Nakuuserneq pillugu inatsit nutaaq: Tarnikkut ikiligaaneq tilluusarnermut nallersuunneqarpoq
1. januaarimiit tarnikkut nakuuserneq politiinut nalunaarutigineqarsinnaalissaaq.
Tassami ippassaq Folketingip aalajangiineq Kalaallit Nunaanni tarnikkut nakuusernerup pinerluutinngortinneqarneranik imalik akueraa.
- Nakuusernermut akiuunnermik patajaallisaataavoq tarnikkut nakuusernerup pinerluutinngortinneqarnera massakkut akuerisaammat. Nakuusernerup tilluusarnerinnaasannginnera, kisianni aamma tarnikkut ikiliisarnera tamatuma ersersippaa, Inatsisit Atuutsinneqarnerannut Naalakkersuisoq Naaja H. Nathanielsen oqarpoq.
Maajip aallartinnerani Inatsisartut qanigisani tarnikkut nakuusernerup timikkut nakuusernermut nallersuunneqarnissaa pillugu inatsisissatut siunnersuut inatsisartut maajip aallartinnerani akuersissutigaat.
Kisianni eqqartuussisoqarnermik sammisaqarfik danskit naalakkersuisuinit oqartussaaffigineqarmat inatsit Folketingimi inaarutaasumik akuerineqassaaq.
- Tarnikkut nakuuserneq pillugu inatsimmut siunnersuut naalakkersuisut kissaatiginninnerannik tunngaveqarpoq – minnerunngitsumik tarnikkut nakuuserneq pinerlineqartumut annertuumik sivisuumillu sunniuteqarsinnaammat. Taamaammat Kalaallit Nunaanni tarnikkut nakuuserneq pinerlunninngortileratsigu pitsaasuuvoq, taamaalillutalu pinerluttulerinermi inatsit aqqutigalugu ersarissumik oqariartuuteqarluta tarnikkut timikkullu nakuusernerit naligiittut, inatsisinik atuutsitsinermut ministeri Peter Hummelgaard tusagassiorfinnut nalunaarummi taamanikkut oqarpoq.
Tarnikkut nakuuserneq periaatsit assigiinngitsut atorlugit malugitinneqartarpoq. Nikanarsarneqarneq, kanngunarsagaaneq, innarlerneqarneq, uukapaatinneqarneq, qunusaarneqarneq imaluunniit immikkoortinneqarneq malugineqartarpoq.
Tarnikkut nakuuserneq Danmarkimi 2019-imi inatsisinik unioqqutitsininngortinneqarpoq.