Inuusuttut pujortartartut inatsisissatut siunnersuutikkut ikilissasut
Tupanut akitsuutit aningaasanut inatsit pillugu isumaqatigiinniarnermi qaffanneqarput. Inatsimmillu nunatsinni pujortartartut ikilissutissaannik - minnerunngitsumillu amerlasuut pujortalernissaannik pinngitsoortitsisussamik - immaqa atuutilersitsisoqartussanngorpoq.
Peqqissutsimut Naalakkersuisoqarfiup ilaatigut 18-iliisimanngitsut tupanik pisiniartitseqqusaannginnissaannik sikaritsinillu 20-kkaartunit imakinnerusunik nioqquteqaqqusaajunnarnissamik inatsisissatut siunnersuut tusarniaassutigaa.
- E-cigarettinik inerteqquteqarneq
- Sunoorsinut, sukuluunut aamma tupamut aggukkamut tamuaneqarsinnaasumut (tupa pujoqanngitsoq) inerteqquteqarneq
- Akuutissanik soorlu assigiinngitsunik mamassutsinik pujuisalu qalipaasernissaanut inerteqqut
- Inuusuttut 18-it inorlugit ukiullit tupanik nioqqutissianik il.il. nioqquteqarnermik isumaginnittuunissaannut inerteqqut
- Cigarettit poortat 20-nik ikinnerusunik nioqquteqarnissamut inerteqqut.
Paasissutissanik pissarsiffik: Naalakkersuisut.gl
Siunnersuut innuttaasut peqqinnerulernissaannik pujortartarunnaarnissaannillu tunuliaquteqarpoq. Meeqqat inuusuttullu siunnersuummi pingaarnertut sullinniarneqarput:
- Ilisimatusarnermi paasineqarpoq pujortaliaarsimagaanni pujortarnerulernissaq pujortaannarnissarlu ilimanaateqarnerusartoq, inatsisissatut siunnersuummi allassimavoq.
Angutit inuusuttut 63 procentii ullut tamaasa pujortartartut
Nunatsinnilu pujortartartuni inuusuttut amerlanerummata tamanna ernumanartoqartoq siunnersuummi tunngavilersuutigineqarpoq.
Kalaallit Nunaanni innuttaasunik 2018-imi misissuinermi erserpoq, angutit inuusuttut 15-it 24-llu akornanni ukiullit 63 %-ii ullut tamaasa pujortartartut.
Pujortartarnerup peqqissutsimut ajoqutaarnera eqqarsaatigalugu tamanna pitsaanngilaq:
- Nunatta nakorsaaneqarfiata 2016-imi ukimut nalunaarusiaani erserpoq, nunatsinni kræfti naliginnaanerpaaq tassaasoq puakkut kræfteqarneq. Aamma erserpoq puakkut kræfteqarneq kræftimik nappaateqartut akornanni toqqutaanerpaasartut ilagigaat. Nalunaarusiaq aamma naapertorlugu pujortartarneq puakkut kræfteqalernermut nunatsinni pissutaanerpaasoq, siunnersuummi tunngavilersuutigineqartutut allassimavoq.
- Nunatsinni: 2018-imi innuttaasut 52 procentii (1993-imi 68 procentii) ullut tamaasa pujortartarput
- Islandimi: Innuttaasut 14 procentii ullut tamaasa pujortartarput.
- Savalimmiuni innuttaasut 20 procentii ullut tamaasa pujortartarput.
- Danmarkimi innuttaasut 17 procentii ullut tamaasa pujortartarput.
- Sverigemi innuttaasut 7 procentii ullut tamaasa pujortartarput.
- Norgemi innuttaasut 12 procentii ullut tamaasa pujortartarput.
- Finlandimi innuttaasut 13 procentii ullut tamaasa pujortartarput.
Paasissutissanik pissarsiffik: Inatsisissatut siunnersuummut oqaaseqaatit.
Tupat allat e-sikaritsillu aamma inerteqqutaalissasut
Inuusuttut pujortartartut ikilinissaat anguniarlugu 18-iliisimanngitsut tupanik pisiniartitseqqusaajunnaassapput. Taamaaliornikkut meeqqat inuusuttullu tupamik passussinissamit taakkualu saqqumilaartinneqarnerannit aamma illersorniarlugit.
Siunnersuummi tunngavilersuutigineqartumi allassimasut naapertorlugit sikaritsit 20-kkaartunit imakinnerusut akikinnerummata taakkuninnga pisisartut inuusuttuukkajunnerusarput, taamaattumik meeqqat inuusuttullu aamma illersorniarlugit sikaretsit 20-kkaartunit imakinnerusut nioqqutaasarunnaarnissaat siunnersuutigineqarpoq.
Tupallu allat soorlu sunoorsit sukuluullu kiisalu e-sikaritsit aamma inerteqqutaalissapput.
Inatsisissatut siunnersuutip 2020-mi juulip aallaqqaataaniit atuutilersinnissaa siunertaralugu Inatsisartut aappaagu upernaakkut ataatsimiinneranni saqqummiunneqassasoq, Naalakkersuisut ilimagaat.