersuuteqarfigisimassallugu.
Pinerliisoq inoqutigiinnut ilaassaaq imaluunnit qanimut atassuteqartuussaaq imaluunniit inoqutigiinnut atassuteqarnikuusimassalluni.
Pinerliisup pissusilersuutai pinerlineqartumut ileqqussaanngitsumik aqutsiniarnerussapput aamma piffissap ingerlanerani arlaleriarlutik pisimasuussallutik.

Paasissutissarsiffik: Kalaallit Nunaanni Politiit

Allisiguk

Tamannalu politiit suliaqarnerannut – nutaanik – annertuunillu piumasaqaateqarfiussaaq.

- Politiit killisiuinermi pinerliffigineqartut nakuuserneq oqaasertaleruminaatsissinnaagaat, aamma pisumit pisumut immikkoortitsiniarnerat ajornakusoorsinnaasoq paasilluarsinnaassavaat. Tarnikkut nakuuserneq taamaattumik politiit misissueqqissaarnerata pitsaassusaanut pingaartumik killiuinermi piginnaasaqarnermut atatillugu annertuumik piumasaqaateqarpoq, Kalaallit Nunaanni Politiit allapput.

Timikkut nakuusernermut sulianut sanilliukkaanni politiit timikkut nakuusertoqarnerani pisoq ataaseq arlallilluunniit isiginiarajuttaraat tarnikkut nakuusernermi piffissap ingerlanerani pissusilersuutigineqartut imaluunniit pisut imminnut ataqatigiinngitsut akornanni atassuteqarneq isiginiartassavaat.

Suliaq ataasiakkaat amerlanissaat naatsorsuutiginngikkaat

Inatsit nutaaq ukiup nikinnerani atuutilerpat suliassarpassuit takkussuutilernissaat Kalaallit Nunaanni Politiit naatsorsuutiginngilaat.

Aajangersagaq kisimiitsillugu suliarineqartarnera qaqutigoortoq Danmarkimi misilittakkat takutippaat, taannali aalajangersakkanut allanut assersuutigalugu timikkut nakuusernermut imaluuniiit naalliutsitsinermut sulianut atatillugu ilaagajunneruvoq.

- Nakuusernermut ilisimasat tamarmik nakuusernerit imminnut atassuteqartartut takussutissaqarpoq. Tassa imaapoq innuttaasut timikkut nakuuserfigineqarsimasut imaluuniit malersuigaasimasut aamma tarnikkut nakuuserfigitissimagajuttarput, Kalaallit Nunaanni Politiit allapput.

Taamaammat politiit timikkut nakuusertoqarneranut atatillugu suliaqaraangamik tarnikkut nakuuserneq aamma isiginiartassavaat.

- Innuttaasup qanigisaminit timikkut nakuuserfigineqarsimasup unnerluutiginninnera assersuutissaalluarpoq. Uani politiit timikkut nakuusertoqarnissaa sioqqullugu tarnikkut nakuusernermit aallaaveqarsimanersoq paasiniartartussaavaat.

Aamma atuarukMisissuisartoqatigiit angerlarsimaffinni nakuusertarnernik paasiniaasut

Politiit ataasiakkaat tarnikkut nakuusernermik imaluunniit nikassaanermik, ajortumik pinnittumik pissusilersuuteqartumik misigititsinermik ilisarinnissinnaanermut piginnaasaqarnissaat aamma pisariaqarpoq.

- Kalaallit Nunaanni Politiit 2022-p naanerani nakuusernermut ilisimassallit nakuusernermut ilisimasanik kiisalu ”kingunerlutsitsinermut” tunngasunik politiinut ilinniartitsisussat ilitsersuisussallu pilersippaat. Taakku suliniuteqarnermikkut politiit nakuusernermi pinerliffigineqarsimasut kingunerluutitut qisuariaatigisartagaannut ilisimasaat ineriartortissavaat kiisalu qanigisani nakuusertoqarnerani pinerliffigineqartuni susoqartarneranik paasisimasaqarnerulersitsissallutik, Kalaallit Nunaanni Politiit allapput.

Tarnikkut nakuuserneq Danmarkimi 2019-imi pinerluutinngortinneqarpoq.

Nutaarsiassami kukkunermik nassaarsimaguit uunga allaffigineqarsinnaavugut.